[專欄：日本在香港]
唔少人去旅行果陣，都鐘意買啲特色嘢做手信，日本人都唔例外！大家又知唔知日本人嚟香港，覺得咩產品好特別，會買翻去做手信呢？今次同大家盤點日本人愛買嘅香港手信，除咗白花油、公仔麵，原來佢地仲鐘意－－－－－！
延伸閱讀：2023東京必買手信推介
日本人一致推：買嘢食做手信
今次編輯部就特別搵嚟幾位日本遊客，睇下佢哋買咗或者打算買咩做手信！呢幾位日本人都係第一次嚟香港，佢地都對香港嘅嘢食比較感興趣，一致咁話打算買嘢食返去做手信！ 飲食果然係出外旅遊無論送禮定自用都係基本中嘅基本！
「嚟香港主要目的係去迪士尼同影相！雖然日本都有迪士尼，香港那個亦較細，但講到影相，一定係香港果個靚啲！」咦？ 竟然係咁！？ 繼上次TripAdvisor 「亞洲最受歡迎樂園」一役(傳送門)之後香港迪士尼再次完爆日本！ 不過希望唔好連原因都係一樣……
不過去到手信，大家始終都係情迷返零食，另外咪話香港人次次去日本都掃藥妝，其實日本人喺香港都係掃藥妝www 不過對於日本人嘅大熱香港手信白花油似乎就唔係好對年輕人嘅胃口。
「一陣會去行超市，想買啲地道嘅零食翻去做手信！」
「打算行藥局，買啲日本無嘅cosmetic翻去，暫時買左Vaseline嘅噴霧裝body lotion！」
「自己係學生，唔想買啲老土嘢做手信！」
「雖然白花油好出名，但買嚟做手信好奇怪，而且味道強烈，自己都無打算用！」
「聽人講Jenny’s Cookies好好食，打算買好多嘢食翻去做手信！合味道辣海鮮味、支裝鴛鴦飲品、蛋捲都想買！」
「今次旅行嘅主要目的係食嘢！打算買Jenny’s Cookies、特別味道嘅出前一丁，同埋喺女人街買啲特色嘢做手信！」
「蛋撻甜甜地，質感好似食緊甜品咁，好好食，可惜好難拎翻日本做手信！」
「聽日就走喇！今日仲想食埋小籠包，買啲嘢食做手信！」
「覺得香港人食出前一丁嘅方法好神奇，估唔到連茶餐廳都有賣，邊飲奶茶邊食出前一丁，應該會好有趣！」
網上推介的「香港必買手信」
我地參考咗日本網站同雜誌嘅推介，發覺除咗以上幾位日本人嘅推介，以下呢啲都係相當有人氣嘅手信！
＜食品類＞
李錦記 （潮州辣椒油、中華料理醬汁包）、XO醬、蠔油
出前一丁（在港人氣很高，有日本沒有的味道選擇）
生麵皇（食感很好、味道高級）
公仔麵（多味）
合味道（世界總選第1位 香辣海鮮味）
曲奇：曲奇四重奏、奇華、多多餅店
傳統食品：杏仁餅、燕窩糕、老婆餅、鳳梨酥、蛋卷
另外，間中也有人提到必買的有華園零食、芒果乾及半島朱古力。
＜飲品類＞
鴛鴦（香港獨有的咖啡＋奶茶飲料）
即沖奶茶（細細包，適合當手信派）
中國茶（陸羽、Lipton）
＜其他＞
念慈菴喉糖（個個都話效果好好）
玉容膏、屈臣氏bird nest面膜
白花油、Tempo
而講到Jenny’s Bakery，未必每位香港人都有食過，但相信見到呢個印有熊仔嘅包裝，大家都會即刻認得呢盒曲奇餅！唔少日本人都好鐘意食佢，有日本人更喺YouTube拍片，同大家分享呢盒曲奇有幾好食！
圖片來源：リーダーしんじくん！
居港日本人係咪咁諗？
我地問咗6位居住於香港嘅日本人，睇下佢地以在港日本人嘅角度，會推薦朋友買咩翻去做手信！
呢幾位日本人分別在港居住1年至11年，佢地大多數都表示：
「肯送嘢已經好好，買咩無咩所謂」
而一位日本人就提到，會建議朋友去旺角女人街買嘢，又平又有特色，做手信唔錯；另外一位日本人就建議買Jenny’s cookies，同埋超市有賣嘅濃縮雞湯粒，送俾鐘意煮嘢食嘅人都唔錯！
而佢地都有提到，其實香港嘅產品喺日本唔係太出名，自己嚟香港生活之前，都未用過香港嘅產品。不過，間中有朋友去完香港旅行，就會買出前一丁、白花油、清熱酷、李錦記或者奇華等，呢啲比較普遍嘅手信。
About Post Author
