專門提供世界各地飯店、景點、餐廳等相關提供資訊TripAdvisor為一國際性旅遊評論網站，最近就按全球旅行人士嘅投稿意見選出全球及按地區劃分最受歡迎主題樂園啦。全球嘅結果就非常正路啦。頭3名分別係美國佛羅里達州奧蘭多嘅環球冒險島樂園、水上樂園Discovery Cove，以及德國嘅魯斯特歐洲公園。
美國佛羅里達州奧蘭多嘅環球冒險島樂園全球最受歡迎
不過我哋叫得LIKE JAPAN，就梗係要講講「日本嘅最受歡迎樂園」啦。而家即刻睇睇結果。
上年迎接15周年嘅USJ終於都大熱勝出。冇講錯，係「終於」。因為自2013年有呢個榜以來，佢係第一次攞第1名。從投稿反響之中，USJ由於「哈利波特」園區忠實呈現出電影嘅世界觀，因而得到來自各個年齡層嘅踴躍支持。不過即使佢係日本第一，喺亞洲都係排第4咋。
而排佢前面嘅竟然係……海‧洋‧公‧園!!!!!!!!!!!!!!!!!!!!!!!!!!!!!!!
即係睇睇亞洲區排名：
排第一嘅係新加坡環球影城，而對於新加坡環球影城嘅好評主要竟然係來自日文嘅投稿。主要係認為比起USJ新加坡環球影城景點及設施更集中更方便，另外排隊時間亦較短，仲有就係新加坡環球影城有『變形金剛 THE RIDE』亦係一大重點。
而排第二同第三嘅就係來自香港嘅迪士尼樂園同海洋公園！
究竟香港嘅迪士尼樂園點解會深受遊客喜愛呢？ 即刻睇睇大家覺得佢吸引在邊度！
來自日本嘅遊客akikoh466
比起東京迪士尼舒適度真係唔同層次，連黃金週都冇人架！ 而且香港唔知點解排普通隊係會快過快證隊！
來自所沢市嘅miyu0716
入場第一個感覺係：「城堡好細！」，不過意外地機動遊戲非常驚險刺激，呢個喺日本迪士尼係難以想像。
來自茨木市嘅pandakopanda1101
應該係全球最「吉」嘅迪士尼吧！
就算係春假當中，無論係同角色影相，定係機動遊戲，都超級快，幾乎唔使等！ 另外由於比日本迪士尼細，一日就行得晒！ 小朋友玩機動遊戲都好開心！
優勢：細！ 機動遊戲刺激！ 排隊快！
第三位嘅海洋公園又點呢？
來自東京嘅BURNABYSU
總之就係大！ 小朋友非常喜歡水族館，坐纜車時睇嘅香港島景色好正！ 有咗南港島線好方便，唯一係由大陸嚟嘅遊客唔係好守規矩有啲唔開心。
來自日本嘅馬場 譲
一開始以為只有水族館同動物園，原來山上仲有好多驚險刺激嘅機動遊戲！ 嚟香港一定要去迪士尼同海洋公園！
優勢：大！ 機動遊戲、水族館同動物園咩都有齊！
原來香港嘅樂園喺日本人眼中係咁多優點架！ 今次真係「香港勁揪」啦！(棒讀)，小編明日就去迪士尼玩返下囉喂！(眼神死)
資料來源:
https://www.tripadvisor.jp/TravelersChoice-Attractions-cAmusementParks-g2
https://www.tripadvisor.jp/TravelersChoice-Attractions-cAmusementParks-g1
https://www.tripadvisor.jp/TravelersChoice-Attractions-cAmusementParks-g29423
About Post Author
