如果藤原佐為大戰AlphaGo…

如果藤原佐為大戰AlphaGo…

如果藤原佐為大戰AlphaGo…
近幾日睇新聞,總係離唔開Google DeepMind人工智能AlphaGo大戰南韓棋王李世石,呢單新聞點解咁觸目?事關圍棋係被認為係世界上最複雜嘅棋類之一,要一個電腦程式識玩圍棋同擊敗世界上最頂級高手,對程式嘅演算要求係非常之高,所以呢單除咗關IT事,亦都係圍棋界嘅一件大事。
 
截至今日(3月14日),AlphaGo已經連贏李世石三場贏出五盤三勝嘅比賽,不過因為規矩點都要捉夠五盤,所以雙方都要捉埋落去,李世石亦都成功喺第四盤反勝一局。
 
如果藤原佐為大戰AlphaGo…
講起呢單新聞同圍棋,相信唔少人都會諗起《棋魂》呢套經典漫畫,只不過當年《棋魂》喺北斗杯完結(有人覺得係爛尾),網上就流傳過係因為漫畫入面其中一個角色「高永夏」影射韓國真實選手,引起韓國不滿,所以進藤光喺北斗杯輸咗比賽就草草完結(當然我唔buy呢個係《棋魂》完結嘅原因),而當中高永夏影射嘅,正正就係依家同AlphaGo大戰嘅李世石
 
如果藤原佐為大戰AlphaGo…
李世石真人同高永夏一樣係年少成名嘅天才棋手,而且同樣咁高傲,當年段位只有三段嘅李世石由於覺得段位賽好無聊,所以公開揚言只有三段就夠,自此唔參加段位賽,由於當時佢已經贏得唔少比賽,經常力壓高段位棋手,搞到韓國棋院為咗佢而改規矩,國內比賽亞軍升一段、冠軍升兩段,世界冠軍升三段,結果佢三個月內就由三段升咗做最高嘅九段。
 
另外佢都出名串,成日串人唔夠班,雖然有時串完人係會輸咗,但佢都真係成為過好多次世界冠軍。但係今次同AlphaGo比賽,賽前佢都話自己唔駛準備,應該會以5:0或者4:1勝出,當然結果係點,大家有眼睇。
 
如果藤原佐為大戰AlphaGo…
另一方面,有人話AlphaGo係「現代版」藤原佐為,但相信有更多人會諗,假如係藤原佐為決鬥AlphaGo,結果又會係點?
 
啱啱贏返場嘅李世石就話AlphaGo有兩個缺點:
1.害怕執黑子
2.當敵人出現意外一著,AlphaGo對應會出現問題
 
係漫畫入面,佐為自己講過,佢執黑子(即係先下棋)係從未輸過。而根據李世石嘅講法,AlphaGo同佐為啱啱相反,執黑子反而會較弱。另外AlphaGo係透過唔同棋譜自我對局嚟學習,所以當對手下咗一步「資料庫」未必有嘅棋,AlphaGo就可能有bug,對應會出現問題,好似第四局第78著之後咁。
 
如果藤原佐為大戰AlphaGo…
當然如果藤原佐為鬥AlphaGo,可能AlphaGo已經有晒本因坊秀策(即係佐為上一個化身)嘅棋譜,所以佐為可能比較輸蝕,佐為要贏就要出奇不意咁落棋令AlphaGo又有bug,不過如果長鬥落去,當AlphaGo儲返咁上下Data,相信佐為都頂唔緊。
 
當然以上只係我FF,唔知大家又點睇呢?最後都希望李世石聽日贏返局,為人類爭返口氣!