C3AFA一連三日好快就過咗去，大家係咪仲未夠喉？小編上星期六去咗睇cosplay大激鬥，佢仲係國際cosplay賽事WCS(World Cosplay Summit) 嘅香港預選啊！到底一個國際標準嘅cosplay大賽係點評價嘅呢？同埋今年又係邊隊獲勝？小編將會帶大家睇睇！
C3AFA HK 2018 Cosplay大激鬥嘅規則係兩人一組，Cosplay日本動漫或電玩，更加要自行準備參賽道具同音樂(包括對白錄音) ，去表演約2.5分鐘嘅短劇。評分有三方面，就係Cosplay服飾、現場表演、原作忠實演繹依三方面啦。而勝出嘅冠軍隊伍，會有大會贊助嘅雙人來回名古屋機票、酒店，參加2018年World Cosplay Summit嘅總決賽。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
今年嘅季軍係cos Fate/Apocrypha嘅亞爾托莉亞同莫德雷德嘅隊伍，小編於現場睇嘅感覺真係好震撼！有完全配合音效嘅打鬥戲之餘，仲有播出原作嘅BGM，令觀眾好似身在二次元世界中！小編非常欣賞佢地身穿嘅盔甲還原得好好，把劍仲細緻之餘，好有重量感。最感動嘅係佢地使出寶具時，把劍更會變色、發光，令小編大開眼界！
(C3AFA 2018官方圖片)
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
亞軍係cos進擊的巨人嘅鎧之巨人同艾倫隊伍。佢地嘅打鬥唔係用劍，而係用拳打腳踢嘅方式，真係好考coser體能！相信佢地流暢嘅肉搏戰，留咗一個深刻印象比評判。而且，鎧之巨人嘅cosplay服裝非常講究，係同艾倫決鬥時，仲比艾倫撕出一忽肉而「濺出」血花，睇到全場都睇到「哇」一聲。
(C3AFA 2018官方圖片)
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
到冠軍隊伍就係cos Fate/Apocrypha嘅貞德同阿塔蘭塔嘅隊伍！打鬥場面非常合拍，人物還原度都好高(特別貞德cos十分複雜) 。依隊嘅道具別出心裁，由大型嘅佈景以至可以靈活移動嘅小道具都有。當中阿塔蘭塔向貞德射箭，係臨中箭前嘅一刻，支箭突然停留半空！原來背後有小道具牽引住，都令到觀眾們感覺十分新鮮。
(C3AFA 2018官方圖片)
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
最後就係今年比賽隊伍嘅大合照！希望今年預選優勝隊伍可以代表香港爭光，仲有活用參加國際比賽嘅經歷，令香港Cosplay界繼續愈戰愈強！
(C3AFA 2018官方圖片)
About Post Author
