喜愛日本嘅大家，唔知平時大家聽開咩日文歌呢？小編近排就成日聽Spitz同80年代嘅The Blue Hearts啦。而日文歌種類豐富，大家實會搵到啱自己口味嘅歌。近排KKBOX JAPAN就公佈咗一個年間排名，總合咗2017年歌曲喺KKBOX嘅播放次數，除咗發表日本國內最多人聽嘅歌之外，仲發表咗香港、台灣等地嘅年間日本歌手排名添！到底2017年最多香港人聽嘅日文歌係邊首？係咪好想知道呢？小編就事不宜遲同大家介紹吓啦！
KKBOX 2017亞洲地區最受歡迎日本歌手
(來源：twitter RADWIMPS速報)
根據KKBOX JAPAN嘅統計，舊年最多香港人聽嘅日本歌手(組合)係RADWIMPS！RADWIMPS仲攞埋香港、台灣、新加坡、馬來西亞嘅第一，佢舊年嘅勢頭真係好強烈！睇嚟應該係帶熱全球嘅日本動畫《你的名字》嘅影響，RADWIMPS擔當嘅插入曲同《前前前世》嘅主題曲都非常貼合電影氣氛，令到觀眾睇完都紛紛返去回味(小編都係其中一個)。
(來源：KKBOX編集室)
繼各地區橫掃第1位嘅RADWIMPS，香港地區第2位就係西野加奈、第3位ONE OK ROCK，兩個都係喺香港十分受歡迎嘅歌手/組合啊！順帶一提，第4位同第5位分別係AKB48同星野源。星野源嘅《戀》作為《逃恥》嘅主題曲，係2017仲牽起咗「戀舞」熱潮，人氣大爆發！
KKBOX 2017香港地區最受歡迎J-POP歌曲
(來源：KKBOX編集室)
2017年香港地區第1位嘅日文歌係星野源嘅《戀》，果然結衣bb同星野源嘅魅力都沒法擋，相信有唔少人仲因為依個熱潮，聽埋佢嘅其他歌，做埋星野源粉絲(小編都係)！而第2、3、4、5、6位亦都由人氣大熱嘅RADWIMPS全包，《前前前世》《なんでもないや》《夢灯籠》《スパークル》依幾首全部都係電影《你的名字》嘅主題曲同插曲，相信係手機播依首歌嘅時候，腦入面會閃過新海誠畫嘅細緻畫面，真係好正！
© 2017 HOSHINO GEN
第7位嘅《打上花火》就係2017年另一部動畫電影《煙花，應該和誰看》嘅主題曲，曲風輕快、帶點虛幻飄渺嘅氣氛，有種同自己珍惜嘅人睇煙火嘅時光一瞬即逝嘅感覺。小編都好鐘意依首歌！而第8位《フリージア》係2017年新番《機動戰士高達 鐵血的孤兒》第二季嘅OP，第9位Perfume嘅《Tokyo Girl》亦係日劇《東京白日夢女》嘅主題曲，第10位Lisa《Catch the Momemt》就係動畫劇場版《刀劍神域-序列爭戰-》主題曲，睇嚟香港都有唔少日劇迷同動漫迷呢！
去到最後順帶一提，KKBOX 2017日本地區最受歡迎嘅歌曲頭三位都係英文歌，第1位係Ed Sheeran《Shape of You》、第2位係Austin Mahone《Dirty Work》、第3位G-Eazy & Kehlani《Good Life》。而日文歌就分佈於第4-10位，其實依家嘅日本人係咪比較少聽日文歌嘅呢？希望日本樂壇可以繼續壯大，都讓我地香港fans可以繼續支持J-POP。
© 2016 「君の名は。」製作委員会
About Post Author
