嚟自沖繩嘅人氣樂隊ORANGE RANGE於4月15日晚上喺九展開騷紀念結成15週年。今次係佢哋時隔三年再喺香港開show，雖然係公眾假期不過仍然成功聚集滿場香港歌迷！佢哋仲唱咗多首經典歌曲，例如「以心電信」、「LOCOLOTION」、動畫《BLEACH》主題曲「＊～米字鍵～」、「路標～a road home～ 」、電影《電車男》主題曲「愛的大行進」等。
三位主唱一直超high帶熱香港觀眾，仲大笑雖然佢哋唔識廣東話同英文，而且日文都講得唔係好好，所以希望用音樂去團結大家，傳達心意畀大家。主唱HIROKI就話一諗到佢哋創作嘅歌曲可以喺跨越海洋嘅另一邊、喺香港歌迷嘅人生中有聽過佢哋嘅歌，帶過回憶同影響畀大家，佢就覺得好感動。
低音主場RYO就表示其實有擔心過喺香港開live會唔會有人嚟，但見到咁多歌迷出現，而且live嘅時候非常投入畀反應佢哋，真係令佢心存感激。
而最high嘅主唱YAMATO都同大家約定，只要大家繼續支持佢哋，佢哋一定會再返嚟香港演出，而佢哋亦會繼續為下次可以再嚟公演努力！貝斯手YOH就話見到各位歌迷嘅笑容都好開心，希望大家好好enjoy今次嘅公演。
今次演出全場最high莫過於佢哋大唱「上海Honey」同「太陽無用」嘅時候，真係全場都舉手跳起兼大合唱。另外佢哋Encore演唱《藉著雨點說愛你》主題曲「花」嘅chorus時更加放下咪高峰，令歌迷紛紛高呼合唱。
Encore完結後粉絲不捨繼續高呼，更打動到ORANGE RANGE成員破例再次上台額外演唱《小姐！請你給我愛》！真係非常圓滿嘅一次live呀！
About Post Author
