身為一個初中雞時代已經日日聽JPOP嘅90後，一開始得知有機會專訪Orange Range嘅時候我係非常喜出望外，腦入面自動播放「イケナイ太陽」、「上海ハニー」等聽咗差不多10年嘅經典快歌。出道15週年巡迴演唱會，呢隊沖繩男子並冇將香港樂迷忘記，繼3年前滿場嘅live之後佢地再次踏足呢個比沖繩更南更潮濕更熱嘅城市，再次同香港粉絲相聚。
Anne：恭喜你哋結成15週年！可否分享下感想呢？
RYO：其實15年真係過得好快，而喺呢一年入面我哋有機會做咗好多訪問，畀咗好多機會我哋回首過去，諗起好多回憶同點滴，係非常有意義嘅。
Anne：咁你哋回首過去，有冇咩最難忘嘅事，或者係最令你地開心嘅事？
RYO：例如喺香港睇海景，其實我哋每次出國喺異地開live都非常開心，每一次都係非常難忘嘅回憶。
[圖左起：（吉他）NAOTO、（高音主唱）YAMATO、（中音主唱）HIROKI、（貝斯）YOH、（低音主唱）RYO]
Anne：之前有個日本電視節目入面有個Ranking，就係最代表20代（20～29歲）嘅年青人嘅搖滾樂隊，第一位就係Orange Range喇！無論你哋嘅快歌定慢歌，好多經典作品都真係陪住我哋成長嘅。你哋自己又最中意邊首歌？
HIROKI：其實全部都係我哋嘅作品，真係好難揀呢，我哋首首都好中意。
YAMATO：係呀，都係我哋可愛嘅作品。
Anne：係咪真係好似自己啲親生仔女咁，揀唔到呢？
HIROKI：就係囉。
Anne：呢個係我喺YouTube見到嘅日本歌迷留嘅comment，就係話細個聽你哋嘅歌單純覺得好high好好氣氛，大個先發現啲歌詞原來有啲性暗示～你哋創作歌曲時係特登定係無意架？
HIROKI：（笑）係呢，我哋都幾隱約咁包裝啲歌詞，因為其實我哋以前聽歌都係，大個咗先知到原來有唔同嘅意思。咁都想喺自己嘅作品都加上呢啲特色，都算係一種樂趣。
Anne：多謝你哋再次嚟香港呀！你哋上次係2014年嚟，3年後再嚟呢度有冇話想做啲咩，同埋你哋最中意食香港嘅咩呢？
HIROKI：其實我哋食咗好多好好食嘢，都唔記得自己食咗啲咩。
YAMATO：有冇咩係你推介嘅香港嘢食呢？
Anne：竟然係咁！一般人一定會推介點心同飲茶，我就更加推介地道美食，例如蛋撻同奶茶！香港奶茶真係好好奶茶飲架！咁你哋身為沖繩之光嘅樂隊，如果香港歌迷去沖繩旅行，你哋會推薦咩畀佢哋呢？
YAMATO：海呢。沖繩嘅海好靚。
RYO：我推薦琉球玻璃，可以整做杯，可以留下實體回憶，非常好。
YAMATO：仲有好多美食，有苦瓜雜炒、沖繩Soba、豆腐雜炒、泡芙雜炒、素面雜炒…
RYO：全部都係雜炒（笑）
YOH：仲有沖繩特色墨西哥飯
YAMATO：都好好食呢！
今次有機會訪問呢隊咁型嘅樂隊，小妹真係非常緊張又doki doki。甚至出現蝦碌鏡頭，反而嘅身旁主唱之一嘅RYO就好溫柔提點我TwT 仲有YAMATO同HIROKI真係好好笑同好活躍，望住佢哋真係衷心覺得佢哋結成15週年，創作咗咁多首膾炙人口嘅各種歌曲真係好美好嘅一件事。
RYO都話，聽佢哋嘅歌同真係去睇佢哋嘅live係非常唔同嘅感受，因為視覺上佢哋都好精心準備好多嘢俾歌迷，同埋佢哋現場嘅表現係CD聽唔到架！所以如果想感受佢哋嘅live，聽日（4月15日）就去九龍灣展貿E－Max睇佢哋嘅演出啦！
香港站演唱會「ORANGE RANGE LIVE 017 カーニバル EXTRA〜香港 DE カーニバル〜」
日期：2017年4月15日（星期六）
地址：九龍灣E-MAX
時間：進場時間為下午7時30分，開始時間為下午8時
鳴謝：場地提供－富豪東方酒店
About Post Author
