雖然要數富野由悠季既作品，『機動戰士高達』系列絕對係第一套代表作。不過對於有返咁上下年紀既動畫宅嚟講，要數富野嘅經典，絕對無可能唔數1980年5月8日首播嘅「全滅傳說」『傳說巨神 伊迪安』。
首先講講富野由悠季呢個人既作風大致分為兩種: 而家後生既動畫宅會接觸到佢既作品，除咗『機動戰士高達』系列以外，相信都係『Brained Powered』、『帝皇戰紀』、『麟光之翼』。呢幾套再加埋『∀高達』同最新『G復國運動』，都被稱為「白富野」作品(個人認為『戰鬥機械 Xabungle』都算喺入面)，作風光明同「溝溝地」。
但一同老一輩機械人粉絲提起富野，『聖戰士昆霸』、『無敵超人珍寶3』、『傳說巨神 伊迪安』等等而家只剩番老一輩機械人fans先認識既作品，由主要人物以至路人及主角的寵物，去死領便當的理由可以由壯烈犧牲，以至離奇遭殃、毫無先兆，總之死法應有盡有，包羅萬有——所以富野由悠季有個殺氣十足既稱號叫「皆殺之富野」。
「黑富野」的作品中充滿著悲傷而對戰爭厭倦，同時現實卻又必須通過戰鬥來撐過，充滿著矛盾同無奈。1980年於日本開始播放既『傳說巨神 伊迪安』更係當中既俵俵者：一群地球人來到殖民星索羅星，遭遇到異星文明巴夫克蘭人，因為雙方發生咗重大既誤會，令巴夫克蘭人同地球人正式開戰。
殖民星上既地球人遭到攻擊。咁啱地球人又掘咗架巨大機械人伊迪安出嚟，主角為咗自衛就同朋友一齊坐上去……去到呢度其實仲算幾老套，但係當大家以為係一套圍繞主角既冒險劇時，各種各樣既野心再加上伊迪安既能源伊迪之力——無限力隱藏住既謎底陸續解開，成為一套機械人群像劇。
迫於無奈依靠伊迪安保護自己既主角群，面對接踵而來既悲傷仍然要奮鬥阻止下個悲劇，直到最後都無放棄。不過伊迪安同伊迪之力最後並無因為佢地既努力而再比一次機會人類: 會隨著人類情緒而增大輸出既伊迪之力，喺最後既大戰過分發揮伊迪安既力量而暴走，令無限力毀滅咗一切。如此努力地抵抗命運既主角無法得到回報，簡直係反映殘酷既現實。
更淒厲既係伊迪發動之前，主角努力想保護既細路、女角有大半一早已經被敵人捉住慘殺，當中有幼女更加係「斷頭」，到今時今日仍然係動畫宅心入面既「傳說」。又有個女仔喺最後一集面臨滅亡崩潰，爆出遺言金句「一齊變做星星罷啦!!」…考慮到o個個時代機械人動畫主要都係為咗向小朋友賣玩具，原定43話既TV版結果39話就比人腰斬，但係非常多死忠話想睇真正結局，結果真係出埋總集篇劇場版添。
About Post Author
