今日（6月11日）係永遠的女神新垣結衣（又稱結衣BB）嘅生日，一齊祝新垣結衣生日快樂！出身自沖繩嘅結衣BB於13歲時代替姐姐參加日本人氣少女時裝雜誌《nicola》嘅模特兒甄選，結果得到最優秀獎，從此踏足演藝界。
2005年從雜誌畢業後開始參與電視劇演出，一開始係深夜特攝劇《sh15uya》，同年與新生代人氣演員山下智久、長澤雅美、小池徹平等出演阿部寬主演劇集《龍櫻》開始受到關注。
2006年結衣BB同戶田惠梨香及一眾青春女演員出演藤木直人主演電視劇《辣妹掌門人》，之後更加於《My☆Boss My☆Hero》中飾演主角長瀨智也同班清純女同學而開始引起話題。
▲笑定喊都咁完美，點算好？
當年佢更加推出第一本寫真集《水漾☆青春》，開始奠定清純女神地位！
2006年尾，結衣BB擔任Pocky代言人，全國都播放佢極青春活潑嘅廣告，人氣急升。
（延伸閱讀：2000年～歷代出演Pocky廣告藝人一覽）
2007年，一套日式純愛電影《戀空》令結衣BB嘅名字打入全亞洲市場，同時令佢得到多個電影新人獎獎項。佢亦獻唱電影中插曲「Heavenly Days」，當年正式以歌手身份出道，亦成為日本發片後最快登上武道館演唱嘅女歌手。
同年亦拍攝日劇《父女七日變》，再一次以青春水手服校服look迷倒觀眾。
2008年，結衣BB再次與山下智久、戶田惠梨香結緣，出演人氣話題醫療劇《Code Blue》。因為受觀眾歡迎，《Code Blue》唔單止拍埋宣傳特別版SP，之後更加於2010年推出第二季。唔駛我多講，相信大家都知今年夏天佢哋時隔7年終於再聚，拍攝第三季！可見呢套劇集真係有幾受歡迎！
（延伸閱讀：山下智久、新垣結衣、戶田惠梨香三劍再次合壁拍Code Blue 3！、2017年夏季日劇資料大全）
2009年，結衣BB同偶像組合《嵐》嘅松本潤拍攝《Smile》，飾演失聲少女，要靠大量肢體語言及表情去交戲，最後更獲得助演女優獎。
▲雙馬尾造型真係無得輸呀～
2010年，結衣BB同J家實力派男演員生田斗真拍攝純愛電影《花水木》，由高中生演到成為大人。
呢套電影以北海道為首，走訪到加拿大、紐約等地取景。佢亦都為電影翻唱女歌手一青窈嘅經典歌曲《花水木》。另外，電影入面佢拎住嘅繪本《The Three Little Pigs》亦係佢自己親手繪畫嘅作品，最後亦都推出成為書籍！
2011年，佢參與阿部寬主演嘅《新參者》劇場版電影，係繼《龍櫻》之後再次合作。同年，佢同錦戶亮合拍《全開女孩》，首次飾演律師角色。拍攝此劇後結衣BB更加同錦戶亮傳出緋聞，被周刊影到互相去對方屋企約會。當時令一眾粉絲心碎一地呀～
2012年，同超級實力派演員堺雅人拍攝超人氣律政劇集《Legal High》，飾演被古美門大律師笑稱為「晨間劇女主角」、正義感滿瀉嘅女主角黛真知子。除咗有大量喜劇成分，又長又翹口嘅對白亦都難唔到結衣BB，再次令觀眾眼前一亮！
▲搞笑得來毫不造作，真係豁左出去（笑）
同年，佢同型男綾野剛共演《公關室愛情》，飾演倔強有熱誠、從新聞部被調去情報局嘅女主角稻葉里佳。
2014年，於向井理主演嘅電視劇《S－終極警官》中飾演狙擊手，亦係警視廳特殊部隊NPS入面唯一嘅女性隊員。
2015年，再次與岡田將生合作拍攝日劇《掟上今日子的備忘錄》，飾演一瞓著就會失憶嘅銀髮眼鏡娘偵探，可愛造型萌倒一眾觀眾。
2016年秋季，第四次主演電視劇《逃避雖可恥但有用》，飾演25歲待業中嘅森山實栗，與星野源飾演嘅35歲IT男津崎平匡實行契約結婚並最終愛上對方。呢套劇應該唔駛我多講，大家都知佢有幾咁人氣啦！不論係實栗愛幻想嘅鏡頭，定係片尾結衣BB大跳戀愛舞，都令觀眾留下深刻印象～！
（延伸閱讀：為宣傳《逃恥》去到幾盡 四大報齊登全頁抱抱照宣傳DVD）
除咗依家幾乎每隔個禮拜都會見到結衣BB嘅新廣告之外，佢亦都同瑛太合拍乒乓球愛情喜劇《Mix。》，淨係睇預告都已經好想快啲睇套戲喇！
希望超級大忙人結衣BB喺為我哋帶嚟精彩作品嘅同時都保持身體健康，同埋即使可能會令無數男粉絲崩潰，但都希望佢早日搵到佢嘅幸福！結衣BB，生日快樂呀！！
About Post Author
