島根縣除咗海鮮出名美味之外，其實和牛「島根和牛」都非常好食～！胃食島根今次同大家去有得用BBQ嘅方式食島根和牛同免費試飲多款酒嘅葡萄酒莊「島根ワイナリー」，一邊嘆紅酒一邊食島根和牛！
「島根ワイナリー」係一間葡萄酒莊，由出雲大社坐車只需要5分鐘，入場費免費，除咗有紅酒廠同紅酒製造過程有得參觀之外，仲有得買有得飲有得食，為咗唔想大家空肚飲酒易醉，首先同大家去食餐飯先！(笑)
酒莊內嘅燒肉店「彌堡山」係一間和牛BBQ餐廳，有多款和牛set，價錢為2,000Yen至4700Yen不等，用嘅和牛全部都係島根出產嘅名物「島根和牛」。
難得嚟到就緊係要叫個最豪華嘅沙朗島根和牛套餐啦（4,644Yen連稅）！ 除咗有島根沙朗和牛之外，每個餐都會跟飯，野菜，同一杯野飲或紅酒㗎！
島根和牛嘅顏色比較鮮豔，肉質細膩，脂肪分佈平均，風味濃郁，一入口，肉味即刻佈滿喺口入面。
比起其他牛肉，島根和牛濃郁嘅風味喺口中會停留得更長久，口感更加柔軟，食落唔會比人有好滯好油膩嘅感覺，加埋醬汁或者鹽一齊食美味程度真係可以食十碗飯，所以一定嚟試下只有島根先食到嘅美味島根和牛阿！
食飽飽之後就去飲下紅酒啦～
喺「彌堡山」行大約30秒就到嘅葡萄酒館「巴克斯」，有10款免費島根葡萄酒試飲放題，種類由紅到白，甜到乾都有，另外有為唔飲得酒的客人提供都有不含酒精成份飲品，一家大細都啱去㗎！
如果想試飲呢10款酒，方法就係葡萄酒倒入喺店內可以拎到嘅依個杯仔就得，而且因為無時間限制，所以可以慢慢試酒嘅味道。
如果唔夠喉仲想飲多幾杯（笑），可以去依個酒吧用平價享受到高級紅酒，價錢為100Yen至700Yen一杯，如果合乎你口味仲可以買返屋企自用或者做手信添！
島根ワイナリー
地址：島根県出雲市大社町菱根264-2
試飲銷售館巴克斯
營業時間：
[4月～9月] 9:30～18:00
[10月～3月] 9:30～17:00
彌堡山
營業時間：
[6月～9月] 10:30～19:30
[10月～5月 ]10:30～18:30
LAST ORDER：關門30分前
官方網站：https://www.shimane-winery.jp/
其他設施請參照官方網站中文版PDF：
https://www.shimane-winery.jp/wp/wp-content/themes/winery/pdf/chaina.pdf
————————
島根和牛介紹
島根和牛係喺豐富嘅土地中成長，用大麥同玉米等優質穀物飼料跟餵食，符合一定嘅規格的牛先可以以「島根出生同成長」嘅「島根和牛」去出售。過去仲被品評會被選為全國第一名同多個獎項，係全國人氣和牛之一！
島根美味和牛店3選！
島根和牛ご縁ライスバーガー (島根和牛結緣米漢堡)
除咗「島根ワイナリー」之外，島根縣都仲有好多地方可以食到美味嘅島根和牛。首先如果想簡單輕鬆食島根和牛嘅就一定要去「島根和牛ご縁ライスバーガー」(島根和牛結緣米漢堡)，依到嘅肉除咗係用島根和牛之外，亦都用島根出產嘅米代替麵包，再加上用咗幾種唔同調味料去整嘅特製燒肉醬汁，令島根和牛更有風味，食一次之後就會愛上！大家喺店買即食又得，買冷凍裝拎返屋企叮嚟食都得㗎！
絆屋 島根和牛ご縁ライスバーガー (島根和牛結緣米漢堡)
地址：島根県出雲市大社町杵築南861-1 (出雲大社 神門通り)
營業時間： 10:00～16:00
島根和牛結緣米漢堡：1個500Yen
官方網站：http://nikou.noomise.com/
————————
另外兩間餐廳，都係喺飼養和牛地開嘅，因為接近出產地所以可以對來源感到安心，而且係當地無人不知嘅餐廳～可以順便一邊揸車一邊親近大自然添！
肉料理 たたら
由松江市玉造温泉揸車大約1個鐘距離嘅「肉料理 たたら」係由當地超級市場嘅精肉店所經營，除咗平價之外，量多又好食，所以吸引好多人去食！大家可以試下佢哋嘅「島根和牛燒肉定食」（1,500Yen），柔軟又多汁嘅島根和牛加名牌米「仁多米」真係好好食㗎～！
「仁多米」係好出名嘅名牌米。相對被譽為「東之横綱」嘅新潟縣魚沼出產越光米，「仁多米」就係被譽為「西之横綱」嘅高級米。
肉料理 たたら
地址：島根県仁多郡奥出雲町下横田128-6
營業時間：11：30～13：00／17：30～20：30
逢星期三休息
網站：https://www.okuizumogokochi.jp/4081
————————
ステーキハウス 萌美野 (Steak House萌美野)
另外一間係位於去廣島嘅國道５４號線途中會經過嘅「ステーキハウス 萌美野」，亦都可以食到叫「奥出雲和牛」嘅牛扒，奥出雲和牛係島根和牛其中一個種類，係一步一步、悉心培育之下於大自然中成長，亦喺日本嘅和牛品評會當中得到多個獎項。而餐廳就正正就位於飼養和牛嘅地方 -「飯南町」，所以又平價又好食！
ステーキハウス 萌美野
地址：島根県飯石郡飯南町上赤名1664
營業時間：11:00～21:00
LAST ORDER：20:30
逢星期四休息
網站：http://www.satoyamania.net/spot/2017/10/post-25.html
——————————-
想知道更多島根縣嘅資訊，可以留意埋下面島根縣嘅Facebook↓
Visit Shimane – 日本島根 (島根縣香港官方Facebook)↓
https://www.facebook.com/visit.shimane.japan/
Discover Shimane (島根縣英文官方Facebook)↓
https://www.facebook.com/discover.shimane/
仲可以Follow埋島根縣的IG ↓
https://www.instagram.com/discover.shimane/
About Post Author
