日本係唔少文具控嘅天堂，精緻而實用嘅各式文具往往叫人忍唔住手。今次就想同大家介紹吓位於福岡市東區嘅Idea Switch（アイデアスイッチ）。佢係一間以「使用」同「創造」為主題嘅小文具店，雖然規模不及鬧市嘅連鎖文具店，但麻雀雖小五臟俱全，除咗日本國內外唔同文具之外仲有商品服務同工作坊，同時亦保存住小店獨有嘅人情味，。
～商品服務篇～
1. Stock Paper Note（ストックペーパーノート）（￥540～）
（官方網頁上嘅實例）
喺屋企有好多廢紙剩？買咗postcard又用唔著？或者儲埋好多包裝紙盒唔知可以點用？Stock Paper Note就可以幫你解決以上煩惱。你可以帶三款紙做筆記嘅封面、內頁同封底，或者喺店內選購素材都得。親臨小店訂購之後佢就會幫你剪裁同釘裝，約一個星期之後就可以收到一本既環保又有個性嘅筆啦！收費按筆記大小、厚度等調節，如果要郵寄嘅話會再另收費，所以訂之前可以選擇先向店主查詢，佢會好樂意解答你嘅問題㗎。
相關頁面：Stock Paper Note官方網站
2. 小童護身符（こまもり）（￥2400）
（官方網頁上嘅實例，左圖為小朋友嘅畫作，右圖就係佢嘅訊息「世界第一嘅爸爸」）
呢個係由群馬縣嘅Grams（有限会社グラムス）所發展嘅服務，雖然而家已經推廣到全國多間文具舖都可以買到商品券，但Idea Switch係第一間同佢地合作嘅文具店。
こまもり意指刺繡住小朋友嘅畫同訊息刺嘅繡護身符，商品券內附小冊子比小朋友畫畫，另外仲有心意卡等，Grams會喺收到大概2星期後就會幫你整好個護身符並寄比送禮嘅對象。當然，店家都好歡迎大人使用呢個服務，趁呢個機會將自己嘅心意傳遞出去。
網頁：こまもり官方網站
～特色商品篇～
3. 騎馬釘用間尺（ナカトジール）（￥380）
（截圖自Amazon）
呢把間尺本身已經好多功能：量度長度同畫直線就當然得啦，仲可以畫波浪線、畫圓、量角度同放大景象。但佢最大嘅賣點，係佢方便自製騎馬釘小冊子嘅設計。佢附有一個凹位，啱啱好放到10號釘（闊8.4mm 高5mm）嘅釘書機，將紙攝入去間尺嘅中間對準刻度，就可以準確咁釘裝。試用片段被Idea Switch放上Twitter後唔夠一星期已經有近40000個Retweets同60000個likes，可見佢有幾咁受網民歡迎！可惜佢只適用於可以攤平嘅釘書機，同埋可以釘嘅厚度唔太夠，只能用於小冊子上。
4. 信封製造機（エンベロープメーカー）（￥1500）
（截自信紙工作坊示範影片）
通常我地都會習慣買信封，但有冇諗過信封都可以自製嘅呢？呢部機有幾個用途：一來可以借用佢嘅特製切割器裁成合適嘅形狀，再用壓線板壓出摺痕，然後就可以整到獨一無二嘅人信封；二來壓線板可以用係信紙上，無色嘅壓線令信上嘅字可以整齊啲，又唔使驚橫線阻住睇唔到啲字。呢部機仲可以整到14種信封㗎，仲有一款啱你心水嘅。
～實用標籖篇～
5. 磁石書籖（マグネットマーカー）（￥460）
（截自官方Twitter）
店家喺Twitter度係咁比喻嘅：就好似山椒咁，呢個磁石書籖雖然細但好有效，可以牢固咁附係頁面之上，但又唔會阻礙閱讀。特別係佢三角形再加上手指圖案，清楚指示返到底要睇邊個位嘅資訊，彌補返普通書籖只能標記你睇到邊頁嘅缺陷。圖案設計唔會過份可愛，無論係男女都咁適合使用。
6. MEMO膠紙（テープノフセン）（￥320）
（截自官方Twitter）
將膠紙同MEMO二合為一嘅就係呢款MEMO膠紙啦。成張都有黏力令MEMO唔會容易唔見，又可以自訂長度，十分方面。雖然市面上都有唔少膠紙可以比客人係上面書寫，不過佢設計小巧簡單，顏色都十分鮮艷搶眼，都充份做到MEMO嘅效果。今年嘅SMAP STATION中都有介紹過呢款MEMO膠紙，喺當地都相當受歡迎㗎。
7. 花瓣MEMO（フラワーメモ）（￥450）
（截自官方網上商店）
以花瓣為藍本而製成嘅花瓣MEMO就好似真嘅花瓣咁，無論係外型定上色都十分精緻，連花脈都做到出嚟。總共有藍、黃、紅三種顏色選擇，每款都有少少透光，將兩種顏色疊埋真係會變色㗎。佢採用嘅描圖紙會對熱度同濕度起反應，所以放張MEMO喺手心會自然地微捲，但擺返喺枱就會回復原狀。而且用鉛筆同原子筆都容易書寫上去，唔係得個靚字㗎。
Idea Switch除左賣文具之外，仲會不定期舉辦唔同主題嘅工作坊比客人預約參加，近排就有信紙套裝嘅工作坊。不過由於預約已滿，所以佢暫時不設預約，有興趣嘅朋友可以再留意吓網站嘅公佈。（按「ネット予約はこちら」即可去到預約頁面）
相關活動頁面：Idea Switch官方網站
另外店主都十分好客，除咗開設Twitter、Facebook同Instagram發佈資訊外，仲提供官方LINE帳戶同客人對話，有任何查詢都可以通過LINE去問。佢仲好窩心咁話搵唔到嘅時候可以打電話去問路，未去嗰時已經留下好好嘅印象。
（小店外觀，截至官方Facebook）
店舖詳情
アイデアスイッチ
地址：福岡県福岡市東区香住ケ丘2-6-12（JR鹿児島本線「九産大前」站步行約5分鐘／西鉄貝塚線「香椎花園前」站步行約10分鐘）
電話：050-3696-0593
官方網頁：アイデアスイッチ官方網站
官方Twitter：アイデアスイッチTwitter
官方Facebook：アイデアスイッチFacebook
官方Instagram：アイデアスイッチInstagram
官方LINE：
About Post Author
