日本作為一個四面環海嘅國家，除左富士山，仲有好多數之不盡嘅名山㗎。而今日就係日本嘅「山の日」，東京鐵塔就聯同明治搞左啲慶祝活動，大派蘑菇朱古力，有得玩又有得食！一齊睇下啦！
8月11號 = 日本「山の日」？
日本官方嘅講法係，「山に親しむ機会を得て、山の恩恵に感謝する」，意思係令國民「得到與山親近的機會，感謝山的恩惠」。日本政府希望籍放假鼓勵市民出門踏青，去欣賞大自然嘅美麗。由2016年起，每年嘅8月11號就被訂為「山の日」，仲被列入國定假日添！
為左慶祝，東京鐵塔就聯同明治搞左幾個相關活動，全部都同「山」有關㗎！
蘑菇朱古力相信大家都食過，由於望落好似一棵細小嘅樹，明治就把握今次「山の日」嘅機會，將節日同蘑菇朱古力連繫！
活動一：大叫贏取朱古力
東京鐵塔今日就舉行左「東京鐵塔蘑菇山計劃」，參加者企係攤位前大叫「ヤッホー」（Yahoo），就可以根據聲量大小贏取獎品。獎品包括大粒裝蘑菇朱古力、2017山之日限量版蘑菇朱古力等，叫兩下就贏到盒朱古力，都幾值得玩㗎！
對準個咪，大聲叫「Yahoo～」！
送出嘅獎品一啲都唔少，呢位參加者目測都拎左兩袋走！
活動二：免費派發冰凍朱古力
除左大叫比賽，主辦單位仲會係東京鐵塔派放雪凍嘅蘑菇朱古力，比大家消下暑。即使唔參加活動，都可以有朱古力食，認真大方！
派出嘅冰凍朱古力一共有兩款，有大粒版，又有山之日限定版本。
仔細睇下呢盒大粒版蘑菇朱古力，上面顯示嘅神祕款式咁熟面口嘅⋯⋯唔通係「蘑茹派」嘅宿敵「竹筍派」？
活動三：行路登上東京鐵塔
東京鐵塔有成332.6米高，要行上去當然唔容易啦！而根據參加者登上嘅高度，可以獲得唔同版本嘅蘑菇朱古力做獎品。例如「きのこの雲取山」、「きのこの高尾山」咁，係日本唔同高度嘅山，幾有gimmick！
唔少人一早就排隊玩遊戲，現場有長人龍！
唔同版本嘅蘑菇朱古力獎品一覽。
雖然活動只進行一日，希望未來幾年會有更多機會舉辦，大家下年可以期待有咩新活動！
きのこの山の日
日期：8月11日
地點：東京鐵塔
時間一覽：
大叫贏取朱古力 10：00-19：00／免費派發冰凍朱古力 無指定時間／行路登上東京鐵塔 10：00-15：30
詳情：http://www.meiji.co.jp/sweets/chocolate/kinotake/cmp/yamanohi/
About Post Author
