太頻繁入境會被拒?日本出入境疑問整理!

太頻繁入境會被拒?日本出入境疑問整理!

 

「太頻繁入境會被拒」、「一年內不得在日本逗留超過90日」⋯大家有無聽過呢啲傳聞呢?即使係經常飛日本嘅人,講起日本出入境嘅規定,可能都仲會有啲地方唔太清楚。我哋為大家整理咗日本出入境嘅常見問題,希望幫到大家解開疑問啦!

港人去旅行 屬於短期逗留 

一般香港人到日本旅行,都是以免簽證的方式入境。根據「在香港日本國總領事館」嘅官方網站,這種觀光性到訪屬於「短期逗留」,定義為:

申請對象是以觀光、短期商務、探訪親屬‧朋友等為目的,短期(90日以內)到訪日本的人士。
(注)在任何情況下,短期逗留並不適用於從事有收入之經營活動或有收取報酬之活動。

不過,官方對於港人短期逗留嘅解釋十分少,並無提到一年內多次到訪、填寫入境表嘅規定,以及有關簽證嘅常見問題等。而根據台灣外交部領事館嘅網站引述,外國人以短期逗留到訪日本時,有一點值得留意:

以免簽證方式入境,單次停留期間過長者,於下次再入境時,容易引起機場境管人員注意。一旦被認定在日有非法工作嫌疑時,將遭到拒絕入境。故倘欲停留較長時日(如探親、短期留學、研修等)或從事觀光以外(如出差、經商、會議、比賽等)活動者,請事先向日本交流協會台北事務所詢問申辦符合該目的之簽證。國人因進出次數頻繁,或單次停留時間過久,而遭日方拒絕入境案例時有所聞。當事人除時間、機票、旅館費等損失外,尚需額外支付警備費,並留下被拒入境之不良紀錄。特籲請國人注意,以免簽證入境日本係屬短期停留許可,倘次數頻繁或合計在日本停留天數超過半年以上等情形,必須有充分理由,以免遭遇困擾。

點先係「次數頻繁」呢?傳聞就指,海關會以入境當日起計,睇番先前一年嘅訪日紀錄。如果逗留日本嘅日數多於180日,就有可能被留低盤問,甚至被拒入境。

太頻繁入境會被拒?日本出入境疑問整理!

解答入境傳聞!記者+Blogger真實經歷

我們向幾位留日blogger詢問,發現佢地有類似經歷,希望比大家作個參考!

1. 短期內經常出入日本會被拒入境?

台灣blogger「日本藥妝研究室(連結)」分享,指自己有兩次差啲被拒入境嘅經驗。佢學生時期果陣,去日本玩45日,順便學日文。因為停留日本時間太長,入境時被帶去「細房仔」傾計,不過講得出日文學校名稱,所以就成功入境。

第二次係去日本採訪,所以要逗留50日。入境果陣,海關懷疑佢非法打工,好彩佢有手機有網絡,搵到在台嘅工作證明,搞左一輪都順利被放走。佢嘅睇法係,雖然日本對外國觀光客基本上好友善,但如果逗留日數長,建議準備定合法理由同動機證明文件,以備不時之需。

2. 無book酒店 寫入境表有麻煩?

對於填寫入境表,記者就有一個經歷可以分享。有次即興去日本旅行,諗住到咗先再搵住宿,所以就無book任何酒店或民宿。寫入境表果陣,就由其寫左間酒店名落去,以為可以順利過關。點知,海關真係check得好嚴,search唔到呢間酒店,就帶我去一邊傾計。幸運嘅係,有間民宿同我寫果個酒店名好類似,海關就以為我英文串左字,幫我改番為正確嘅住址。事後同翻朋友講,佢地都話日本唔expect大家未預約住宿就去旅行,而airbnb又係違法嘅民宿,所以要小心啲。如果有同樣情況,最好寫翻啲出名嘅酒店名,減少被拒入境機會。

另一個例子,就係記者一位外國朋友嘅經歷。由於佢有日本當地朋友,所以自然地靠晒朋友plan行程同book酒店,自己完全唔記得行程嘅details。而當呢位外國朋友填寫入境表果陣,佢就由其寫個住址,於是被海關截停,傾左好耐都搞唔掂。好彩果位日本朋友有嚟機場接佢機,海關就叫佢入嚟解釋,經過一輪溝通,最終先入到境。

太頻繁入境會被拒?日本出入境疑問整理!

3. 入境原因唔夠說服力 即使日本人都可能被拒?

日本海關對於入境原因好執著,會問得好清楚先比你入境。曾經有個跨國couple嘅case,日籍男朋友為咗陪外國女朋友,特登由日本搭飛機去外國接佢,再一齊飛翻日本。入境果陣,果位男朋友照實講呢個理由,卻被海關截停,因為得入境理由有古怪。類似case喺網上都搵到唔少,所以話即使係日本人,都未必可以好順利咁入到境㗎!

4. 即使係去公幹 都係講去觀光會好啲? 

如果你有用過公幹呢個理由入境,相信你都會好認同!如果以公幹名義入境,日本海關會要求你出示足夠嘅證明文件,並且check得好清楚,先放人入境。由於呢個過程實在太費時間,部分人即使係公幹,都會話自己去觀光,免得要被截停傾計。

5.  一年內經常出入日本 會被盤問?

另一位blogger「大塚太太東京在住中(連結)」就指,有朋友有相關經歷。果位朋友純粹為咗旅行,連續咁去大阪、東京、福岡等地方,日本海關就擔心佢以旅遊為名做非法工作,將佢留低盤問。除咗叫佢講出plan好嘅行程,細問所有食住安排,仲打開行李檢查。果位朋友完全嚇親,唔敢再去咁頻繁去日本,而家三個月先去一次,入境時就無問題啦。

太頻繁入境會被拒?日本出入境疑問整理!

最後,我地亦有向日本駐香港領事館查詢,經各部門的領事確認後,佢地嘅回覆係:

問:(如果持香港護照有效期不足半年,而急需到訪日本,可以有什麼對應方法?)

日本政府只要求香港特別行政區護照持有人持有有效護照進出日本,並沒有“六個月有效期的限制”。請明白本電郵回覆並不保證旅客一定能入境日本的,旅客能否入境日本,仍需視乎日本入境官員對個別旅客作出之入境申請的審查結果而決定。

問:(到日本短期逗留,如果想以公幹為出境理由,需要準備什麼證明文件?)

如旅客是香港特別行政區護照持有人,赴日目的為觀光、探親訪友或短期商務等短期逗留,而逗留期間不超過90日的情況下,可免簽證到訪日本。不過在任何情況下,短期逗留並不適用於從事有收入之經營活動或有收取報酬之活動。日本政府並沒有強制性要求旅客必須持有何種文件才可通過入境審查,如您認為帶同任何相關文件,可有助通過入境審查的情況下,您亦可自行帶同相關文件前往日本。

香港唔少人成日去日本,去到好似翻鄉下咁~如果你都係經常遊日人士之一,就記住要plan好行程,帶定啲相關資料之入境,以免比人留低傾計嘛!