喺8月21號播出嘅日本晨早節目羽鳥慎一Morning Show入面，提到酒店會將沒有放入垃圾桶嘅物品當成客人嘅失物而保管處理，如果可以嘅話希望客人可以幫幫手，引起遊日愛好者熱烈討論。
討論源於一個Twitter Post
討論嘅開端係Twitter上一篇有關日本酒店從業者嘅請求。內容提到酒店會當失物處理，除咗有貴重物品同電子產品，仲包括其他唔係放喺垃圾桶入面嘅嘢，例如放喺檯面嘅紙、收據；放喺地下飲咗一半嘅飲品等等。工作人員仲會詳細記錄房間號碼、發現時間、客人資料等嘅資訊，令喺繁忙時期嘅工作百上加斤。於是Po主就向大家請求：「如果大家可以將唔要嘅嘢放入垃圾桶，咁就好喇！」
以下係從業者所描述嘅現況：
基本上喺房間搵到貴重物品同電子產品會同貴客聯絡，不過除此之外嘅物品，為咗以防萬一有客人問及，所以會保管。 當我地以為酒店會掉走物品嘅時候，酒店其實會幫手保管住好多嘢。
特別多嘅物品包括：
-未飲哂嘅膠樽
-放喺雪櫃嘅啫喱、乳酪
-淨返少少嘅洗頭水、沐浴露樽仔
-使利店嘅收據 Coupon或者宣傳單張
-襪
保管嘅時間同埋會唔會聯絡會視乎酒店而有所唔同，一般係幾個月，甚至以年計，食品亦都會保管幾日。
另外掉水樽嘅時候，如果可以倒咗入面嘅飲品先就好喇。不過喺客人匆忙嘅時候就咁放喺垃圾桶旁邊，我地就會諗「哦～個樽放唔入垃圾桶」而判斷佢係垃圾同掉咗佢。
當然，以上所講嘅並唔係強制嘅。
清理垃圾當然係清潔人員嘅工作，管理失物亦係工作人員嘅工作。即使放咗（膠樽、紙張等）係度，我地都唔會覺得佢係一位令人討厭嘅客人。只係如果你可以幫手將垃圾放入垃圾桶，我地就會諗「呢個客真係好人喇！」而覺得好開心架^^ <3
個post一出，酒店業嘅員工紛紛表示贊同，而且仲多謝po主寫呢個po出嚟，令多D人知道件事。短短幾日就有幾萬個Likes同Retweets，令到個po成為大熱話題。
酒店點解要當垃圾係失物保管？
到底點解酒店要將除咗垃圾桶以外嘅所有嘢當成失物而保管處理呢？節目就去咗訪問酒店負責人。其中Hotel Route Inn嘅東京地區負責人吉本弘示先生就話：「對貴客嚟講係貴種物品定係垃圾，我地係分唔到嘅。」而APA酒店（新宿御苑店）嘅負責人村田紘嗣先生就話：「就算係飲淨嘅嘢，都有可能對貴客嚟講係重要嘅、寶貴嘅嘢。」酒店網站對打掃程序嘅說明亦都話會清理喺垃圾桶入面嘅垃圾；有網站甚至詳細寫埋失物嘅種類同保存期，以及保存期過咗之後會拎去警局等等，講得非常清楚。
遊日住酒店 垃圾點處理？
去日本旅行嘅時候，有無諗過垃圾到底放邊、點放呢？我地都知道日本有垃圾分類，但係酒店嘅垃圾桶通常又得一小小個…到底點樣做，先唔會為人帶嚟麻煩呢？有台灣網民就話，佢地會帶定垃圾袋，將大型垃圾（例如外賣盒）同埋可以回收嘅嘢分類放入袋，再喺袋上面用紙條標明「垃圾」（日文：ゴミ），然後放喺垃圾桶隔離。
垃圾分類回收嘅工序其實酒店工作人員都會做好，所以唔駛太擔心。不過為咗唔好增加工作人員嘅額外工作，大家有時間，酒店check out果陣可以幫幫手check下自己係唔係已經將所有垃圾放入垃圾桶。
About Post Author
