想體驗日本人生活?去綜合超市 ItoYokado!

想體驗日本人生活?去綜合超市 ItoYokado!

唔知大家知唔知,日本有間創立於1920年嘅老字號連鎖綜合超市ItoYokado?其實ItoYokado同日本7-Eleven、赤ちゃん本舗、LOFT等等店舖一樣,全部都係來自日本零售巨頭SEVEN & i Group。一齊睇吓ItoYokado嘅超級市場有咩特別啦!

 

「綜合超市」是甚麼?

GRAND TREE武蔵小杉

上面提到,ItoYokado係一間綜合超市。所謂嘅「綜合超市」,即係除咗超級市場之外,仲有衫褲鞋襪、家庭用品、生活雜貨等等賣場,簡單嚟講就係衣食住行樣樣都包晒~去一間綜合超市就能夠打點晒日常生活所需,唔怪之ItoYokado會出名到日本平民無人不知咁犀利啦!今日小編嚟到ItoYokado嘅GRAND TREE武蔵小杉店,行吓佢個又大又靚嘅超級市場。想體驗日本嘅平民生活?一於跟住我地去ItoYokado逛逛啦!

———————————-

ItoYokado超級市場各區介紹

1.杯麵專區+即食麵專區

杯麵

蔦 杯麵

去得日本旅行,點可以唔去超市睇下有咩杯麵好買啊?杯麵專區嘅杯麵種類多不勝數,另外仲有SEVEN & i Group自家品牌SEVEN PREMIUM同其他麵家合作推出嘅杯麵,例如最近喺香港好hit嘅「SEVEN PREMIUM 蔦 醬油Soba」(278日圓 連稅)、辣得嚟豆腐非常足料嘅「SEVEN PREMIUM 蒙古タンメン中本 豆腐湯杯麵」( 183日圓 連稅)都可以喺到搵到。即食麵專區除咗有豬骨、醬油味即食麵之外,又有啲期間限定嘅即食麵,例如小編當日見到包裝超得意嘅「エースコック即食雲吞麵 5包裝」(375日圓 連稅),啱晒做手信!
———————————-

2.零食專區

薯片

SEVEN PREMIUM薯片

旅行途中想食零食,就一定要嚟掃貨先得啦~餅乾、曲奇、薯片、薯條…講得出(同講唔出)嘅都有!如果你同小編一樣,鍾意食紫菜味薯片的話,可以試吓依包「SEVEN PREMIUM 厚切鹽味紫菜薯片」(213日圓 連稅),厚切薯片薯味特別濃郁~小編又發現咗盒數量、期間限定嘅「動感百貨公司曲奇」(756日圓 連稅)。動感百貨公司?冇錯啊!就係喺日本超出名嘅漫畫(你懂的w)入面出現嗰間百貨公司!其實動感百貨公司係以ItoYokado為原型設計出嚟㗎,盒曲奇咁得意真係手快有手慢冇啦~
———————————-

3.壽司專區

itoyokado 壽司

 

想體驗日本人生活?去綜合超市 ItoYokado!

壽司專區唔止有壽司,另外仲有各款魚生飯,款款都好吸引㗎~依到嘅壽司係用日本國產米製作,飯粒煙韌有咬口。店員會經常根據賣場嘅販賣情況即場製作壽司,幾時都可以提供到啱啱整好嘅壽司畀大家,確保新鮮安全~

———————————-

4.串燒專區

itoyokado 燒雞串

itoyokado 燒雞串

想食雞串,唔一定要去居酒屋同餐廳,喺ItoYokado都有好多雞串賣㗎!依到嘅串燒係喺店內製作,食落可以媲美餐廳嘅現烤串燒,好正啊~小編當日去到見到有十幾種串燒,例如香蔥雞脾肉串燒、醬汁雞肉棒、蕃茄豬肉卷等等,價錢大約百幾円一串,啱晒買返酒店做宵夜~
———————————-

5.油炸食品專區

itoyokado 油炸食品

itoyokado 炸豬扒

香港嘅超市好少會有咁大個油炸食品專區喺到任你揀,所以小編一嚟到見到有咁多天婦羅同吉列食品,真係好興奮!炸蝦天婦羅金黃色香噴噴,吉列豬扒仲大塊過小編個拳頭,好抵食啊~其實只要買幾款炸物,加個白飯或者烏冬就已經好豐富,小編嘅日本人朋友都好鍾意咁食㗎~大家喺超級市場買咗壽司、雞串、天婦羅等等餸菜之後,可以拎去food court到坐喺到慢慢食,係咪好方便呢~
———————————-

6.水果專區

sweet king 士多啤梨

itoyokado 水果糖度

嚟到水果專區,就一定要講吓依個「Sweet King」系列水果啦~「Sweet King」系列水果係ItoYokado嘅原創水果品牌,只有得到ItoYokado認證、經過特別嚴選嘅時令水果先可以納入去「Sweet King」系列水果到,絕對有有品質保證。另外ItoYokado每日都會安排專人測量同標示水果糖度㗎!

———————————-

7.蔬菜專區

顔が見える食品

顔が見える食品

「看得見樣子的食品。」系列(「顔が見える食品。」)係ItoYokado同一個個生產者攜手合作創立嘅自家品牌,致力於提供安心、安全又好味嘅商品畀大家。系列入面嘅蔬菜、肉類、水果、雞蛋、魚等等包裝上面,都印有生產者個名、肖像同QR Code,等大家可以了解到依樣食品係邊個、喺邊到同點樣製作出嚟,大大拉近消費者和生產者之間嘅距離!「看得見樣子的蔬菜。」系列商品全部都係日本國產農作物,而農作物上面嘅農藥同放射性物質含量仲要經過嚴格嘅審查,先可以放喺賣場出售,所以大家可以安心食用啦~

———————————-

8.肉類專區

itoyokado肉類

itoyokado 肉類

肉類專區除咗有啱啱介紹過嘅「看得見樣子的食品。」系列肉類之外,仲有好多高級日本國產和牛,雪花分布平均,睇到人流晒口水!如果想自己喺旅館整燒肉,可以直接買碟燒肉拼盤,入面有齊牛肉同豬肉嘅唔同部分,買一碟就搞店,好方便~
———————————-

9.雪糕雪條專區

itoyokado 雪糕

SEVEN PREMIUM 雪條

最近天氣愈來愈熱,最啱就係食雪糕雪條消暑啦~依到除咗有各大雪糕品牌,例如Häagen-Dazs™嘅雪糕之外(有時仲會有日本期間限定版㖭!),仲有SEVEN PREMIUM嘅雪條,例如「SEVEN PREMIUM 濃厚可爾必思雪條」(108日圓 連稅)、「SEVEN PREMIUM 杏仁朱古力抹茶雪條」 (192日圓 連稅)等等。小編特別向鍾意食水果嘅朋友推介「SEVEN PREMIUM 芒果冰雪條」(140日圓 連稅)、「SEVEN PREMIUM 奇異果冰雪條」(140日圓 連稅)同「SEVEN PREMIUM 蜜瓜冰雪條」 (149日圓 連稅),依啲雪條嘅口感好似就咁將個水果冰起咗咁樣,好fresh~

———————————-

ItoYokado

其實ItoYokado除咗超級市場好行之外,衫褲鞋襪、家庭用品、生活雜貨等等賣場都一樣好好行㗎!另外ItoYokado亦有免稅服務,只要於購買當日帶埋護照、收據同你買咗嘅商品前往免稅手續櫃檯或者服務櫃檯,就可以辦理退稅手續啦(詳情請向店員查詢)。下次再同大家介紹啦~

———————————-

快啲click入以下網址了解更多店鋪資訊啦!

ItoYokado 官方網站(繁體中文)
ItoYokado 官方facebook(繁體中文)

GRAND TREE武蔵小杉店
地址:〒211-0004 神奈川県川崎市中原区新丸子東3-1135-1
營業時間(ItoYokado):
1F:10:00~22:00
3F、4F:10:00~21:00
每月8日、15日、18日、25日、28日、星期六日及公眾假期:1F :9:00~22:00