好多人通常去到日本旅行，都係去東京，大阪，北海道等等比較大嘅城市，
唔知大家又有冇去過日本山形県嘅鶴岡呢～
比起多人嘅大城市，山形県鶴岡比較多日本歷史文化嘅建築物，
同時可以感受一下大自然，今日就同大家介紹下山形県鶴岡有咩玩啦～
（文末仲會推介一個旅遊Apps LocoBee，下次去旅行唔知有咩玩可以download定！）
第一站我哋嚟到「龍澤山 善寶寺」，
係平安時代一位叫「妙達上人」嘅高僧去到依到將寺廟改名為「龍華寺」而開始，
再喺室町時代一位叫「太年淨椿蟬師」再改名為而家嘅「善寶寺」～
而善寶寺主要係守護海，所以有好多漁業界嘅人都會去拜㗎～
行入去就會見到好多唔同嘅細寺廟喺入面，仲有條好長嘅樓梯可以俾你行上去～
再入到寺廟入面，僧人都同我哋介紹好多關於依間寺廟嘅歷史，
而今次我仲有機會可以食到佢哋嘅粥同豆腐，雖然睇落好似好簡單普通，
但佢哋嚟講每食一樣野都有唔同意思㗎～
而且仲可以體驗到座蟬，打大鼓同埋參觀寺廟入面各個地方，感受日本唔同嘅歷史文化～
第二站我哋去到「出羽三山」去體驗山伏嘅修練，
「出羽三山」係月山，羽黑山同湯殿山3個山嘅總稱，
當時係第32代祟峻天皇嘅皇太子帶住三腳靈烏去到羽黑山而開始，
係古時開始俾山上嘅人（佢哋稱「山伏」）嘅修道場～
佢哋俾咗一條白色嘅繩嘅我哋掛喺頸，
話只要戴住佢就可以阻止山上面嘅鬼怪襲擊我哋～
佢哋仲介紹咗山伏嘅裝束俾我哋，
而佢就係吹住佢身上掛住嘅螺去幫我哋開路上山㗎～
因為前一陣子落咗好多雪，所以雪影非常靚，有好多仲積得高過我，
行下山之餘仲可以睇下雪景
上到嚟到依個「參集殿」，我哋參觀咗入面嘅「三神合祭殿」（但唔俾影相），
聽佢哋講解好多歷史故事之外，仲幫我地祈福添～！
第三站就嚟依個「お雛様COOKING」體驗點樣整日本勾芡同和菓子，
有專業嘅師父會一步一步咁教你～
勾芡方面，雖然睇落好似好難咁但其實好簡單只要幾個步驟就得㗎啦～
只係要將佢變成非常杰之前要係咁搞係咁搞成5分鐘，搞到手都痛埋
完成之後佢就會俾一碗小菜你將你自己整嘅勾芡，
加上佢哋俾飯團你同埋日本酒就變成一個Lunch啦～
個日本酒杯非常之靚，仲可以俾你拎返屋企～
食完Lunch就緊係甜品時間，而甜品就係緊住落黎要整嘅和菓子啦～
師父俾咗個版我哋睇，件件都超靚，真心會唔捨得食
今次要整嘅就係柑同士多啤梨嘅和菓子（但唔係柑同士多啤梨口味），
2件和菓子都係紅豆味嚟嘅～睇師父親手整出嚟真係超靚超真，
而我雖然已經跟足哂師父講嘅步驟，但都整到好醜樣
整完之後可以而家食又得，放入盒拎返去食又或者送俾人都可以㗎〜（最耐可以放1-2日左右）
第四站就去到「致道博物館」參觀由極細雛道具研究家開嘅展覽～
（「雛」係指比實物細小嘅物品嘅意思～）
係150年前江戶時代主要俾歐洲上等家族嘅小朋友玩嘅小玩具，
總數超過2000件，細細件非常得意，而且都做到好似實物咁好靚㗎～
再行就去到和風嘅雛道具，係為展示德州四天王之一嘅酒井忠次開始由第三代至十三代，
250年來代代相傳嘅小玩具同人型公仔，全部都非常歷史悠久～
第一日嘅最後一站就係「加茂水族館」〜
除咗有一般嘅淡水魚同海水魚外，
仲有超級靚嘅水母區，佢哋有好多唔同大小唔同品種嘅水母，
加上有直徑5m嘅世界最大級水槽會一直換唔同燈，透明嘅水母加上燈光真係靚到唔想走～
行完咁多地方就緊係返酒店休息啦～
「湯野浜溫泉酒店 亀や」係一間面向海嘅酒店，
房大之餘海影非常靚，一日緊迫嘅行程雖然好攰，
但見到依個海影真係放鬆哂～
旅行小幫手：Locobee
如果去山形又或者日本其他地方旅行，想知道更多資訊又或者有嘢唔明？
可以好似我咁下載一個叫「LocoBee」嘅Apps～
佢其實係一個旅遊Apps可以比你發問、分享行程、又或者係識當地朋友嘅Apps，
假設你喺上面發問問題，就會有世界各地嘅人回答你，有時仲係當地人親自解答添～
例如我問關於山形手信有咩買嘅問題，就有幾位網友回答咗我，仲俾埋網址我參考
又或者係可以分享下你旅行嘅相等等，同世界各地嘅人交流～
當然唔一定要用日文啦～用英文一樣有人玩！
推介大家去日本，如果去悶晒熱門景點，又或者想睇下當地人有咩推介，都可以上去發問！
LocoBee有iOS同Android版本 ，大家去旅行，又或者其實喺香港都可以試下玩：
iOS：https://www.likejapan.com/locobeeblogios
Android：https://www.likejapan.com/locobeeblogan
想知第二日山形有咩玩，記得睇山形２日１夜之旅（下）啦～
About Post Author
