來自荷里活嘅蜘蛛俠基本上隔年就會「驚世」一次，相信應該都冇咩邊個唔識佢啦。不過，呢位『漫威』嘅「超級英雄」，原來連日本版都有喎，嗰位蜘蛛俠唔單止有架戰車，仲要連巨大戰艦(可變做機械人)都有！ 唔知各位讀者又有冇睇過呢？ 講緊嘅就係1978年今日於日本播映，連帶日後連超級戰隊都要學佢整返個巨大機械人嘅「東映版」蜘蛛俠！
話說70年代時嘅某一日，東映同漫威簽咗「5年自由互用角色」嘅協議，於是東映方面就利用咗「蜘蛛俠」呢個角色拍咗套年番。不過話就話借角色用，不過設定就係東映方面原創。據說當時東映原本係想做到個故事係日本武尊穿越到現代做主角，而蜘蛛俠就係擔當配角嘅角色。不過最後都係決定由蜘蛛俠做主角。
故事係講賽車手山城拓也嘅父親，山城宇宙考古學嘅山城博士被打算用佢嘅研究成果做壞事嘅怪物教授所殺。而山城拓也就從400年前，被率領鐵十字團嘅怪物教授滅族，想要報仇嘅蜘蛛星王子加利亞處注射咗蜘蛛提取液，變成蜘蛛俠對抗怪物教授同鐵十字團。
雖則都係蜘蛛俠，不過日版同美版就真係差好遠。日版嘅蜘蛛俠唔單止有架識飛嘅戰車，仲要有架可以變機械人嘅太空母艦！
主角山城拓也
蜘蛛俠架戰車GP-7，最高時速300km，空中飛行速度為4馬赫，車頭仲有小型彈彈同機槍。至於同美版架Spider-Mobile比邊架型啲就真係要由讀者自己判斷啦！
Marveller
幫主角山城拓也注射蜘蛛提取液，變成蜘蛛俠嘅蜘蛛星王子加利亞所乘坐嘅宇宙戰艦，可以變身成機械人「雷奧柏頓」戰鬥。
而有「英雄坐巨大機械人同怪獸戰鬥」呢條公式喺當年真係一個新嘗試，據說係因為當時日本人仲未係好熟漫威作品，為咗令作品更震撼，於是就有咗呢個設定，而之後由於反應非常好，所以呢條公式就於由「戰隊」嚟延續落去，於是由1979年嘅『萬國戰隊』開始，就有「巨型機械人」呢樣野。
事實上東映版蜘蛛俠喺市場上嘅反應之好，巨大機械人真係應記一功。由超合金到其他角色模型嘅銷量都非常滿意，即使當時有一群核心擁躉因為不滿蜘蛛俠竟然有機械人而當佢係「黑歷史」，不過作者史丹·李就好受落東映版嘅拍攝手法，認為日本版蜘蛛俠係海外眾多蜘蛛俠當中最有自己個性嘅一個。而官方就更加將呢個蜘蛛俠加入到後來嘅漫畫『蜘蛛宇宙』當中，作為眾多平行世界嘅蜘蛛俠當中嘅一員。
最後順帶一提，提到東映版蜘蛛俠，就不得不提佢出場時嘅對白，由於東映版蜘蛛俠同其他日本嘅英雄一樣，出場時都要嚟一兩句對白，而東映版蜘蛛俠嘅眾多出場對白當中，有部分就實在令人印象深刻，其中包括：
識日文嘅朋友真係推薦睇睇，佢每次出場都係令人印象深刻……
「為親情而哭嘅男人、蜘蛛俠！」
「對狗笛子抽泣嘅男人、蜘蛛俠！」
「守護母子之愛嘅羁絆嘅男人、蜘蛛俠！」
「血係人類嘅羁絆。愛嘅證明。為了愛而流血嘅男人、蜘蛛俠！」
「為了無家可歸嘅小孩們而流淚嘅男人、蜘蛛俠！」
「為了一言不發嘅動物嘅愛而哭嘅男人、蜘蛛俠！」
「父母嘅心、孩子嘅心。保護重要嘅心嘅、蜘蛛俠！」
「被發誓為去世嘅大哥復仇嘅姐弟打動了內心嘅男人、蜘蛛俠！」
「狩獵蘑菇嘅男人、蜘蛛俠！」
「加入野生嘅少女一方嘅男人、蜘蛛俠！」
「照相機嘅鏡頭是看到真實嘅瞳孔。相信著毫無烏雲嘅瞳孔嘅男人、蜘蛛俠！」
「為了孤獨嘅少年而戰嘅男人、蜘蛛俠！」
「聽到100米外嘅針掉到地上嘅聲音嘅男人、蜘蛛俠！」
「相信著少年偵探團嘅友情嘅男人、蜘蛛俠！」
影片來源:siuman Lau(YOUTUBE)
soyokaze777(YOUTUBE)
About Post Author
