每年嘅3、4月都係賞櫻好季節，而今年「千代田櫻花祭」就同《百變小櫻Clear Card》合作，除咗賞花，仲可以買周邊商品、收集蓋章、換取特別禮物！如果你係小櫻fans，就唔好錯過喇！
「千鳥淵綠道」步道位於千代田區皇居西側，全長有700公尺，受綠蔭與護城河所圍繞，係日本知名嘅賞櫻勝地，每年都會大搞櫻花祭。而官方早前公佈，今年嘅「千代田櫻花祭」會同《百變小櫻》合作，令一眾fans都好期待呀！
已公佈活動包括有小櫻蓋章收集活動及限定周邊販賣，詳情如下：
「Stamp Rally」小櫻蓋章收集活動
蓋章收集活動可以話係日本嘅特色，拎住一本本收集冊，行去指定地點蓋印，集齊所有款式嘅話超有成功感！今次嘅印章收集活動設獎品，集齊每款可以換取《百變小櫻》特別相片一張！活動好玩之外，又可以將美好回憶帶翻屋企！
蓋章活動開催期間：3月26日－4月8日
千代田櫻花祭 X 《百變小櫻Clear Card》 周邊販賣
活動設crossover周邊販賣，以「小櫻&小狼約會篇」為主題，商品包括文件夾、曲奇、Tote Bag及水樽。
Clear File 400yen （已連稅）
櫻花曲奇 1000yen （已連稅）
Mini Tote Bag 1000yen （已連稅）
Clear Bottle 1500yen （已連稅）
周邊販賣詳情：
日期：3月26日－4月8日
時間：9:30-18:00
場所：千代田區觀光協會
〒102-0074 東京都千代田区九段南1-6-17
賞櫻路線
千代田區觀光協會建議兩個賞櫻路線，路線1包括北之丸公園及千鳥淵綠道，而路線2就沿千鳥淵綠道行到半藏門站。雖然今年未公開太多詳情，但參考往年嘅千代田櫻花祭，大會就搞過染井吉野櫻、大島櫻等約260萬棵櫻花樹點燈儀式、夜間特別營業嘅划船場等，相信今年都會有類似活動舉行！
路線1：2.6 km 約50分鐘
九段下→千鳥ヶ淵緑道→代官町通り→北の丸公園→田安門→九段下
路線2：1.9 km 約35分鐘
九段下→千鳥ヶ淵緑道→英国大使館・千鳥ヶ淵公園→半蔵門
大家有時間的話，仲可以開始路線之前，行埋附近嘅靖國神社，去靖國神社參道那櫻花祭，附近會有好多美食攤檔，可以醫飽肚再賞櫻！
圖片來源：千代田區觀光協會、百變小櫻官網
About Post Author
