【All day breakfast名店「Eggs’n Things」】甜品竟然最好食!?

【All day breakfast名店「Eggs’n Things」】甜品竟然最好食!?

今日為大家介紹嘅店舖位於九州最繁榮、最熱鬧、人口最多最大嘅城市「福岡」!呢間叫做「 Eggs’n Things」嘅食店喺日本有17間分店,係一間主打All day breakfast嘅連鎖式餐廳,已經有唔少日本雜誌介紹過,目前店鋪大多集中喺東京、大阪、名古屋等等重要城市。

 

其實之前成日都經過呢間餐廳,但每次都有好多人排緊隊,所以都未有機會可以入到去試,但難得連韓藉朋友試過都大讚好食,大話B決定今次無論排幾耐都一定要試到!(好彩今次無咩人排隊XP)

 

【All day breakfast名店「Eggs’n Things」】甜品竟然最好食!?

好彩當日冇乜咩人排隊

 

見到門口個Egg Benedict相已經覺得好吸引,所以個人都未坐好就已經決定叫份牛油果蝦Egg Benedict,打開Menu發現好多野都好想試,所以忍唔住點埋牛油果三文魚Egg Benedict同Tiramisu Pancake,本身仲打算叫多個French Toast,但店員貼心地提醒我地未必食得晒,建議唔夠先再叫,其他美食唯有等下次有機會再試~

 

【All day breakfast名店「Eggs’n Things」】甜品竟然最好食!?

如果你唔識日文唔緊要,因為呢度仲有中英文Menu,唔洗怕雞同鴨講!店內坐位都幾多,可以容納106人,亦有網上預約服務,不過要注意,預約服務只限於晚餐時段,預約咗就唔使浪費時間排隊,啱哂要爭取每一分一秒嘅自遊人!

 

Menu除咗有Egg Benedict,仲有得揀Omelets、西式早餐Set,唔夠食仲可以加錢追加麵包、蛋、腸仔等等配菜,又有得單點沙律、小食等等,想食多啲定食少啲都可以自己揀!而甜品方面亦有唔少選擇,好似French toast,Waffles,Crepes等等,食完主食可以點返個甜品慢慢歎!

 

【All day breakfast名店「Eggs’n Things」】甜品竟然最好食!?

店內光線柔和,自拍唔開美圖APPS都可以影得好靚!(笑)一路聽住夏威夷音樂,一邊欣賞掛喺牆上面做裝飾嘅滑浪板,好有夏威夷渡假Feel,天花板有好多吊掛式嘅風扇喺到慢慢轉,時間變得慢咗,氣氛好悠閒,同店外嘅繁忙世界好似兩個世界咁。

 

【All day breakfast名店「Eggs’n Things」】甜品竟然最好食!?

等咗大約10分鐘左右就有嘢食,水波蛋整得好完美!淡黃色嘅荷蘭醬有濃郁嘅奶香味(雖然同行嘅朋友略縑個醬唔夠正宗),蛋下面塗滿咗勁creamy嘅牛油果醬,下面仲夾住4隻蝦,篤穿個蛋黃,啲蛋黃汁慢慢咁流出黎,真係令人食指大動!

 

【All day breakfast名店「Eggs’n Things」】甜品竟然最好食!?

記得一定要將所有食材一次過放哂入口,豐富嘅口感同味道真係好食到講唔到野,而家諗返起都流晒口水!

 

【All day breakfast名店「Eggs’n Things」】甜品竟然最好食!?

食完個Egg Benedict,終於等到個Tiramasu Pancake出場啦! Pancake側邊有成座山咁高嘅鮮忌廉,味道唔太甜但有超濃郁嘅奶味,正合我呢個超級忌廉控!Pancake質地非常軟綿煙韌,而且好重朱古力味,但又唔會死甜,好正!

 

【All day breakfast名店「Eggs’n Things」】甜品竟然最好食!?

檯面上面仲提供三種糖漿比你加,有Strawberry、Coconut﹙店員無講仲以為喺練奶)同Maple syrup。當店員介紹完啲漿後,心諗唔係掛,Coconut漿咁新穎?會唔會中伏? 不過咁難得嚟到就當然要咩都試吓!咦?!意外地覺得Coconut漿同呢個Pancake異常地夾喎!

 

結論:

可能被吹捧得太利害,同行朋友對Egg Benedict有啲失望,好彩個甜品救返唔少分!食過正宗Egg Benedict嘅朋友不妨試吓到底有幾大分別。而呢度嘅甜品確實係激贊,如果你都係忌廉控的話一定會大愛!

 

Eggs’n Things 福岡天神店
地址: 福岡縣福岡市中央區大名1-12-56 THE SHOPS 1/F
電話: 092-737-7652
營業時間: 9:00~22:30 ﹙22:00 last order)
前往方法: 西鐵天神大牟田線「西鐵福岡﹙天神站)」步行5分鐘;福岡市地下鐵空港線「天神站」步行5分鐘
網址: www.eggsnthingsjapan.com

 

撰文、圖片:HAMA大話B