松江花鳥園係島根縣內一個一年內都可以接觸到90種以上的世界不同鳥類，與動物園合併嘅一個樂園，位於宍道湖附近，由一畑電車嘅松江貓頭鷹花園站就會直接到達。
正式入到去園內之前，已經可以見到有近20種，約60隻貓頭鷹等緊大家！入場之後，進入眼廉嘅係超靚顏色非常鮮艷嘅溫室花園，中央溫室花園大約有8000平方米，係日本國內最大嘅展示溫室之一。而且哩到有好多影相熱點俾大家可以影相，情人，朋友，家人都好啱！
走過咗溫室花園之後，就會見到一個好空礦嘅表演廳。大家可以喺哩到睇到多種貓頭鷹嘅飛行表演，訓練員同貓頭鷹嘅互動非常有趣，貓頭鷹會喺表演廳上空飛嚟飛去，低飛嗰陣仲有機會喺你頭上輕輕擦過，被選中嘅觀眾仲可以同貓頭鷹一齊合作玩遊戲添！睇完精彩嘅貓頭鷹飛行表演之後唔夠喉，可以試下貓頭鷹企上手臂嘅體驗（要收費）同佢哋有更近距離嘅接觸！
之後就可以用長達140米嘅行人電梯上去草坪廣場，哩到有貓頭鷹以外嘅鳥類，例如鷲，鷹嘅表演，佢哋嘅飛行速度都非常快，要影相嘅朋友記得要把握機會阿！（留意地場會因天候問題表演位置會有所改變）之後就會去到熱帶鳥溫室，哩有多個透明玻璃箱，大家可以見到唔同種類嘅鳥類動物，話明係「熱帶」，所以佢哋嘅顏色都好鮮艷，有啲仲更加係稀少種類，非常得意！熱帶鳥溫室仲可以親手餵糧食俾佢哋（要收費），只是你拎住鳥糧，佢哋會飛到去你手上食嘢㗎啦！而熱帶鳥溫室內有個非常受歡迎嘅活動，就係一日兩場嘅企鵝散步啦！企鵝會因季節或節日去著唔同衫，上次小編去採訪因為接近情人節，所以佢哋都喺心口掛住塊寫咗佢哋個名嘅朱古力牌，好得意！佢哋一邊散步大家就可以跟住佢哋影下相，仲可以俾佢哋企上你大腿上面添！（餵企鵝要收費）
接觸完咁多可愛嘅鳥類動物可以去不昧庵食出雲名物嘅出雲蕎麥面，或者可以去俾花包圍嘅靚景弗洛拉餐廳食下嘢休休息，望住個靚景休息真係好舍意㗎！
最後就緊係要買手信啦！哩到除咗有島根縣嘅手信之外，仲有花鳥樂園嘅限定手信，食物，公仔，就連花都有得買，臨走之前記得再去行下啦！
入場費方面，大人1540Yen，小初中學生770Yen，滿65歲以上1020Yen。如果出示護照，大人仲可以用1080Yen，小初中學生540Yen就可以入場，大家去之前要記得帶護照阿！（全部價錢連稅）
松江フォーゲルパーク(松江花鳥園)
地址：〒690-0263 島根県松江市大垣町５２
開園時間：4月1日至9月30日：9：00～17：30（最終入園時間：16：45）
10月1日至3月31日：9：00～17：00（最終入園時間：16：15）
年中無休，但活動期間閉園時間會有機會延遲
網頁詳情：按我
About Post Author
