2004年今日,金子勇因開發Winny被捕

2004年今日,金子勇因開發Winny被捕

金子勇呢個名唔知大家有冇印象? 2004年今日,金子勇被京都府警逮捕,而同月31日,京都地方檢察廳起訴金子勇,罪名係「幫助侵害著作權」。

 2004年今日,金子勇因開發Winny被捕

原來金子勇係一個日本知名P2P 軟體「Winny」嘅開發者。喺utorrent、迅雷,甚至早在BitTorrent之前,就已經有兩個非常流行嘅分享軟件,一個係「WinMX」,另一個就係「Winny」。WinMX因為神人較多,所以發現「寶藏」嘅機會率都比較高,而且「新嘢」往往都係由「WinMX」流去「Winny」。不過普及性就冇咁高啦,其中係因為WinMX可以操作上下載,決定俾某個輪候嘅人立刻下載,所以要順利下載目標好多時都要同對方「交易講數」。加上「Winny」係日本土炮製作,自然更多日人使用。

 

不過由於用家主要都係用嚟分享侵權物,所以政府一向視之為打擊對象。早於2003年11月,就已經有兩個用家被捕,最後更被宣判有罪。而金子勇本人亦因而於2004年5月10日被捕。最後京都地裁(京都地方法院)於2006年12月一審判決,認為金子勇明知Winny會被用於違法,仍然繼續程式維護同開發工作,因此以「幫助侵害著作權」罪名判處金子勇150萬日圓罰金,而金子勇即日決定上訴。

 2004年今日,金子勇因開發Winny被捕

金子勇係全球首位被捕嘅下載程序開發者,佢堅稱自己係為咗日本先開發Winny,而日本人總有一日可以享受到呢個技術帶嚟嘅好處。佢嘅支持者仲組成「金子勇支援會」,又籌到超過一千五百萬日圓俾佢用嚟打官司,實行「長期抗戰」!

 2004年今日,金子勇因開發Winny被捕

經過多年官司,於2009年10月8日大阪高等裁判所二審推翻一審判決,金子勇獲判無罪。雖然控方堅持Winny被普遍用於非法下載,所以Winny應屬於非法軟件,而且匿名係助長「技術恐佈主義」,會鼓勵犯罪。不過審判長小倉正三就指無明確證據顯示金子勇係出於協助侵權而開發Winny。而有人用嚟犯罪,亦唔應該係開發者嘅責任,如果要追究責任嘅話,咁製造FTP應該也是犯法了。因此如果以此為理據將軟體開發者入罪,會令其他軟體開發工作會因此不清晰嘅基準而中止,打擊軟體開發事業。

 2004年今日,金子勇因開發Winny被捕

雖然大阪高等檢察廳因不服二審判決而向最高裁判所提起上訴,不過最後於2011年12月10日宣判,仍然維持金子勇無罪,事件總算完結。不過可惜嘅係金子勇雖然最終被還以清白,不過呢段清白嘅日子唔算太長,因為佢於2013年7月6日,就因急性心肌梗塞而逝世,享年43歲。