1582年今日 戰國歷史嘅轉捩點 「本能寺之變」

雖然很多人都知道戰國時代最後勝利者係德川家，不過要講到呢個戰亂不斷嘅情況係幾時開始出現重大轉變，就要由織田家講起。

公元1582年，聲名大噪嘅織田信長帶住織田軍用盡各種手段奪取京都同佢周圍嘅近畿地區，吸收晒呢啲領土嘅資源、人口。強盛到連其他大名(領主)搞個乜鬼聯合包圍網都拆爛埋，隻揪不在話下，就連比人圍毆都可以打返轉頭，其他大名望住織田軍都只能搖頭喪氣割肚皮。仲要昔日嘅強敵死嘅死，再唔係就鬼打鬼……總之，織田家離統一全日本真係唔遠……如果無發生過跟住落黎講嘅呢件事嘅話……

本能寺之變，Wikimedia Commons

話說，1582年6月17日，織田信長為支援正討伐緊毛利家嘅羽柴秀吉(日後嘅豐臣秀吉)，帶咗百幾個後生侍衛由安土城黎到京都嘅本能寺，等候部隊集結。3日後(6月20日)，信長喺本能寺舉辦咗個茶會。

同日下午，明智光秀帶住13,000餘士兵由丹波龜山城出發，號稱「接受信長公檢閱」，然後第二日凌晨抵達時，光秀就向全軍指示「敵人就喺本能寺」——即係佢要討伐身在本能寺嘅織田信長。第二朝，大軍就已經包圍住本能寺，自此織田信長就連同百幾個侍衛消失咗喺歷史舞台上。

傳說原志摩守將信長個頭趁亂運出本能寺，埋葬於富士山麓，即今日静岡縣富士郡芝川町嘅西山本門寺

同時間身在妙覺寺嘅嫡子織田信忠亦收到明智光秀謀反嘅消息，不過佢身邊又係得幾百個侍衛，認為自己知道得太遲，最後就選擇咗逃亡到誠仁親王居住嘅二條御所，等誠仁親王離開後選擇反撲明智軍，結果寡不敵眾而被迫自殺。

明智光秀

本能寺之變之後，明智光秀當然上到位，但好快就畀四方八面比信長派去征敵嘅將領趕返黎誅殺。當中羽柴秀吉，日後改名為豐臣秀吉喺呢件事上更加係獲益甚多，成為戰國時期繼信長後嘅「天下人」。不過值得留意嘅，係豐臣秀吉亦都係靠織田信長打返黎嘅地盤再發展落去另一個盛勢。

而關於光秀點解會突然「反檯」就真係日本史上一大謎團。一般除咗光秀疑心重加有啲神經質嘅性格同信長為人衝突太大外，亦有人認為係受到家康或者秀吉煽動而叛變。

而提起本能寺，雖然今日喺京都市中京區仍然可以見到本能寺一切如常嘅光景，不過其實已經唔喺佢當年嘅原址。本能寺自1433年建成以來，包埋本能寺之變其實已經燒毀過好幾次。特別係1590年，即係本能寺之變之後8年，豐臣秀吉就實行咗「京都改造計畫」，包括本能寺在內嘅寺院都「被搬遷」到今日嘅「寺町通」，所以而家本能寺嘅位置同當年信長死嘅位置係完全唔同。而近年於堀川高等學校附近發現咗一系列遺跡，就被指可能係本能寺原址。

本能寺舊址傳說位於而家嘅堀川高等學校及京都市本能特別護老中心

學校附近仲有個「本能寺跡」嘅牌

關於「京都改造計畫」，其實一直有指係豐臣秀吉由於想消滅本能寺之變係佢有份搞出嚟嘅證據，所以先極速鏟平晒嗰一帶嘅建築。當然係咪真就真係不得而知啦。