慳家嘅你一定會聽過香港嘅10蚊點（雖然已經加到12蚊啦⋯⋯）。佢係嚟自日本嘅100円商店，簡稱「100均」，基本上都以均一價100円出售各種生活雜貨。「100均」嘅產品平而實用，喺當地都相當受歡迎，好多綜藝節目都曾經介紹過唔同「100円商品」同進階用法，甚至要將佢哋推廣比全世界！
講緊嘅就係東京電視台節目「100均 喺世界各地使用」100円商品」會點？（ヒャッキン 世界で”100円グッズ”使ってみると？）」。節目致力喺唔同國家拍攝外景，用「100円商品」解決當地人嘅煩惱。啱啱播出嘅新一集就嚟到香港，等我哋睇下呢三個家庭點樣被節目組幫助啦！
（下圖均截自節目片段）
家庭1 點樣先可以輕鬆咁搬開個梳化？
第一個受訪家庭係點心師傅豪先生一家。佢哋一家六口居住喺狹窄嘅公屋裡面，放左張梳化之後就會頂住個房門，所以出入嗰陣都要搬開張梳化先得。但係梳化都有一定重量，所以相當唔方便，佢個女想入去就一定要搵大人幫手或者合三姊妹嘅力量先得。
係呢個時候，呢個圓碌碌嘅不明「100円商品」就可以解決佢哋嘅煩惱！
其實佢係一個傢俬滑動器（家具スライダー），專門用嚟搬傢俬嘅。用法都好簡單，只要將佢攝入去傢俬嘅腳嘅下面就得。不過記得光滑面要向下～
佢可以令到梳化之類嘅大型傢俬更容易搬動，豪先生個女喺加咗滑動器之後一推！就成功將梳化推離門口，以後想入房都方便得多啦。當然，佢都未勁到真係輕輕一推就推得到咁跣，所以唔使擔心會好易令梳化走位。如果係準備搬屋、裝修，或者同豪先生有同樣煩惱嘅話不妨考慮下。
商品詳情
發售商店：DAISO（100円／2個，未連稅）
家庭2 點先可以輕鬆咁紮起報章雜誌？
雖然話而家紙媒嘅銷量逐漸下降，但如果仲有買報紙、雜誌習慣嘅你就會明白，搵尼龍繩紥住佢再扔掉真係好煩。衛先生就比呢個可以幫手紥嘢嘅「100円商品」吸引住，仲話要送比太太方便佢?～
「同綁唔實嘅繩結說再見 紮報紙器（ラクラクひも結束 新聞しばり）」係協助大家用尼龍繩綁緊啲報章雜誌嘅工具，要紮住唔同書本都用得到㗎。
首先，好似平時咁綁好啲佢先。
其次，扯實條尼龍繩之後用紮報紙器勾住。
然後將尼龍繩反過去另一邊並扯實兩邊。
最後用紥報紙器捲捲捲，捲到下圖咁嘅繩結咁就得咗！唔使再打無限個結去防止啲雜誌報章散曬出嚟啦。
商品詳情
發售商店：Seria、Watts、Can Do（100円，未連稅）
家庭3 點樣先可以?小朋友食蔬菜？
相信好多小朋友都有偏食嘅習慣，小編細個嗰陣都唔例外（笑）就好似呢一家嘅小主人Mark，一見到蔬菜就忍唔住大叫：
Mark嘅屋企人同外傭Sally都好擔心佢嘅健康。係呢個時候節目組就有個鬼主意，誓要引誘到佢食菜～！
今次我哋用嘅係肉包製造器（肉まんメーカー）。本來佢係用嚟將燒賣夾入麵包度，等大家都可以喺屋企輕鬆咁整到當地中華料理嘅必食menu：肉包，但係今次就加啲創意，整個菜肉包出嚟！
首先將蔬菜切碎後同免治肉碎炒埋一齊。
稍為叮暖兩塊白麵包。
用透明容器將2片麵包切成型。
喺隻豬嗰位度放入饀料。
再用藍色蓋壓個影出嚟。
得咗！！！咁可愛嘅小食都令到Mark同細佬一望到就搶住想食。點知⋯⋯
伏咗！係菜呀！XDDDD不過Mark都冇之前咁抗拒，仲食曬成個包?。睇嚟真係好好食咁啦～
好多「100円商品」同呢個肉包製造器一樣睇落好簡單，但其實透過你嘅想像力可以發揮無窮力量，變身做唔同嘢㗎。
商品詳情
發售商店：Watts、Can Do（100円，未連稅）
節目入面仲介紹咗唔少有趣而實用嘅「100円商品」，大家有興趣可以去官網（http://www.tv-tokyo.co.jp/100kin/product/）睇下有冇心頭好啦～
節目詳情
《ヒャッキン 世界で”100円グッズ”使ってみると？》（東京電視台）
播放日期：2018年2月27日
播放時間：晚上6時55分～
官方網頁：http://www.tv-tokyo.co.jp/100kin/
主持：角谷曉子（東京電視台主播）
嘉賓：唔同嘅媽媽級藝人（菊池桃子、北斗晶、安めぐみ、藤本美貴）
About Post Author
