[次世代綾瀨遙!?] 超可愛天然系美少女永野芽郁

要數日本當今最紅一線女星，一定非「最想和她結婚女藝人」榜首，喺香港亦都鼎鼎大名嘅天然呆美女代表綾瀨遙莫屬！擁有實力雄厚嘅演技同零瑕疵美肌，真係夠晒煞食呀！

不過俗語有云：長江後浪推前浪，日本嘅藝能界總有新血注入，青春kawaii妹子們爭住入行簡直就係花多眼亂！

今日就等我為大家介紹下最近冒起的次世代女星 — 永野芽郁！上圖右邊個個咪係佢囉～本人就覺得芽郁（Mei）某啲角度都幾似綾瀨遙㗎！

同我一樣都係90後嘅芽郁今年只得16歲…（因為人哋唔同我，人哋1999年出世…）童星出身嘅佢小學3年級就拍電影喇。之後仲成為超受初中同小學生歡迎嘅雜誌nicola嘅專屬model添！想當年新垣結衣都係nicola model黎㗎！

如果有跟開日漫日影，應該都唔會未聽過《俺物語!!》。呢套喺日本超紅嘅另類少女漫畫，芽郁就成功突圍而出通過甄選，飾演電影版超萌超甜女主角大和凜子，戀上喺戲入面一啲都唔靚仔但超man又大隻嘅好青年鈴木亮平！

上一季「月9」，芽郁都有份夥拍新生代女神有村架純參演《想起這段戀愛時定會哭泣》飾演船川玲美，有無人有睇呢～？

（話時話：睇左有村BB嘅靚圖未

）

咁可愛又登上咗「月9」嘅舞台，芽郁嘅發展梗係唔會停啦～現階段已經接拍緊唔同嘅電影同電視劇，我就幾睇好呢位妹子嘅前途。最近佢仲成為可爾必思嘅日本廣告代言人，個種青春嘅味道簡直同當年綾瀨遙做寶礦力女郎嘅時候有得揮呀！

人地跑喇！仲唔追！？？

芽郁所屬事務所為Stardust，成功打造同門師姐柴咲幸、北川景子、竹內結子、本田翼等等大美女們，睇黎芽郁妹妹要上位絕對唔難！
（2017年6月29日後加：永野芽郁已經落實會出演NHK晨間劇女主角角色，睇黎唔洗好耐就會大紅大紫啦！）

想留意多啲呢個妹子，不如follow人哋IG或者Twitter啦！

我就會繼續同大家發掘新星，敬請留意喇！多多指教