日本單身人士必去居酒屋-相席屋!

日本單身人士必去居酒屋-相席屋!

 

首先,如果想睇完整介紹,記得睇埋上面條片啊!
 
今日為大家介紹一家不得了嘅居酒屋!原來呢個世界上真係有免費嘅午餐可以食㗎…只要你係女仔嘅話(笑)。呢間叫「相席屋」嘅居酒屋其實喺日本全國都有開分店,不過呢間秋葉原嘅分店就係最新開嘅,入面嘅裝修亦都係最高級最靚㗎!
 
日本單身人士必去居酒屋-相席屋!
▲話就話位於秋葉原,不過搭地鐵銀座線出末広町駅會係最近!
 
呢間居酒屋到底同其他居酒屋有咩分別呢?點解女仔可以免費食免費飲?其實相席日文嘅意思就係「搭枱」嘅文化。
 
相席屋完全係為咗幫男女食客結識新朋友而出現嘅!女仔可以免費入場任飲任食,但就一定會編排同男士一齊坐。至於男士想入場識女仔,就要半個鐘畀1500yen喇!(連稅1620yen)
 
日本單身人士必去居酒屋-相席屋!

▲雖然男仔要俾錢,但就包你一定會同到日本妹坐囉!你制唔制先~

 

日本單身人士必去居酒屋-相席屋!
▲其實店內裝修走現代和風風格,幾靚幾華麗,而且完全感受到入夜暗咗之後間舖更加有feel!
 
雖然話係任飲任食嘅居酒屋,其實嘢食講真就全部都係輕食為主。飲品亦都係走一人一杯制,要飲完手上嘅嘢飲先可以添飲。

 

當然如果大家唔夠食、或者想飲啲烈啲嘅酒,店舖都有提供額外收費嘅飲品同食物嘅~
 
日本單身人士必去居酒屋-相席屋!
▲當日我同咗幾枱唔同嘅食客傾偈。啲女仔都不避嫌同我講佢哋係第2、3次嚟幫襯。佢哋話可以當行街攰咗,坐低抖下飲嘢識吓朋友,都幾開心!有人仲同我講有同上次識嘅異性繼續交流添呀!(各位兄弟,有望呀!)
 
日本單身人士必去居酒屋-相席屋!
▲店內設有搞氣氛玩具提供食客使用。我就見到比較多人都係幾個人咁同朋友一齊上嚟。如果你真係一個人嚟,就有機會被編去搭張大枱。其實個感覺都幾似啲日本人嘅聯誼派對咁。我一路都見到啲人喺度玩遊戲同飲酒,氣氛唔錯~
 
相信只要你日文程度係可以同日本人作日常溝通、又唔係啲好怕醜,有社交困難症嘅人嘅話,嚟呢度都幾大機會可以抄到牌返去。不過記住,食客係完全有唔交出自己聯絡方法嘅權利,千祈唔好逼人啊!
 
日本單身人士必去居酒屋-相席屋!
▲如果真係遇到完全唔想同佢講嘢嘅人,或者傾倒冇晒癮想轉枱,可以去廁所拎呢張卡。每個客人入店時都會獲發一個英文字母:你只要將唔想再一齊坐嘅對手嘅英文字母寫落張卡度,只有安排到,店員都會幫你安排換枱㗎喇!
 
日本單身人士必去居酒屋-相席屋!
 
我自己就覺得店長同店員非常之靚仔靚女!同埋千其唔好以一個想免費食嘢嘅心態上嚟(你係唔會飽㗎)。但呢間店就絕對係一個識男仔女仔嘅好地方。而且雖然佢係喺秋葉原,但都唔會話有好多宅男客(唔排除可能都係隱形宅男宅女)。如果下次嚟東京想試下新體驗,不妨嚟呢到玩下喎!
 
詳細玩法、規則就記得睇我上面條片喇~有埋實戰感想㗎!
 
相席屋 秋葉原
網址:https://aiseki-ya.com/
地址:東京都千代田区外神田4-4-3 秋葉原SIL大廈9F
★女性可免費、無時間限制享用飲品放題!

★男性每30分鐘費用:1,500円(連税1,620円)享用飲品放題