接住上篇,以下就為大家介紹埋剩餘6位來港嘅乃木坂46成員啦!

-----------------------------
C3AFA來港成員介紹 (上): www.likejapan.com/nogizaka46hk4

7. 齊藤優里 (斉藤優里)

暱稱:Yuttan(ゆったん)、Yuri(優里)

出生日期:1993年7月20日

螢光棒應援色:粉紅色×白色

活潑開朗嘅代表一定非優里莫屬,佢嘅特徵就係露出黎嘅門牙。優里將支持自己嘅粉絲稱為「Famitan」(ふぁみたん),佢第一次喺收錄喺第5張單曲嘅《13日的金曜日》擔任Centre,首歌就好似佢本人咁元氣滿滿,聽完之後都會令人精神翻哂。

圖片:優里(右)同成員一齊到香港旅遊時嘅照片

 

優里係戶外派嘅人,上年佢都有份同西野七瀨等人一齊私底下嚟香港玩,前排佢仲去埋台灣旅行添。優里好鐘意KPOP亦係韓國女團TWICE嘅粉絲,亦曾經參加過佢地嘅活動。優里定期都會上電台節目,同埋佢都係入單曲選拔嘅有力人選之一。

 

8. 星野南 (星野みなみ)

暱稱:Minami(みなみ)

出生日期:1998年2月6日

螢光棒應援色:白色×白色

一期生之中妹系嘅代表,被周圍寵愛住嘅成員。同成立初期企前排既生田繪梨花同已經宣布畢業嘅生駒里奈合稱「生生星」。

圖片:今年一月星野就著左和服出席今年度嘅成人式

 

因為係節目到表示過自己鐘意麵包,結果係握手會曾經吸引左好多粉絲去搵佢,只求親耳聽佢講一聲「Pan」(麵包嘅日文)。星野最明顯嘅特色就係傲嬌,長期處於反叛期嘅佢看似無乜幹勁,例如好多時候佢都唔會填節目嘅問卷或者會直接用可愛軟軟嘅語氣拒絕。唔理係點,大家都會覺得呢份任性係萌點。另外啱啱星野宣布咗會喺4月推出個人寫真集,都令人非常期待。

 

9. 松村沙友理

暱稱:Sayurin(さゆりん)、Sayuringo(さゆりんご)、Macchun(まっちゅん)

出生日期:1992年8月27日

螢光棒應援色:紅色×紅色

大阪出身既沙友理同白石麻衣以及已經引退演藝圈嘅橋本奈奈未都被稱為乃木坂46嘅「御三家」(三巨頭既意思)。初期留有觸角嘅髪型,令佢係外型上突圍而出。必殺技係「Sayuringo Punch」(さゆりんごパンチ)擊拳手勢。佢同時係團內大胃王,但偏偏唔識煮野食,整親都係味道怪異、賣相唔太討好嘅黑暗料理。另外,佢都好鐘意睇動漫同關注聲優嘅消息。

圖片:使出必殺技同時又展現出天真爛漫笑容係松村嘅魅力之一

 

松村同生田繪梨花組成過「炸雞姐妹」(からあげ姉妹),而家係同另外3個二期生組成嘅「Sayuringo軍團」(さゆりんご軍団)嘅軍團長,兩邊都推出過unit曲。松村被《CanCam》起用為專屬模特兒,又係發行過個人寫真集嘅其中一人。

 

10. 堀未央奈

暱稱:Miona(みおな)

出生日期:1996年10月15日

螢光棒應援色:白色×橙色

未央奈係今次來港成員入面唯一一位二期生。加入乃木坂46一陣就宣布佢做第7張單曲《髮夾》嘅Center,係當時大家未有預想到官方會力推嘅新人。未央奈鐘意看恐怖片,試過喺節目內挑戰背100套恐怖片嘅殺人犯角色名,但係偏偏唔擅長應付靈異話題同鬼屋。

圖片:短髮造型令未央奈非常易認

 

未央奈嘅特技係高速眨眼,喺節目中嘅綜藝表現較突出嘅其中一位。佢係雜誌《ar》嘅常規模特兒,亦有出過個人寫真集。

 

 

11. 井上小百合

暱稱:Sayu(さゆ)、Sayunyan(さゆにゃん)

出生日期:1994年12月14日

螢光棒應援色:白色×白色

小百合係外表同性格都反差幾大嘅成員。大家睇佢外表可能會覺得係王道偶像風格,但係因為屋企有幾個哥哥,於是從細就喺比較男性化嘅環境長大,不論係衣著、言行方面都比較man。佢為咗令身體強壯啲,甚至有去鍛練過肌肉。

圖片:小百合喺節目上表示過自己唔太擅長應付「可愛」呢樣嘢

 

小百合好鐘意戰隊系列嘅特攝片,之前佢仲如願客串左一套戰隊作品。佢對庭園方面都好有興趣,東京都內最推薦嘅就係六義園。小百合嚟緊4、5月會出演新嘅舞台劇,扮演表裡不一嘅腹黑角色。

 

 

12. 中田花奈

暱稱:Kanarin(かなりん)

出生日期:1994年8月6日

螢光棒應援色:白色×黑色

花奈係一個努力家,手機mail同官方blog嘅更新率都係頭幾位。全盛期就係出道初期嗰時,頭幾張單曲佢都係企前排。「中田花奈」呢個名不論係由頭讀或者係由尾讀番上去日文發音都係「NAKADA KANA」,因此呢個就成為左花奈嘅自我介紹方式。

圖片:出現係握手會現場嘅Kanawo

 

花奈嘅興趣係睇偶像,喺節目《喜歡活生生的偶像》(生のアイドルが好き)中會扮演格仔恤衫嘅偶像宅Kanawo(カナヲ),從粉絲嘅角度同嘉賓玩模擬握手會。花奈其實係個學霸,節目上嘅測驗成績基本上都係頭幾名。佢有參與定期電台節目《沈默的金曜日》嘅收錄,係小分隊「乃木團」到擔任低音結他手。

當然除咗來港成員,乃木坂46都仲有好多別具風格嘅成員。希望今次就算演唱會完咗,將來乃木坂46都有機會再嚟香港演出,到時候再為大家介紹啦!

-----------------------------

乃木坂46入門介紹: www.likejapan.com/nogizaka46hk1
中心成員 西野七瀨: www.likejapan.com/nogizaka46hk2
中心成員 齋藤飛鳥: www.likejapan.com/nogizaka46hk3
C3AFA來港成員介紹 (上): www.likejapan.com/nogizaka46hk4
C3AFA來港成員介紹 (下): www.likejapan.com/nogizaka46hk5