【期間限定至22/6】Tower Records X IQ博士主題Cafe 極速食評!

「靈感IQ稱得上,十分之高超~」拿!除非你扮後生或者無童年,否則如果你係80後90後,你唔會唔知我唱緊咩嘅!漫畫家鳥山明先生嘅大作,除咗有龍珠之外仲有深受香港人歡迎嘅IQ博士。細細聲講,其實細個阿媽唔係好畀我睇架咋,因為小雲成日玩屎。但邊個又估到20年後嘅今日,我竟然可以嚟到日本東京同小雲一齊玩屎呢?
 
今日同大家介紹只係限定一個月嘅Tower Records表參道CafeIQ博士合作搞嘅主題cafe!喺正表參道大街,隔離仲要係KIDDY LAND等名店,大家行街行到攰都可以黎坐下喎!呢個主題cafe其實係慶祝IQ博士動畫係日本放送35週年紀念(WOW!)6月22日就無架喇~

 

我突登避開lunch人潮高峰,平日下晝一個人嚟食都有位唔使等。一出lift就見到一排小雲做封面嘅IQ博士漫畫喇!
 
店內都當然增添咗小雲同小吉嘅擺設。仲有天神村村民嘅相做背景,就連店員都打扮成小雲咁,好得意。
而且一路播住日文版嘅IQ博士歌曲,懷舊得黎好有feel~店內仲有賣特別版CD添!

 
今次嘅menu如下:

我就選擇咗食睇落最靚嘅小雲咖喱飯(1300yen)、小吉Latte(750yen)同...大便芭菲(1100yen)做甜品。
大概等咗5分鐘到唔駛小雲咖喱飯已經出現喺我面前。原來叫野食有特典,會送埋Post Card同杯墊!
 
炒飯好類似蛋包飯入面個種飯嘅味道,而咖喱就比想象中辣,但係幾香幾好食。飯配埋沙律感覺唔會好heavy~不過salad醬有少少酸。帽邊嘅蛋皮都比較普通。賣相就好好喇、不過不失啦。
 
小吉latte店員放上檯嘅時候我真係好想大叫:KAWAII!
搞到我一路飲得勁小心唔捨得小吉個樣冇咗。而咖啡本身係有質素嘅。男友陪女友嚟唔食嘢都可以飲返杯落喎!
 
最後就係其實我最期待嘅...粉紅色嘅屎。呢個大便君芭菲...估唔到粉紅色嘅屎又真係幾好食喎!
粉紅色cream下面有cereal玉米脆片、一層水果包括桑莓同士多啤梨、再一層忌廉、少少海棉蛋糕同埋最後cream底下有士多啤梨醬。最得意係大便上插著支Pocky朱古力,大家可以扮小雲攞樹枝拮屎玩

 

講起扮小雲,店內其實有免費租借小雲嘅cap帽同眼鏡畀大家自high自拍,但係我食完先見到,大家記得影食物個陣扮埋佢啦!(當然,如果店內人流多就要自律啲影完即刻還返喇。)門口見到嘅日文版IQ博士漫畫都係可以俾客人食住睇嘅,但又係,人流多嘅話限一人睇一本。我就拎嚟做吓自拍道具算嘞~
如果係表參道行攰咗想搵撻地方tea一tea坐下食啲嘢不妨想埋嚟影下相呃吓like喎!
店內仲推出是次合作cafe嘅特別商品,鍾意小雲小吉嘅朋友千祈唔好錯過!(詳細:官方網站
 
小雲小吉毛巾 (1296yen)
 
小雲杯 (1296yen) 杯墊(216yen)
 
角色memo紙(648yen)
 
小雲鑰匙扣(648yen)
 
小雲Tote Bag(1620yen)
 
<TOWER RECORDS CAFE 表参道店>
營業時間:11AM至10PM (Last Order 9:30PM)