快閃北海道紋別之旅(四)精選海鮮特輯

北海道出名食蟹就係人都知,今日就為大家搜羅三間係北海道紋別嘅餐廳,由低價位到高價位,等大家可以「擦餐勁」嘅。
 
 
1)海鮮炉端焼き
 
▼第一間要介紹嘅就係呢個「海鮮炉端焼き」。門口竟然仲有風扇係度吹緊咸魚,真係未入門口都已經感受到陣陣海鮮味。
 
 
▼每枱顧客都有一個爐可以燒。
 
 
▼呢個海鮮飯」有好多蟹肉係上面,魚子味道適中唔會過咸,甜蝦同帆立貝亦味道鮮甜。另外附上一個有成隻蟹鉗嘅湯,全部加埋都只係1,100円
 
 
▼而係爐端燒方面,我地就叫左呢個「B海鮮餐」。佢分別有原條魚,兩隻蝦,一隻蟹腳同埋一隻帆立貝。
 
 
▼如果你唔識控制個火喉,唔駛驚,因為有員工會幫手。原條魚肉厚,唔算好嫩但鮮味重。帆立貝唔好燒太耐,如果唔係乾身就無咁好食。
 
 
▼另外仲有蟹湯同梅子飯團。不得不讚個蟹湯真係超鮮味~~仲有好大隻蟹鉗係入面,唔駛一分鐘我就成碗飲晒。而重點係,呢個咁多野食嘅餐都只係1,800円,計番港紙只係百三蚊左右就食到,真係超抵。
 
 
▼食飽飽旁邊仲有新鮮海產販賣,不妨落黎逛一逛,順便消化一下。
 
 
總結:呢度嘅海產全部都好新鮮。雖然海鮮飯都幾好食,不過只可以揀一樣嘅話我會推介大家食爐端燒,唔只份量多,全部嘅味道都好好,細食小小嘅朋友可能兩個人一個餐都好夠食。蟹湯令人一試難忘,齒頰留香。而且距離紋別機場只係15分鐘車程,非常方便。
 
 
2)Hotel Okhotsk Palace
 
▼第二間要介紹嘅就係呢間位於「Hotel Okhotsk Palace」入面嘅餐廳。
 
 
▼係香港,講起白咖哩你一定會諗起沙爹王。而係紋別就一定係諗起呢道「白咖哩海鮮飯」
 
 
▼賣相相當精美,通常佢地會將咖哩圍住邊邊倒一圈。
 
 
▼呢度嘅白咖哩同香港沙嗲王唔同。除咗用咖哩粉同牛奶之外,仲加左特產嘅帆立貝汁,難怪咖哩都可以咁鮮甜!入面有一隻蠔,蟹鉗,蝦,兩粒帶子,蘆筍,茄子!將咖哩倒起周邊咁食,真係好味到不得了!結果又忍唔住食晒成個飯。而且價錢都唔算貴,只係1,080円
 
 
總結:以呢個價錢呢個質素,我只能說無得輸!係香港都會食白咖哩嘅我覺得,呢個咖哩飯簡直係第二個層次。唔計味道,單睇海鮮都已經值回票價。誇張講句,佢係我暫時食過最好味嘅咖哩飯
 
 
3)Mombetsu Central Hotel(かに遊膳)
 
▼最後一間就係「Mombetsu Central Hotel」入面食蟹宴。
 
 
▼呢個「皇帝蟹宴」非常豐富。先黎一系列前菜,打開雕花碗係刺身併盤,三文魚肥美,帶子鮮甜,仲有鯛魚!另附「魚餅」「牛肉露荀卷」魚餅同泰國差唔多無咩特別,但牛肉卷味道香濃,配搭好好。
 
 
▼仲有新鮮帶子同露荀俾你自己用牛油煎,不過記住睇火唔好掛住食呀
 
 
▼蟹腳鮮甜多肉,唔似香港食開嘅阿拉斯加蟹咁咸。
 
 
▼重頭戲!「蟹腳Shabu Shabu」。先將菜放落昆布湯底,再放蟹腳落去淥一淥,大約幾秒就食得。當地人仲教我地邊淥邊唱「Shabushabu~Shabushabu~」時間就岩岩好啦!蟹腳微淥之後都唔會變得死實,反而吸收左湯嘅精華,超好味!
 
 
▼食到中途就會送上新鮮熱辣嘅天婦羅,第一次配綠茶粉食,估唔到又幾特別喎。
 
 
▼其實食到呢度,已經飽到不得了。誰不知原來仲有一碗蟹湯同埋一碗魚子飯。魚子唔算好多但配飯岩岩好。蟹湯一如既往吸晒蟹肉精華,超正,飽死都飲晒佢。
 
 
最後仲附送西瓜同熱茶令整頓晚飯劃下完美句號。而水果係時令,會跟據季節而變化,好似下個月就會轉蜜瓜喇。
 
總結:唔好見我地咁大派頭,其實呢度已經係六人前嘅份量。不過食到一半,其實我地都差唔多投晒降。成個蟹宴每道食品都好出色,如果唔係太飽嘅話,我相信我會連最後個飯都食晒。而重點係,呢度嘅價錢…只係5,400円。價格雖然偏高,但以酒店環境加上食物質素,呢個價錢絕對抵俾。
 
 
 
【海鮮炉端焼き】
地址:北海道紋別市新港町2丁目11番地7
時間:10:00-16:00 
電話:0158-24-1234
 
【Hotel Okhotsk Palace】
地址:北海道紋別市幸町 5-1-35
時間:10:30-21:30 
電話:0158-26-3600
 
【Mombetsu Central Hotel】
地址:北海道紋別市港町7丁目1-58
電話: 0158-23-3111
 
 
特別嗚謝:北海道紋別市 及 H.I.S. 香港支店