快閃北海道紋別之旅(三)親親海豹遊

上個禮拜同大家睇完「海洋生態遊」,去過嚴寒體驗同海底觀望台,今日哩,就同大家繼續去認識其他動物…佢就係紋別市嘅代表「海豹」啦!
 
 
3)Okhotsk Tokkari Center
 
▼離開展望塔之後,大約只需5分鐘嘅車程就可以來到呢個「Okhotsk Tokkari Center」,離遠仲有隻海豹迎接你添。(雖然有少少似係變左種嘅海豹
 
 
▼行多幾步,就可以見到大門啦,有隻肥嘟嘟嘅海豹仔等緊你。
 
 
▼入場之前要先去自動售票機買飛。
 
 
▼呢度每日會有5場嘅「海豹餵食時間」,除此之外仲會有少少表演㗎,時間大約係15分鐘左右。收費為大人200円、小童100円。
 
 
▼到處都可以搵到海豹嘅蹤跡,肥嘟嘟真係幾可愛㗎。
 
 
▼仲有成年同BB海豹嘅身高比例。我貪心地表示…想要成年嘅身高同BB嘅體重 
 
 
▼職員一開始會先呼喚係水入面嘅海豹上岸,佢地可能知道有野食都好快咁爬上嚟(除咗有一隻特別懶同慢之外)真係超得意!
 
 
▼然後仲會逐一介紹下佢地嘅名同性格,好似有隻好怕醜,有隻好懶,有對兄弟成日鬧交。而圖中呢隻…就特別串,你睇佢識得揀個靚位同咁梳乎嘅樣就知啦!
 
 
▼餵食之前,會先檢查佢地嘅身體情況,職員一落指令佢地就會乖乖轉身同埋張大口。如果口腔呈粉紅色,就代表佢地健康啦。
 
 
▼檢查完身體,職員會叫佢地做一啲簡單嘅動作,好似「Say Hi」、「請請」咁,之後就正式開餐啦!最爆笑係,個對成日鬧交嘅兄弟竟然為食魚大打出手
 
 
▼餵食完畢後,你就可以親親海豹,除咗影相之外你仲可以輕撫佢嘅…背脊。不過留意唔好係佢地身上面跨過或者正面經過,因為佢地會驚㗎!正確係從佢地身後繞到旁邊,之後你就可以摸摸佢啦 
 
 
▼除咗成年海豹之外,其實仲有BB海豹係另一邊㗎。職員轉過頭就去餵BB,不過因為佢地仲細,所以就無俾佢地同外界接觸啦。不過無論成年定BB都好,佢地都係一樣咁為食㗎,睇相入面個隻望到人地實一實就知啦 
 
 
▼離開水池區域,佢會有一個位置俾你隔住玻璃睇到係水入面活動中嘅海豹㗎,旁邊仲有介紹佢地嘅資料,我就認唔出啦,你估你地又得唔得呢?
 
 
後記:第一次接觸海豹應該係細細個去海洋公園,如果而家係香港想有呢類型嘅體驗,睇怕都會好貴,所以呢度嘅價錢真係超值。而且海豹們都非常可愛,我地走嘅時侯仲係咁同我地ByeBye,亦睇得出工作人員真係好錫佢地,呢種感覺令人好窩心,所有觀眾都睇得好高興。不過溫提一下,呢度買飛只可以入100円,所以嚟之前記住自備定散紙啦!
 
 
 
 
4)Seal Beach
 
▼如果你為無得餵海豹而感到失望嘅話,就唔駛傷心住啦!因為行去旁邊仲有另一個地方可以俾你親親海豹㗎!
 
 
▼呢度同樣有唔同嘅餵食時間,記住夾好時間先嚟啦。
 
 
▼呢度都有好可愛嘅海豹係度㗎,職員會先示範一次點樣同佢點樣互動。
 
 
▼之後就到我地出場嘅時侯啦,你要將岩岩學嘅應用番出黎,不過當然職員都會係側邊提水啦。好似佢就做緊「拜拜」啦
 
 
▼仲有親親拳頭、揮手打招呼、同埋玩遊戲等等…因為驚整親佢嘅關係,所以我個樣比較猙獰 
 
 
▼佢地咁乖,梗係要獎勵下佢地啦!只要捉住魚仔嘅尾佢地就會過黎食㗎啦。而通常都係一秒內完成,因為佢地食野嘅速度真係非常驚人。
 
 
後記:我本來以為海豹身上係無毛,點知你摸落去,佢會有細細嘅毛毛痴係你手上。不過唔駛擔心,因為每次接觸完海豹之後都有地方俾你洗手。不過海豹真係好聰明同埋好乖,如果可以嘅話,我唔介意攬住佢轉個圈圈先再沖涼,哈哈
 
上集就提到呢4個景點可以排做一日嘅行程,但留意番當中包括「破冰之旅」或者「釣魚之旅」。如果唔係其實半日多少少就可以玩晒呢4個點。或者加番第一集嘅賞花點就可以排滿一日啦,有興趣可以睇番上兩集嘅「快閃北海道紋別特輯」啦!下個星期就會同大家介紹一下紋別嘅美食,記住繼續留意啦 
 
 
【Okhotsk Tokkari Center】
地址:北海道紋別市海洋公園2番地
時間:9:00-17:00
電話:0158-24-7563
收費:大人200円/小童100円
*Seal Beach和Okhotsk Tokkari Center相隣,可徒步到達*
 
 
特別嗚謝:北海道紋別市 及 H.I.S. 香港支店