專欄：[日本在香港]
美國嘅威斯康辛大學麥迪遜分校對全球32個國家嘅「微笑文化」進行左一項查，結果發現相比於情感表露指數最高嘅津巴布韋，指數最低嘅就係香港，反映出香港人最不愛笑。結果，讀賣電視台嘅節目《穴埋めデータSHOW》就睇到依個研究，開始諗要點樣先可以令香港人發笑啦！
佢地派左日本新人搞笑組合「ニッポンの社長」去香港街頭採訪，佢地隸屬於日本著名藝人經紀公司「吉本興業」，主要以漫才去搞笑，嚟到語言不通嘅香港真係一大挑戰啊！
佢地首先嚟到左香港進行街訪，攔截左30分鐘先搵到第一對肯做訪問嘅香港人情侶。「ニッポンの社長」問到底香港人點解唔愛笑，受訪嘅哥仔就話「香港人工時長，工作壓力極大，隨時想笑都唔得」，原來香港人嘅工時係世界第一長，甚至係日本嘅1.5倍，令到好多日本嘅嘉賓都大吃一驚。
知道咗香港人唔笑嘅原因之後，依隊搞笑組合嚟到左旺角行人專用區，仲製作左一個搞笑項目嘅名單，當中25個表演，包括「漫才、顏藝、扮海外明星、食勁辣料理、食勁熱嘅野、棒打屁股、二人接吻、空手接白刃、小劇場、一口氣飲可樂、扮海外名人、估箱中放咗咩、掟蛋榚、扮動漫角色、歌舞伎」等等，去測試有咩橋先會令香港人發笑。佢地開始表演之後，大部份表演都比旺角嘅人表示「無聊」、「好悶」，睇嚟唔識廣東話嘅日本藝人想喺香港搞笑真係有難度。咁樣嘅情況一直持續，直到佢地表演…
依個就係「棒打屁股」！在場嘅觀眾就話「佢痛苦嘅表情好惹笑」「鐘意佢咁大反應」，依個表演竟然可以突破語言嘅隔閡，打中香港人嘅笑穴。喺試過哂所有嘅表演之後，製作組整理左一個「惹笑排名」，睇下香港人嘅笑點係咩啦！
第三名：扮海外名人(Trump同Lady gaga)
首先依個係一個大家理解嘅國際時事梗，就算唔洗講野，個裝扮已經令人一目瞭然做緊乜野。
第二名：棒打屁股
如上述所講，「佢痛苦嘅表情好惹笑」「鐘意佢咁大反應」，電視睇可能覺得無乜野，但現場聽到搞笑組合嘅大叫同誇張嘅表情，可能現場比較有迫力。
第一名：睇二人接吻
依個意想不到嘅結果，日本嘉賓紛紛吐槽「香港到底點解搞成咁！」據節目嘅分析，香港缺少依種兩個男性相吻嘅搞笑，令觀眾感覺新鮮惹笑。
其實小編作為一個香港人，我都好少接觸日式嘅搞笑，對住一啲日本人嘅梗都好明白香港人笑唔出嘅理由…不過小編覺得依隊日本搞笑組合要去言語不通嘅香港去搞笑真係一個好大挑戰，都付出左好多嘅努力，好唔好笑的確係好主觀嘅野，不過佢地嘅努力好值得我地欣賞架！
於是，日本節目成功找出最愛笑嘅香港人嘅笑點，兩人背住維港嘅百萬夜景相擁而吻，幸福地落幕了。
節目資料
ytv《世の中の気になるギモン大調査 穴埋めデータSHOW》
3月10日（六）1:54p.m.～3:30p.m.放送
About Post Author
