最近又再掀起熱潮嘅《百變小櫻》相信唔少人都有聽過或者睇過，望住小狼同小櫻又再次大放「閃光彈」真係勾起唔少童年回憶。其實小狼同小櫻喺作者「CLAMP」嘅世界觀中並唔止一個，唔知大家又知唔知呢？
「CLAMP」作為著名嘅漫畫家團體，曾經連載過不少風格不同嘅作品，當中以《百變小櫻》最為人熟悉。作品喺各方面都會有關聯，例如地點﹑劇情同設定。以最廣為人知嘅《百變小櫻》做例子，製造出古羅卡嘅魔法師古羅不但為《百變小櫻》奠下左劇情嘅基礎，亦都引出左另外兩套作品—《翼之奇幻旅程》及《xxxHOLiC》嘅劇情。而《百變小櫻》嘅人物亦曾相繼於以上兩套作品中出現，揭示左「CLAMP」世界觀中「同一人物於不同世界中有不同生活，但根源相同」嘅基本概念。
人物例子有曾經喺TVB播過嘅《翼之奇幻旅程》（以下略稱《翼》），《翼》嘅劇情前半圍繞住「尋找小櫻公主嘅記憶羽毛」而展開一連串嘅次元旅程，劇情中亦曾經出現《百變小櫻》嘅其他人物，例如旅程起源嘅玖樓國國王桃矢同祭司雪兔等等，如果有睇過「CLAMP」其他作品都可以試下喺《翼》搵下見過嘅人物，話唔定會係意想不到嘅設定。
而劇情相連嘅例子就有《翼》同《xxxHOLiC》，《xxxHOLiC》以次元魔女壹原侑子同男主角四月一日君尋嘅相遇作開始，以實現不同人嘅願望作為劇情基礎。同《翼》一樣，《xxxHOLiC》屬於少年風格，以「實現願望」為中心，集合不少嘅短篇劇情。漫畫及動畫中《翼》一行人亦曾以「等價交換」作為條件獲得侑子嘅幫助，其中一個例子就喺《翼》嘅小狼以「同小櫻公主嘅關係性」交換穿越次元嘅能力。
除左以上三套作品之外，「CLAMP」亦有唔少作品值得一睇，亦有不少動畫化作品，例如《奇蹟少女KOBATO.》同《Chobits》等等。大家都可以試下喺「CLAMP」嘅作品中搵下自己鍾意嘅風格，一探「CLAMP」龐大嘅世界觀。
About Post Author
