【快速醫肚最佳之選！】便利店「4大必試新飯糰」！

去親日本都會忍唔住入便利店睇吓有咩好野食，望住出哂煙嘅關東煮同熱櫃入面香噴噴嘅炸物，有時真係好難忍到手！好似以下4件Family Mart將會喺4月18日推出嘅飯糰，即使係啱啱食完正餐，都會心思思想買返件過吓口癮！

1. 火炙豚肉飯糰 ¥230

睇個賣相就知夠霸氣！呢個飯糰以兩大塊用明火燒過嘅豚肉將米飯緊緊包住，豚肉焦香得嚟夠軟腍，一啖咬落去肉汁慢慢滲出黎，質素遠遠超越¥260飯糰水準！

2. 爆彈炸雞飯糰 ¥230

呢個飯糰嘅最大賣點就係餡料多得驚人，係平時嘅4倍，第一啖就輕易咬到中間嘅炸雞！最鍾意佢以沙律醬調味，酸酸地越食越開胃！

3. 糖心蛋飯糰 ¥128

講到飯糰又點少得包住糖心蛋嘅經典飯糰！米飯事先以醬油調味，加埋中間爆漿糖心蛋，去日本唔食返件個心硬係會囉囉攣！

4. 青磯海苔吞拿魚飯糰 ¥140

比起中間帶微辣嘅吞拿魚，呢個飯糰外層嘅海苔原來更大有來頭，以青磯海苔取代一般調味海苔，夠健康之餘味道更忠於原始，係飯糰中經典嘅經典！