7月7日嘅離奇「校庭塗鴉事件」

唔經唔覺日本嗰邊今年又到咗佢哋嘅七夕。七夕話晒都係日本人幾重視嘅季節之一，唔單止係現實中嘅日本人，傳統習俗喺竹葉綁上詩箋嘅劇情喺眾多ACG作品入面已經屢見不鮮。當中有唔少更加關係到重大劇情。

好似喺《涼宮春日的憂鬱》系列小說第三冊《涼宮春日的煩悶》其中一篇故事——《竹葉狂想曲》，就係以七夕為背景，經已開始習慣SOS團打雜生活嘅男主角阿虛，受未來人朝比奈美玖瑠拜託，一同前往3年前嘅七夕。

不過一抵達3年前，朝比奈就突然失去意識，同時來自更遠未來嘅大人版朝比奈突然由後面行出嚟，同佢解釋今次嘅任務，於是阿虛就按著佢嘅指示「奔走」。

所謂嘅指示，其實係要阿虛嚟東中學校。喺一個正常唔會有學生留低嘅夜晚，阿虛揹住訓著咗嘅朝比奈遇到仲係中一學生嘅涼宮春日。事實上阿虛嚟到呢度，就係為咗幫涼宮春日喺校庭完成佢所謂留比外星人嘅巨大訊息，訊息嘅意思係「我喺呢度」。

呢單野令到涼宮春日喺市內同世代嘅學生嚟講幾乎無人不識，甚至乎更加上過市內嘅報紙。告別之前，阿虛更自稱自己係「約翰‧史密斯」，呢個名嘅係早喺第一冊《憂鬱》埋下嘅伏筆，同時又繼續成為今後故事嘅伏筆。

無幾耐，醒過嚟嘅朝比奈發現自己無咗TPDD而無法用嚟到呢個時間(嘅方法返去原來嘅時間。不過阿虛因為長門喺七夕送比佢嘅詩箋突然醒起，就去咗搵呢個時候仲喺待機模式嘅長門求助。長門送比阿虛嘅詩箋其實就係比3年前嘅自己嘅訊息，令3年前嘅自己理解狀況，協助嚟到3年前七夕嘅阿虛同朝比奈。

3年前嘅長門要阿虛同朝比奈留喺一個房間入面，再透過凍結房間入面嘅時間嚟時光旅行返去3年後嘅七夕晚上。感覺上遠比未來人萬能嘅外星生命體用嘅時光旅行方法反而比未來人更簡單。

返到原來嘅七夕，《竹葉狂想曲》就此結束。雖然《竹葉狂想曲》當年解啲唔解啲，但唔多唔少都解釋咗初次見到時涼宮春日對阿虛講嘅一番摸不著頭腦嘅說話，初出時甚至有人覺得呢段劇情無關重要。

不過一等到為下一冊小說推出，即係堪稱為系列巔峰嘅第4冊——《涼宮春日的消失》，大家至發現呢一段嘅含意並唔係只係鋪排咁簡單。

經歷完《消失》種種波折，阿虛返到嚟3年前嘅七夕，望住幾個月前嘅自己，又有一番感受。然後喺再一次臨前去搵「長門大明神」求救之前，再同返緊屋企嘅春日講「請多多關照令世界更加轟轟烈烈嘅約翰．史密斯」。

小編認為，《竹葉狂想曲》其實先係《涼宮春日的消失》真正嘅序章，但並唔係一個前傳，因為兩者其實唔可以分割：《消失》入面阿虛經歷完一個深刻嘅體驗，再次回到三年前嘅七夕，其實此「約翰」不同彼「約翰」。《消失》之所以獲眾多粉絲認為係系列巔峰，其實唔單止係劇情，呢一連串嘅故事亦同《涼宮春日》呢個系列嘅中心思想相當有關係。

縱然《消失》喺電影中映像總係冰天雪地，但可能喺阿虛嘅心目中，由《竹葉狂想曲》去到3年前嘅長門講解邊個係《消失》嘅凶手以前，天氣仍然同3年前嘅七夕一樣咁熱。