[日本在香港]Kis-My-Ft2 北山同「成員」們嘅10萬円之旅

[日本在香港]Kis-My-Ft2 北山同「成員」們嘅10萬円之旅

[專欄:日本在香港]

大家有冇計過自己喺香港一日會使幾多錢呢?根據政府統計處2014/15年度嘅調查,香港人平均每月支出HKD$9253,除開都成$304一日架。但今次Kis-My-Ft2嘅北山宏光帶埋6位「成員」窮遊香港,計埋酒店同機票錢都係得¥14285(以$1=¥14匯率計算,約$1020)去享受2日1夜嘅香港之旅!

講緊嘅係《10万円でできるかな(用10萬円做唔做到呢)》呢個由傑尼斯事務所旗下組合Kis-My-Ft2同搞笑藝人組合サンドウィッチマン共同出演嘅節目,每逢星期二深夜喺朝日電視台播出。每一集都會有一名Kis-My-Ft2嘅成員出外景挑戰一啲可能用10萬円就做到嘅事,今次北山嘅題目就係「7個人可唔可以用10萬円去海外玩兩日一夜?!」可惜因為檔期緣故,北山以外既成員由節目工作人員代替,一行七人向香港出發。除咗要完成2日1夜嘅行程外,仲要完成節目畀佢哋嘅7個任務。

[日本在香港]Kis-My-Ft2 北山同「成員」們嘅10萬円之旅
去到香港一定要享受嘅7件事
1. 美食 2. 絕妙嘅景色 3. 啤酒 4. 手信
5. 寺廟 6. 好啱post上instagram嘅牆 7. 甜品

 

[日本在香港]Kis-My-Ft2 北山同「成員」們嘅10萬円之旅

成日聽電視節目講要窮遊,但真正做到嘅又有幾多人?今次北山真係由一開始就貫徹窮遊精神--坐廉航!一聽到來回未計稅連¥10000都唔使,北山同サンドウィッチマン伊達幹生都忍唔住嗌「好平呀!」節目仲特登挑選淡季出埠,自然慳唔少啦。

不過都未去到香港,每個人嘅預算已經冇咗一半啦。扣埋來回東京同香港嘅機票、一晚住宿費同來回機場同市區嘅交通費之後,竟然得返¥2675(約$191)!作為觀眾嘅我反應相信都係同北山一樣:「咁少?!」

[日本在香港]Kis-My-Ft2 北山同「成員」們嘅10萬円之旅

~到現時為止嘅使費~
機票 ¥9160(未計稅)
旅館 ¥1680
機場巴士來回車票 ¥770
餘額:¥2675

任務一:美食

北山一行人搭巴士出到「好似新宿咁嘅鬧市」旺角。好快佢就比咖喱魚蛋吸引咗視線,但就以為佢係番薯或者薯仔,仲聽錯係棒球?,好彩得到老闆娘解畫。見到魚蛋又平又好食,北山就決定幫襯呢間食店,點知一睇menu,一碗麵已經超過咗呢一餐嘅預算!最後佢嗌咗豉油王炒麵同一串咖喱魚蛋,仲大讚好食~サンドウィッチマン望到都流曬口水,冇諗過200幾円已經有咁大碟麵。

[日本在香港]Kis-My-Ft2 北山同「成員」們嘅10萬円之旅
「呢個配啤酒就正啦!」

~到現時為止嘅使費~
豉油王炒麵 ¥238
咖喱魚蛋 ¥140
餘額:¥2297

任務二:絕妙嘅景色

相信每一本介紹香港嘅旅遊書都一定會提及「百萬夜景」,節目組同北山當然都唔會錯過。去到尖沙咀啱啱好趕到睇幻彩詠香江!

[日本在香港]Kis-My-Ft2 北山同「成員」們嘅10萬円之旅
「對唔住呀 過得咁充實」

~到現時為止嘅使費~
交通費(港鐵) ¥77
餘額:¥2220

任務三:啤酒

頭先北山食完魚蛋之後話想飲啤酒,善良嘅工作人員為咗要圓佢呢個夢(同埋個任務),買咗兩支啤酒7個人分。但因為冇錢買小食送酒,工作人員就帶咗北山上山頂。一睇到咁靚嘅景色,無論係北山定サンドウィッチマン都望到呆咗,「好勁啊!」可以望住夜景歎啤酒,真係成個人生大贏家咁!

[日本在香港]Kis-My-Ft2 北山同「成員」們嘅10萬円之旅

~到現時為止嘅使費~
交通費(天星小輪、巴士) ¥189
啤酒 ¥36
餘額:¥1995

任務四:手信

喺サンドウィッチマン嘅質疑之下,北山成功喺男人街(廟街)買到手信比佢地,完成第四個任務!雖然成個過程都被店主阿姨冷漠對待咗好幾次,又「NO!」又「I donʻt know you!」咁,辛苦曬啦。

[日本在香港]Kis-My-Ft2 北山同「成員」們嘅10萬円之旅

[日本在香港]Kis-My-Ft2 北山同「成員」們嘅10萬円之旅

~到現時為止嘅使費~
交通費(天星小輪、巴士) ¥189
手信 ¥420
餘額:¥1386

北山返到旅館時已經係凌晨。窮遊當然冇得自己一個一間房,7個人只能分兩間房瞓。好彩旅館麻雀雖小五臟俱全,都算幾方便。正打算休息嗰陣就傳來惡耗--佢地每人得返$99咋!

[日本在香港]Kis-My-Ft2 北山同「成員」們嘅10萬円之旅
「喺東京唔會連飯都食唔到啩?」

不安咁過咗一晚,第二朝晨咁早佢就同街方一齊耍太極。留意返,拍攝個時係9月尾,即使係朝早都成32度架。買完菜肉包做早餐之後就開始呢一日行程嘅首站黃大仙廟。點知⋯⋯

任務五:寺廟

由旺角出發去黃大仙嘅方法竟然係踩單車!雖然唔係平得好多,但勝在可以睇下風景吖嘛。用咗半個鐘佢就到咗啦。買香參拜佢仲嘗試擲筊,睇下自己應唔應該搬屋咁話。結果就當然唔方便劇透啦,話晒小編都係個好孩子(自稱)嘛。

[日本在香港]Kis-My-Ft2 北山同「成員」們嘅10萬円之旅

~到現時為止嘅使費~
菜肉包 ¥98
交通費(單車) ¥70
香 ¥39
餘額:¥1179

任務六:好啱post上instagram嘅牆

睇到呢個標題可能你會覺得有啲奇怪。牆?冇錯,近年日本好流行搵一啲特別嘅牆作背景影相再post上instagram,唔少女高中生同明星都有咁做。為此,北山一行人都特登過海去到「香港代官山」中環。代官山係東京其中一個嘅潮人聖地,喺佢地眼中完美地融合咗中西文化嘅中環同佢十分相似。

[日本在香港]Kis-My-Ft2 北山同「成員」們嘅10萬円之旅

打完卡後都差唔多時候啦。北山坐返小輪去到尖沙咀,因為係閒日所以連¥50都唔使! サンドウィッチマン再次表示:「真心平呀!」。落咗船之後剛好係午飯時間,雖然銀兩已經所淨無幾,不過佢都係決定搵咗間茶餐廳食飯。入面都有唔少令佢驚訝嘅地方,例如所有燒味飯都只係收$30,仲有啲餐具放咗喺餐枱嘅櫃桶裡面等等。嗯,日本又好似真係比較少見嘅。

佢嗌咗碟叉燒飯,仲有例湯送,兩樣都咁好味。點知一睇清楚碗湯嘅真面目⋯⋯係雞腳呀!!!鳳爪本身已經衝擊唔少日本遊客,今次北山都無法倖免,只能講一句「真係好雞呀!」(サンドウィッチマン補充:唔係唔應該show出嚟㗎咩⋯⋯)

[日本在香港]Kis-My-Ft2 北山同「成員」們嘅10萬円之旅

~到現時為止嘅使費~
交通費(港鐵+天星小輪) ¥241
叉燒飯+例湯 ¥420
餘額:¥518

任務七:甜品

節目提到香港被譽為「甜品天堂」。係真唔係就見人見智啦,不過確實香港都幾多甜品舖吖。身上得返唔夠$40嘅北山就畀其中一間出名食芒果甜品嘅連鎖店吸引,點知一入去就發現佢想食嘅甜品要$80有多先食到!

好彩今次仲有6位「成員」,就可以採取share嘅策略,7個人分享3份甜品,食完都仲有$12剩低! 咁啱就比佢見到好似咖啡啫喱嘅龜苓膏,啱啱好$12,佢就決定要賭返舖。結果⋯⋯

[日本在香港]Kis-My-Ft2 北山同「成員」們嘅10萬円之旅
「好難食!」果然係伏爾泰個朋友伏已中!

嗯,睇嚟龜苓膏唔太對佢口味,可惜已經冇錢買嘢清下口腔啦。佢嘅香港之旅最後就以呢個「謎之龜啫喱」劃上句號。

~到現時為止嘅使費~
甜品 ¥350
龜苓膏 ¥168
餘額:¥0

總括而言北山都覺得今次窮遊香港係開心嘅,サンドウィッチマン兩位都話正,會吸引更多人去香港玩呀。睇返Twitter上網民嘅反應,唔少飯當然想去一趟香港踩點,就連唔係飯嘅睇完都好想嚟!

[日本在香港]Kis-My-Ft2 北山同「成員」們嘅10萬円之旅
「唔係J家飯嘅朋友同佢個女睇完北山嘅節目之後好想去香港,問我去唔去~好猶疑~」

雖然兩日一夜未能夠將香港嘅魅力收錄曬喺鏡頭裡面,不過喺更加多人認讓香港唔同一面嘅同時我都再次以日本人嘅角度睇到另一個香港。今次北山作為日本代表窮遊香港,下次可能就到你代表香港試下窮遊日本啦!