[乃木坂46即將襲港] C3AFA乃木坂46來港成員介紹 (上)

2月11號日本女子組合乃木坂46將會參與喺亞洲國際博覽館舉行嘅「C3AFA PRESENTS I LOVE ANISONG HONG KONG 2018」，出席成員為齋藤飛鳥、生田繪梨花、中田花奈、高山一實、秋元真夏、星野南、堀未央奈、衛藤美彩、西野七瀬、櫻井玲香、井上小百合、松村沙友理、若月佑美以及斉藤優里共14人。先前已經重點介紹左西野七瀨同齋藤飛鳥，今次就等我地認識其嘅成員啦。

—————————–
C3AFA來港成員介紹 (下): www.likejapan.com/nogizaka46hk5

圖片：C3AFA官方發佈嘅來港成員名單

（以下成員排名不分先後）

1. 生田繪梨花（生田絵梨花）

出生日期：1997年1月22日

暱稱：Ikuchan（いくちゃん）、Erika（えりか）

螢光棒應援色：黃色×黃色

出生於德國杜塞道夫，現役音樂大學生嘅生田，自細就學習鋼琴，喺演唱會同電視節目中，亦都多次展示過佢高超嘅琴藝。次前佢出演過音樂劇《悲慘世界》嘅重要角色，嚟緊5月亦會參與《Mozart》嘅演出。作為乃木坂46數一數二嘅實力唱將，佢喺上年聖誕節當日就舉行咗同電視台同步直播嘅個人不插電音樂會，成為團內首位開過Solo live嘅成員。

圖片：生田在節目上大展琴技及唱功

單從外表嚟睇，生田的確喺散發住大小姐嘅氣質，不過佢有一個好萌嘅屬性，就係雖然係大胃王，但係其實係唔識煮野食，奇異既畫畫風格同趣怪嘅表情等，都令佢經常成為節目中活躍嘅綜藝掛之一。不過具備優秀實力同反差萌亦令佢得到唔少人嘅支持同肯定。

2. 櫻井玲香（桜井玲香）

出生日期：1994年5月16日

暱稱：Reika（れいか）

螢光棒應援色：紅色×粉紅色

明明係隊長，但係就有個廢柴嘅角色定位，佢曾經係節目體驗做節目助理，但開始無耐就走咗去訓覺，搞到個企劃最後被強制中止（笑）但係其實都只係節目效果啫，實際上佢一直都好關心同默默地留意住成員，係個被大家信任嘅稱職領軍人物。

圖片：嬌小玲瓏既隊長係節目到要抬住2米高既熊公仔返去

玲香係女校出身，同團內另外3位成員組成咗一隊名為女子校Quartet（女子校カルテット）嘅小分隊，已經出咗2首好好聽嘅unit曲㗎喇。個人方面玲香有出過個人寫真集，係NYLON JAPAN嘅專屬模特兒，又有定期出演教授韓文嘅節目。憑住穩定嘅歌唱實力，演出舞台劇時展現嘅出色演技，同堆佢嗰個富有外國人特色嘅外表同大小姐般嘅氣質，令玲香躋身成為人氣成員之一。

3. 高山一實（高山一実）

出生日期：1994年2月8日

暱稱：Kazumin（かずみん）、Zuu（ずー）

螢光棒應援色：淺藍色×粉紅色

擁有「Amazing」（アメイジング）」、「Posi-Peace（ポジピース）」等有趣嘅梗，係團內嘅「開心果」。特技係玩咗10年嘅劍道，亦係雜誌上有原創小説嘅連載，可以講係文武雙全。假如要用兩個字嚟形容高山，佢就係一個「好人」。

圖片：確認對方唔係專登倒瀉水，綜藝效果十足既高山

係電視節目《乃木坂工事中》一次嘅單曲大賣祈願企劃中，包括高山在內嘅三位成員，佢哋總共需要抬19桶水去神社嘅所在地。期間幾位成員需要多次來回上落單程大約300級嘅樓梯，係一件非常消耗體力嘅事。途中另一位成員唔小心倒瀉左水，浪費咗嗰一轉嘅心機，高山不但只無怪對方，仲主動由樓梯底部抬水去同伴倒瀉水嘅地方，去協助完成嗰次嘅任務。其實高山喺體貼同溫柔方面仲有其他各種大小嘅事例，相信大家都會好羨慕點解身邊無幾何會遇到一個咁幽默又咁溫柔嘅人（笑）

4. 若月佑美

出生日期：1994年6月27號

暱稱：Wakatsuki（わか）、Wakasama（若様）

螢光棒應援色：藍色×藍色

要數女性粉絲比例最高嘅一定唔可以計漏若月，因為佢可以話係團裡而著男裝著得最靚仔嘅成員！不論喺《Nogibingo》定《乃木坂工事中》嘅短篇戲劇演出，基本上佢都係御用男役，相信佢每次出場都會迷倒唔少成員同粉絲。

圖片：男裝打扮嘅若月（最左）的確係好有型！

若月出名係一個好認真嘅人，有一集節目仲專登幫佢擺脫過於認真嘅形象，結果就為「筷子君（箸くん）」呢個原創梗打響咗名堂，亦令若月收到大量筷子做禮物！第19張單曲嘅收錄曲目，就有佢同三個三期生組成咗若樣軍團， 若月正正就係當中既筷子擔當。仲有，若月嘅美術造詣一直得到周遭嘅好評，佢嘅作品已經連續六年入選日本知名美術展覽「二科展」嘅設計部門。同時佢係舞台劇演出上都相當活躍，係《吸血鬼騎士》、《犬夜叉》等先後搶任主要角色，表演力備受肯定。

5. 秋元真夏

暱稱：Manatsu（真夏）、Manattan（まなったん）

出生日期：1993年8月20日

螢光棒應援色：紅色×粉紅色

真夏係學生時代做過學生會會長，當時亦加入過料理部所以煮野食好叻。但受學業原因影響，初期參與唔到同乃木坂46相關嘅演藝活動，之後喺第4張單曲《制服模特兒》到又空降咁入咗選拔，搞到同西野七瀨關係尷尬，好彩最後佢哋都公開和解咗。

圖片：係節目上使用必殺技嘅真夏

必殺技係「Zukkyun」（ずっきゅん）嘅開槍動作，但經常冷場。真夏經常被人講笑話佢個頭好大，戴帽嗰陣都好似見到頂帽浮緊咁，為大家帶嚟好多歡樂。最有趣就係佢同黑石桑（黑化咗嘅白石麻衣）嘅互動，例如見到真夏為咗節目效果而刻意扮傻，鏡頭就會轉向露出不屑表情嘅麻衣到。真夏有時會係演唱會等故意跌低，吸引大家注意嘅同製造笑點。佢亦推出過個人寫真集，仲同3個二期生組成小分隊「真夏Respect軍團」（真夏さんリスペクト軍団），擁有軍團嘅unit歌曲。

6. 衛藤美彩

暱稱：Misa-senpai（みさ先輩）、Misamisa（みさみさ）

出生日期：1993年1月4日

螢光棒應援色：紅色×紅色

散發著姐姐氛圍嘅美彩喺加入乃木坂46之前已經有演藝經驗，一開始佢並唔係受到官方力推嘅成員，但係憑住努力漸漸爭取到前排嘅機會。另外，鍾情於梅酒同燒酌嘅佢，係少數會喺節目上飲酒同公開自己鐘意飲酒嘅成員，之前就試過有一枝叫做「美彩淡露」嘅酒，被佢提過就銷量倍增。

圖片：當時美彩係節目上進行同酒有關既企劃

美彩係公認握手對應好嘅成員之一，握手人氣係全團頭個幾名。佢推出過商業書同個人寫真集，依家係美人百花嘅常規模特兒。最近佢亦都同另外兩位成員演出舞台劇《三人姐妹》。

—————————–

乃木坂46入門介紹: www.likejapan.com/nogizaka46hk1
中心成員 西野七瀨: www.likejapan.com/nogizaka46hk2
中心成員 齋藤飛鳥: www.likejapan.com/nogizaka46hk3
C3AFA來港成員介紹 (上): www.likejapan.com/nogizaka46hk4
C3AFA來港成員介紹 (下): www.likejapan.com/nogizaka46hk5