《胃食島根》:人氣最高結緣神社 著和服逛街+甜品+手信

講到島根縣最出名嘅就緊係求姻緣靈啦!

而佢哋嘅結緣神社亦都有非常多,今次胃食島根就同大家去到最出名的出雲大社同附近,一邊著住靚靚嘅和服一邊食下野行下街啦!

———————————

第一站  出雲大社レンタルKIMONO ご縁スタイル

首先我哋第一站嚟到一間叫「ご縁スタイル」嘅和服店租件靚和服,佢哋有好多唔同出租Plan同款色嘅和服可以揀,價錢為2900Yen至4800Yen(不連税)不等,去前需要先予約。因為當日落雪而且天氣比較凍,所以我就揀咗有加外套嘅4800Yen Plan,當你揀好咗自己想要嘅Plan同和服之後,就會有專人幫你著~如果唔知點配色好,佢哋都會俾專業嘅意見俾你襯衫㗎~

另外如果想Set埋頭嘅話,加多1000Yen(不連税)就可以連頭一齊幫你整埋㗎啦!

姐姐們非常熟手,大約20-30分鐘左右就已經由頭到腳完成哂~大家睇下係咪好靚呢~

揀埋自己鐘意嘅手袋同外套就可以出發去出雲大社㗎啦!

提提大家如果係冬天去,就算加咗外套都會好凍,所以最好去之前要打好底先去阿!而歸還和服方面要記得要喺當日下午5點之前就要還㗎啦!

 

出雲大社レンタルKIMONO ご縁スタイル
〒699-0711 島根県出雲市大社町杵築南784番地1
營業時間:10:00~17:00(逢星期一休息)
詳細:http://www.goen-style.com/

———————————

第二站 出雲大社

由「出雲大社レンタルKIMONO ご縁スタイル」去出雲大社只需要3分鐘左右,著住件靚和服,去到出雲大社入口就緊係要影返張相先啦!

出雲大社係日本國內數一數二嘅結緣神社,一年會有超過600萬人到訪,而男女姻緣之外,事業,朋友,家庭的結緣亦都非常之靈,所以除咗外國人旅客之外,就連日本本地旅客都會為咗求姻緣而遠渡而嚟!

有傳說話從前出雲大社嘅神「大國主大神」去因幡(即現今鳥取東部)嘅時候,途中救咗因為受傷咗嘅兔仔嘅故事,所以會見到出雲大社入面會有好多可愛嘅兔仔石像出現!


 

一般神社嘅參拜方式都係用二禮二拍手一禮,而出雲大社就比較特別,佢哋係二禮四拍手一禮,所以大家去參拜之前要留意啦~出雲大社內有好多唔同嘅神社,天氣好嘅時候慢慢行,散散步影下相,好舒服㗎!

出雲大社
〒699-0701島根県出雲市大社町杵築東195
官方網站(日文):http://www.izumooyashiro.or.jp/
官方網站(英文):http://www.kankou-shimane.com/en/?p=4392
 

———————————

第三站 出雲ぜんざい餅

行到攰可以去出雲大社附近食嘢休息下,由其係出雲嘅名物「出雲ぜんざい」紅豆年糕就一定要試,ぜんざい嘅漢字姐係善哉咁解,傳說話每年農歷10月全國嘅神會聚埋嘅「神在祭」入面用嚟招待客人嘅一個紅豆年糕,亦都有人話食咗「出雲ぜんざい」之後會有好嘅姻緣來臨。

依一間「出雲ぜんざい餅」有唔同口味嘅紅豆年糕可以揀,今次我就揀咗最基本嘅紅豆年糕(600Yen)同抹茶口味(750Yen),如果叫紅豆年糕套餐(1000Yen)仲會多一杯咖啡同咖啡豆嘅小禮物添!

甜而不膩嘅大大粒紅豆再加上彈牙嘅年糕真係暖到入心阿!另外抹茶口味每一碗都係人手手打,微苦嘅抹茶配甜甜地嘅年糕同紅豆,唔食得太甜嘅人就岩哂啦!

出雲ぜんざい餅
地址:島根県出雲市大社町杵築南840-1 ご縁横丁内
營業時間:9:00~17:00
※營業時間於3月中旬更改至 8:30~18:00

想知道出雲大社附近仲有咩其他嘢食,可以去官方網站:
http://www.kankou-shimane.com/sweets/index.html

———————————

第四站 手信店

食完野休息完最後就緊係要買手信返屋企啦!出雲大社附近有好多唔同有關結緣主題嘅手信店,好似依一間筷子店「ひらの屋」就有好多好靚嘅結緣筷子,想要嘅仲可以刻自己同對方嘅名入去,自用又得,送俾人做禮物都好受歡迎㗎!

ひらの屋
地址:島根県出雲市大社町杵築南838-6
營業時間:9:30~17:00

———————————

另外依一間賣結緣飾物同雜貨嘅「えすこ」,除咗有好可愛嘅裝飾雜貨食品之外,仲有好多現成已經整好嘅水晶同勾玉嘅飾物,佢哋每一粒勾玉或者水晶都有唔同嘅效果同功能,如果睇唔同中想要嘅,仲可以親手整自己獨一無二嘅結緣手飾添㗎!

えすこ
地址:島根県出雲市大社町杵築南841
營業時間:09:00~17:00

想知道出雲大社附近仲有咩其他手信買,可以去官方網站:
http://www.izumo-kankou.gr.jp/2408

———————————

喺依到提一提大家,喺出雲大社附近租和服嘅朋友可以於和服店內得到本叫「出雲路KARANKORON」嘅小冊子,著住和服拎住依本小冊子可以得到唔同嘅優惠,好似頭先介紹嘅「出雲ぜんざい餅」咁,只要你點一碗「出雲ぜんざい」就可以得到佢哋好好食嘅紅豆餅(3個)同埋可以喺出雲大社門口影一張即影即有㗎!仲可以帶張即影即有返去添!記得拎份出雲路KARANKORON小冊子周圍去玩啦!

縁結び観光協会
http://www.en-musubi.net/izumojikarancoron.html

出雲観光協会
http://www.izumo-kankou.gr.jp/english/

——————————-

想知道更多島根縣嘅資訊,可以留意埋下面島根縣嘅Facebook↓

Visit Shimane – 日本島根 (島根縣香港官方Facebook)↓
https://www.facebook.com/visit.shimane.japan/

Discover Shimane (島根縣英文官方Facebook)↓
https://www.facebook.com/discover.shimane/

仲可以Follow埋島根縣的IG ↓
https://www.instagram.com/discover.shimane/