【羽田機場】機場出市區 交通方法大整合！

羽田機場距離東京市區十分近，車費較平，唔少人都認為比成田機場更方便！今篇介紹羽田機場去東京市區嘅交通方法，比大家參考下所需時間同價錢！

普遍嚟講，羽田機場出東京市區大概需要30分鐘，主要交通有單軌列車、京急電鐵同機場巴士。

東京單軌列車

	單軌列車
費用(yen)	500
車程	約13分鐘
班次	約5-10分鐘一班
備注	以濱松町站為目的地計算
	建議買單軌列車＋山手線優惠票

要去新橋、東京車站、秋葉原同上野等地方，建議你搭東京單軌列車，車程會較短！

由於東京單軌列車嘅驗票口，與羽田機場國際線大樓嘅出入境大廳相連，旅客入境後能快速到達搭車位置，十分方便！單軌列車最快只需約15分鐘就到達濱松町站，大家可以按目的地，再轉乘JR山手線或JR京濱東北線。

而單軌列車分為三種，以終點係濱松町站為例，票價統一為500yen。不過，每款嘅停靠站數有別，大家要留意！

「普通」：每站都會停，行經羽田機場各站、天空橋站、整備場站、昭和島站、流通中心站、大井競馬場前站、天王洲Isle站同濱松町站。

「區間快速」：行經羽田機場各站、流通中心站、大井競馬場前站、天王洲Isle站同濱松町站。

「空港快速」：行經羽田機場第一、第二同國際線航廈，再直到濱松町站 。

如果選擇轉乘JR山手線，建議買500yen嘅單軌列車＋山手線優惠票，價錢包咗由機場到濱松町站，再轉乘山手線到任何一站。換言之，比多10yen就可以搭埋JR山手線，抵好多！ 於濱松町轉車前往東京、秋葉原、上野等山手線車站特別方便！

*以上優惠票只限星期六、星期日及日本國定假日，於羽田機場各站的售票機發售。

如果係由日本其他地方坐國內線去羽田嘅朋友，閒日都可於出發機場購買來回車票，800yen(新千歲機場、函館機場、富山機場、小松機場、伊丹機場、關西機場、岡山機場、廣島機場、山口宇部機場、高松機場、福岡機場、大分機場、熊本機場、宮崎機場、長崎機場、鹿兒島機場、那霸機場有售)

詳情可以睇 東京單軌列車 。

京急電鐵

	京急電鐵
費用(yen)	300 (IC Card：292)
車程	約15分鐘
班次	約5-10分鐘一班
備注	以羽田機場第一國際線航廈出發、品川站為目的地計算
	建議買東京地鐵＋都營地鐵24-72小時券

要去澀谷、新宿、池袋等東京西半部地區，建議你搭京急電鐵，時間會較快！

京急電鐵最快只需20分鐘，就到達品川站，方便大家轉乘JR山手線、JR京濱東北線、JR東海道線、JR東海道線，或都營地鐵淺草線等。而京急電鐵分為五種，以品川站為終點嘅票價係292yen，但各自停靠站數有別，大家要注意！最快嘅方法係搭「機場快特」，由國際線航廈出發，只需12分鐘就直達品川站。

*「機場快特」只停大站，如果要去其他車站，建議先Google搵出適合班次，或直接向職員查詢，因為京急電鐵路線較複雜，有機會搭錯車！

京急電鐵同樣有優惠車票組合，多數人會買東京地鐵＋都營地鐵24-72小時券，先搭京急電鐵到泉岳寺，再自由搭乘東京Metro地鐵及都營地鐵。大家可到京急旅遊服務中心購買。

詳情可以睇 京急電鐵 。

機場巴士

	機場巴士
終點	澀谷	新宿
費用(yen)	1100	1300
車程	約45-50分鐘	約40分鐘
班次	約30-60分鐘一班	約15-25分鐘一班

*以羽田機場第一國際線航廈出發計算

如果你有大件行李，想直達目的地，而目的地附近有機場巴士站，可以搭機場巴士。

利木津巴士有多條路線，到達橫濱站、台場、澀谷等地方，價錢各有差別！如果去澀谷，約30分鐘一班車，車程約50分鐘，單程車費係1100yen；如果去新宿，約15分鐘一班車，車程約40分鐘，單程車費係1300yen。

受到疫情影響，利木津巴士的巴士路線（如東京站）有不少都暫時停運，巴士的班次亦有作出調整。建議各位預先上網查清楚，以免白行一趟！而除了IC Card付款外（PASMO、Suica），某些路線也有提供上網預約，分別可以在利木津巴士官網或其他網站預約付款。

詳情可以睇 利木津巴士 。

的士

羽田機場同樣有定額的士服務，距離市區又唔太遠，所以部分人會選擇搭的士。以機場官網資料，去澀谷地區嘅定額車資為6800yen，而新宿地區就係7300yen。要注意深夜班次(22:00～5:00)是會比較貴的，而且除了定額車資之外，如果要額外使用收費道路，乘客需自行承擔使用費（定額車資預設為行駛「首都高速公路」）。

	的士
終點	澀谷	澀谷
定額費用(yen)	6800	7300
深夜班次費用(yen)	8100	8600

詳情可以睇 羽田機場網站 。

圖片來源：JReast、Keikyu Web、Haneda Tokyo Access、Haneda.keikyu.tc (Facebook)