唔知大家仲記唔記得,之前我地嘅節目《香港人日記 藍與白的3米3》訪問過一對喺東京開粥店嘅香港人夫婦呢?上次睇過佢地追夢嘅故事,今次就聽下男主角Henry分享佢喺日本開店嘅心得啦!

 

日本開店入場費 最少一年500萬

想知點喺日本開店,首先要知道自己開唔開得起ww

如果想拎投資經營簽證,親身過日本做老闆,一年最少要投資500萬日元去間公司到,包括舖租、員工嘅人工、宣傳費等等。留意:依500萬日元係唔包括入貨等開支㗎!

 

假如冇500萬又想去日本開店的話…

如果你嘅投資金額唔夠500萬,有冇其他方法可以拎到投資經營簽證呢?

有!就係請一、兩個日本人做全職員工啦!因為2個日本員工嘅人工,1年加埋就差唔多等於500萬,所以大家都可以選擇唔投資500萬而係請個日本人。不過Henry就覺得投資500萬容易得多:「因為如果你唔係一間海外嘅大公司,只係一間小店的話,真係好難請到個日本人幫你打工囉!」

 

老闆都要出人工畀自已

提提大家,就算你已經投資咗500萬日元開公司,另外仲有一筆錢係一定要洗嘅,就係要出人工畀你自己啦!Henry解釋:「由於日本政府要確保你有足夠嘅錢生活,先會畀個VISA你留喺日本,所以你間公司每個月都要出到大約25至28萬日元嘅人工畀你自己先得!」咁計落,一個人要喺日本以經營簽證開公司,就需要大約500萬+25萬X12=800萬日元1年!

              

開業流程:申請4個月經營簽證+在留卡→到日本開戶口→開公司→申請1年投資經營簽證

想去日本開公司,Henry建議大家首先申請一個為期4個月嘅經營簽證。點申請呢?準老闆們需要寫一份好詳細嘅計畫書,內容要講明準備做咩生意、洗幾多錢等等,再去拎住份計畫書去申請。當政府批咗依個4個月簽證時,大家就可以去日本開銀行戶口、申請在留卡,然後就可以開公司啦(下面再講點搞)。開咗公司之後,大家就可以拎住張張公司騰本(商業登記證)去日本政府到申請續期做1年投資經營簽證~

 

點喺日本開一間自己名義嘅公司?

上面講到申請好在留卡之後就可以開公司啦~咁其實係點搞㗎呢?Henry就叫大家唔洗擔心,因為好多牌照、申請手續等等,都可以交畀日本嘅行政書士(類似香港律師)幫手處理~Henry覺得開公司手續並唔困難:「首先要有個人發起話『我要開一間公司啦』,制定定款(類似章程)。然後你當然要證明到自己有個資本金(上文提過嘅500萬yen),而依舊資本金必須要來自你個人名義嘅日本銀行戶口。至於剩低嘅手續,交畀行政書士處理已經OK~」由發起話要開公司到真係成立到一間公司,其實只係需要2個星期至1個月左右,好快!!!

 

點確保簽證可以順利續期?

基本上最初1、2年續期簽證都冇咩困難,因為如果政府已經批咗4個月嘅經營簽證畀你的話,開咗公司後基本上都會續1年投資經營簽證畀你~就算去到第二年公司蝕錢,政府都唔會因為咁而唔批簽證畀你,因為都預咗做生意未必咁快可以回到本。但係去到第3年,大家就要留意啦!政府會跟住以下幾樣嘢去決定幫唔幫你續VISA:

1.公司規模夠唔夠大,一年係咪真係洗咗500萬

2.公司賺唔賺到錢,可唔可以持續經營

3.有冇正常交稅

如果做到以上3個條件,要續期基本上都冇問題~

 

開店難處逐個數

1.搵舖位

Henry覺得喺日本「根本就唔係我地去揀個舖位,而係睇個舖位揀唔揀你!」有試過去地產到搵舖時,經紀一聽到原來係外國人,日文仲要係唔流利,就已經馬上耍手擰頭話冇吉舖啦。「因為日本人對於租舖位畀外國人係相當保守,所以能唔能夠成功租到間舖,都好睇店主肯唔肯租畀你!」好在最後Henry都搵到個幾好嘅地產經紀,成功租到個唔錯嘅舖位~

 

2.搞裝修

搵到舖位,裝修嘅難度又比搵舖位難一倍!Henry話覺得去日本裝修公司時感覺到好強列嘅文化差異:「如果喺香港,我比咗啲好白痴嘅設計構思佢地,佢地就一定會話『你咁樣點得啊!死梗啦!』但如果喺日本,佢地就唔會理你個設計有冇問題,照話『好啊好啊』,但其實佢地心入面一早已經諗到可能會出事!就算係好蠢好蠢嘅計設,佢地都會照做畀你,因為依個係你自己嘅idea,佢地唔會去提醒你,我諗依啲就係文化差異囉…」所以Henry提醒大家盡諒唔好做自己唔熟嘅生意,唔係真係冇人會提你冇人會教你㗎!

3.請員工

比租舖位、做裝修更困難嘅終極大佬就係請人啦~啱啱都提過,Henry覺得日本人比較抗拒幫外國人打工(大公司另計w),所以外國老闆們都好頭痕點請人!Henry分享佢慘痛經歷:「我地試過喺專門學校、APPS到請人,但從開業前到到而家依一刻開咗店幾個月為止,都仲係一個回音都冇!」最後Henry就話由於台灣同香港文化都好相近,語言又冇咩溝通障礙,所以覺得請台灣留學生幫手打工都不失為一個好方法~~~

 

如果大家對喺日本開店有咩疑問,可以隨時通過以下方法問Henry,佢話好歡迎大家聽佢分享~

E-mail:Thehenrylau@gmail.com
Line : thehenrylau
facebook群組:移居日本及日本創業資訊交流