最多人follow嘅IG日本明星排行榜！

上次同大家介紹咗呢期新開IG帳戶嘅幾位明星，今次整返個排行榜俾大家睇下，到底邊個日本明星稱霸緊IG呢個平台啦！

（追蹤人數截至2016年7月31日）

1）渡邊直美（追蹤者人數：4,604,651）

▲有日本Beyoncé之稱嘅台日混血搞笑藝人渡邊直美出名表情浮誇。完全唔俾自己身材限制自己嘅佢經常作出冇形象嘅表演，不過觀眾就至鍾意佢夠放夠真夠豪爽。佢係IG嘅post除咗有好多自拍嘅搞笑短片之外仲會加好好笑嘅日文hashtag，所以好多日本人鍾意睇㗎～

2）水原希子（追蹤人數：3,822,362）

▲我諗叫佢做個性超模都冇乜人會反對掛！鼎鼎大名G－Dragon嘅前女友水原希子雖然係電視就好似冇乜觀眾緣，但係喺IG嘅世界入面就吸引好多粉絲follow！有種獨特氣質嘅佢有時仲會上載下自己嘅攝影作品添！

3）木下優樹菜（追蹤人數：3,271,200）

▲木下優樹菜，人稱日本Blake Lively，以前係model嘅佢同搞笑藝人結婚生仔之後而家已經成為靚媽。佢嘅IG除咗有佢嘅服裝配搭圖之外仲有好多屋企人嘅相，睇嚟好多女仔都好憧憬佢嘅婚後生活呢！

4）ROLA （追蹤人數：3,218,555）

▲混血名模ROLA應該好多人都識㗎喇～近年佢轉型成功，越嚟越多國際牌子搵佢做代言人之餘，佢仲進軍荷里活拍生化危機系列嘅電影添呀！佢又鍾意煮嘢食、做gym同着靚衫，所以個IG真係好精彩好多靚相睇，唔講以為自己睇緊雜誌。

5）長澤正美（追蹤人數：1,637,746）

▲睇嚟有好多Like Japan嘅朋友都係長澤正美嘅粉絲呢！擁有一雙長腿嘅「東寶灰姑娘」Masami個IG就多啲露出佢鏡頭下私人嘅一面，偶爾到會有啲眼鏡照等等少啲見嘅形象，所以都吸引好多人follow！

6）中村Anne （追蹤人數：1,573,350）

▲比起瘦到一碌竹嘅身材，日本近年都好似吹捧有肌肉線條嘅健康性感，而中村Anne就係當中嘅典範。非常勤力做gym嘅佢身材非常均勻，標誌性嘅陽光笑容都非常吸粉！佢仲有好多圈中女神朋友，之前喺紗榮子屋企同石原聰美三個人一齊girls night嘅相就被網民like爆啊！

7）木村文乃（追蹤人數：1,536,006）

▲樣子斯文甜美嘅木村文乃IG最多嘅唔係自己嘅相，反而係自己煮嘢食嘅相。每一張都係木村文乃自己煮嘅料理相（應該係，除非唔係），擺得靚一靚睇落又超好食，真係睇相都覺得莫名地好治癒。

8）菜菜緒（追蹤人數：1,523,380）

▲擁有一雙超長美腿嘅「惡女化身」菜菜緒IG經常出現話題之作。一時又好大方地show身材，最近又會po好多拍劇時嘅花絮照。佢亦都出名會鬧啲垃圾宣傳comment，所以得到好多粉絲支持佢有霸氣同肯出聲～

9）小嶋陽菜（追蹤人數：1,463,899）

▲擁有棉花糖身材嘅小嶋陽菜係AKB48入面唯一上榜嘅成員！成日有機會去唔同地方影靚相陽菜個IG經常出現靚人靚景嘅相，真係睇完都覺得自己眼睛去咗旅行呀～！當然唔少得同元組AKB成員嘅合照啦！

10）長谷川潤（追蹤人數：1,454,337）

▲曾經係ViVi人氣混血模嘅Jun而家已經結咗婚生咗仔，仲定居夏威夷。除咗成日會更新係夏威夷嘅生活照之外，熱愛瑜伽同生活嘅佢仲經常會up啲好勵志嘅句子鼓勵各位粉絲，非常之正面。不過我都係最鐘意睇佢嘅泳裝照，性感得來非常陽光同健康，真係超正。

11）岩田剛典（追蹤人數：1,448,727）

▲人稱小岩（岩ちゃん），三代目J Soul Brothers嘅超人氣成員岩田剛典以王子嘅面孔、野獸嘅身材吸引超級多女性粉絲，令佢基本上已經係EXILE家族最強嘅幾位成員之一。佢嘅IG就比較多翻po同宣傳自己嘅作品或者上嘅雜誌，不過啲相真係靚仔嘅，所以都係好多like。

12）登坂廣臣（追蹤人數：1,420,158）

▲同樣係EXILE家族、三代目J Soul Brothers主唱登坂廣臣個IG除咗有好多佢同一班好兄弟上台表演好Yo嘅相之外，總會有啲潮牌嘅照片，同偶爾會出啲好型嘅自拍，引死啲粉絲喇～

13）戶田惠梨香（追蹤人數：1,393,687）

▲因為拍Death Note電影彌海砂一角成為唔少人心目中女神嘅Erika除咗拍劇同電影外甚少喺其他媒體出現。因此，好多粉絲都會follow佢嘅IG睇下女神私生活嘅一面。佢之前upload咗張重拍Death Note電影飾演10年後Misa Misa嘅花絮照就有成8萬幾粉絲like咗，似乎大家都好期待Misa Misa重出江湖喎！

14）小籔千豊（追蹤人數：1,344,588）