拉麵店老闆最唔想你做嘅四種行為

唔少香港人都係日本拉麵愛好者，而去到日本旅行食番碗地道嘅拉麵更加是常識吧！拉麵店有大有細、有出名嘅有隱世嘅，不過講到食拉麵嘅禮儀就相信係千篇一律。唔想成為日本拉麵店心目中嘅麻煩客人？睇下下面呢堆真正喺拉麵店工作嘅人揀選嘅「最唔想食客做嘅行為」，下次去日本食拉麵小心唔好犯呢～

 

 

難得去旅行仲要食到好西，梗係相機食先即刻呃like啦！但係，有好多拉麵店老闆其實好唔鍾意呢個行為。受訪者嘅H店員就話：「其實相機食先唔係問題，影完即刻食都仲接受到…但影完仲喺度㩒電話就唔係幾好囉。」梗係啦！打完句caption、check埋個in、up完張相碗麵可能已經唔係最新鮮出爐嘅美味，同埋即刻品嚐都係對店家嘅尊重～其實caption都可以食完碗麵先打啫…

 

日本好多細嘅拉麵店可能得10至15個位以內，多數都係連住個counter。如果撞正多人排隊嘅黃金時間去食，3個人或以上想一齊排排坐食其實係會影響到店家嘅運作嘅。H店員話：「兩個人一齊坐就話姐，3個人或以上嘅話其實已經好難安排座位，而且要等空位嘅時候排後面嘅客人又冇得食，呢個問題都幾頭痛。」所以大家如果唔介意，喺多人排隊嘅時候不如做下心理準備，即使分開咗食都唔緊要啦～（反正店家都唔會想你留低食完坐好耐 T_T）

 

 

拉麵屬於中華料理，大間少少啲嘅舖頭一般除咗拉麵都有提供其他menu嘅～如果叫埋其他野食既時候，要留意下食嘅次序呢！「如果先食咗太濃烈味道嘅嘢，例如咖喱飯或麻婆豆腐，就好有機會會影響到食拉麵嘅味，所以我哋絕對唔推薦！」難得去食拉麵，就算其他嘢食上先，都係食咗拉麵先啦～

 

沾麵喺香港越來越受歡迎，但係咪真係大家都識食呢？其實沾麵嘅湯同一般拉麵湯唔一樣，係濃好多架！店員就話成日見到啲食客會夾好大注麵慢慢浸落碗湯度，但其實咁係會影響到食麵原本嘅鮮味。誇張啲嘅食客甚至會沾到湯都無晒但未食完碗麵喎！所以，大家記得食沾麵真係沾下就好喇～

 

其實每間店嘅店主脾氣、性格同每間店嘅規矩都唔同。不過如果feel到店長嘅怒睥就點都食得唔舒服嘅～以上嘅規矩畀大家做下參考啦！（係呀，日本係咁多潛規則架啦！）最後提提大家，雖然飲晒碗湯係對店長同店家嘅肯定，但記得就返自己嘅身體狀況，太油或唔舒服就唔好強迫啦～

 

參考來源：Nico.jp

 

WeWa卡最新迎新優惠
WeWa卡迎新俾你去旅遊、主題公園、睇戲或唱K都賺高達4%現金回贈，隨時一SHAKE必中獎，簽賬免找數！

詳情可以睇：www.likejapan.com/wewacard1