唔知大家仲記唔記得月頭香港拳王曹星如(Rex)同一位前世界拳王打咗場全城觸目嘅拳賽?當日嗰位拳手就係來自日本嘅「tough boy」河野公平啦!

 

因一本書而踏上擂台

你冇聽錯!河野公平真係因為受到一本書嘅啟發而成為拳手,後來仲做埋世界拳王㖭~

話說其實河野公平細細個已經好鐘意做運動。小學、初中時就打少年棒球,到高中時加入咗田徑隊玩長跑,不過佢就話:「長跑,係真係齋跑,好辛苦啊!!!」佢就諗,既然做運動都係會辛苦,會唔會有一種運動係辛苦得嚟係有意義㗎呢?喺佢心入面抱住依個疑問嘅時候,咁啱見到書店入面有一本叫做《用六個月成為職業拳手》(《6ヶ月でプロボクサーになる》),然後佢跟住佢嚟打,打吓打吓就真係打到上擂台啦~

 

高齡拳手 寶刀未老

河野公平今年已經36歲,佢笑住話:「與其話我係拳手界嘅大前輩,不如係已經差唔多要退役嘅老手(笑)。」由於已經唔係十八廿二,河野公平同以前後生嗰陣嘅練習策略都有啲唔同,例如:「拉筋方面絕對要做足,訓練後亦都要冰敷,盡諒等身體得到充分休息。」諗起以前操練太多,佢覺得而家多咗休息嘅佢身體狀況反而仲好過後生嗰陣:「對拳手嚟講,比賽當日嘅狀態真係好重要,如果操得太勁,真正上台時反而攰到郁唔到就死啦~」佢又提到當日同Rex比賽時狀態勁fit,冇得打足咁多回合真係好可惜。

 

擂台上的苦與甜

睇人打拳淨係見到個拳手畀人打一拳都覺得痛,你話做拳手又點會唔辛苦?河野公平就話:「普普通通打鬥嗰陣都會有可能骨折,打拳會受傷真係好平常。雖然打拳真係非常辛苦,就算係要減重嗰陣都真係好煎熬,不過正正就係因為依分痛苦,贏嘅時候先會咁開心!」問到家人唔會反對,唔想你打拳咩?佢就話:「其實我屋企人都唔係咁鍾意我打拳…媽媽同老婆都唔會想見到我被打個樣,希望我盡早結束拳手生涯,不過我都仲係想再打耐少少,因為我仲有嘢未完成,我覺得自己仲可以做得更多更好!」

 

盼望再與曹星如決戰

提到上次在香港與Rex決戰,河野公平就大讚香港會場氣氛一流,8千位觀眾入場係平時比賽嘅兩倍,直程有打世界戰嘅感覺:「嘩!真係血脈沸騰咁!依一種感覺係普普通通咁生活嘅話,絕對唔會有機會感受到嘅!」不過好可惜比賽當日因為一次意外嘅頭部撞擊搞到最後比賽提早結束,而河野公平就以2分嘅點數之差落敗,令佢覺得好可惜。「其實原本我抱住萬一香港賽落敗嘅話就退役嘅覺悟戰鬥,但係最終比賽竟然以依種半桶水嘅方式完場,我諗當日嘅觀眾都會覺得莫名其妙。我亦都係因為當時正準備全力開戰但係被逼結束,覺得有少少唔甘心…其實都唔係有少少唔甘心而係好唔甘心!我打拳嘅心燃燒緊,如果曹星如選手願意嘅話我真係好想同佢再打一場,無論如何我都希望打出能夠令自己滿意嘅比賽!」學河野公平話齋:「努力係不會背叛人嘅!」如果有機會重賽,希望無論係Rex定係河野公平都能夠全力以赴,再打出一場精彩嘅比賽啦~~