【你認得幾多個地方】百變小櫻劇場版中登場的香港景色!

[專欄:日本在香港]

百變小櫻嘅劇場版,以香港為主要場景嘅《百變小櫻之相約在香港》唔單止上年1月喺日本電影院再度上映,以慶祝原作連載開始20週年,而喺新章動畫『透明卡』播映前夕,NHK就更加於1月3日安排咗重播呢套電影同大家預熱添!

劇場版《百變小櫻之相約在香港》,舞台就當然有香港份啦,不過小櫻點解會嚟左香港呢?原來喺劇場版故事中,小櫻有一日係屋企附近嘅商店街抽獎,竟然抽到特等獎嘅香港旅行。小櫻於是同哥哥同埋朋友們一齊開始左歡樂嘅香港之旅。而當小櫻正在享受香港嘅風景時、竟然見到不可思議嘅小鳥。入夜後,小櫻卻又見到奇怪嘅夢…係充滿水嘅空間中有一個魔導士嘅身影。到底小櫻會喺香港遇到啲咩野大冒險呢?

今次嘅上映亦令到好多日本人開始回憶起香港嘅美景。其實,依個劇場版仲係喺1999年上映,入面繪畫左不少舊香港嘅景色,同時都令到自細睇小櫻長大嘅香港人有一絲絲嘅懷念。以下我地就回顧一下電影中出現嘅20年前嘅香港,同時睇吓小櫻去咗香港嘅咩地方啦。

 

維多利亞港

講到香港,通常就會諗起維港啦。劇中嘅小櫻仲住喺維港旁嘅酒店。而製作組亦都非常鐘意維港景色,喺電影中繪畫咗早、午、晚嘅維港,各有不同魅力!


©CLAMP・ST・講談社/バンダイビジュアル・マッドハウス
 

=======================

天星小輪

小櫻哥哥喺劇中叫坐緊船嘅小櫻小心唔好跌落海,因為旅遊書上寫咗維港有鯊魚。作為90後嘅小編第一次聽,有啲驚訝。


©CLAMP・ST・講談社/バンダイビジュアル・マッドハウス

=======================

深水埗

地點似乎係參考咗深之都外面嘅環境,不過拍攝之前就明顯有出力打掃過(被拖走…)。當時嘅深水埗同依家嘅氣氛相似,但少咗中間類似雕像嘅物體,同埋多咗間義順牛奶公司(笑)。



©CLAMP・ST・講談社/バンダイビジュアル・マッドハウス

=======================

彌敦道

對日本人嚟講,香港好似四圍都係依啲密密麻麻嘅霓虹燈牌,細心留意原來當中有幾間係實際存在嘅添。

©
CLAMP・ST・講談社/バンダイビジュアル・マッドハウス

=======================
花園街

 

 

小櫻係劇中飛過香港嘅高樓大廈,仲穿梭於花園街攤檔之上,依種緊湊嘅感覺係高樓大廈林立嘅香港獨有。小編好欣賞製作組可以如此運用香港嘅特點。


©
CLAMP・ST・講談社/バンダイビジュアル・マッドハウス

=======================

 

雀仔街

密密麻麻嘅雀籠高過小櫻嘅身高,充滿神秘感,貼合左劇場版略帶懸疑奇幻嘅感覺。


©CLAMP・ST・講談社/バンダイビジュアル・マッドハウス

=======================
上環摩羅街

 

當中嘅古玩畫得同現實賣嘅非常相似,睇得出製作組取財嘅用心。

其實除左以上景點之外,仲有山頂、文武廟、中環等等。而觀光景點之外,仲取材咗香港嘅其他特色地方例如深水埗等,可以睇出製作組嘅細心。歡迎各位朋友再重溫一次依套1999年上映嘅劇場版!同時,有時間仲可以喺香港進行聖地巡禮,睇下經過20年後嘅變遷架。


©CLAMP・ST・講談社/バンダイビジュアル・マッドハウス