《北海道導遊》EP.6 北海道新千歲機場 必食必買手信11選

機場除咗係搭飛機嘅地方,仲係一個畀大家臨上機前衝刺買手信嘅地方!!!!以下小編精選咗11樣北海道新千歲機場國內線航廈2樓嘅必買手信,下次去個陣記得跟住嚟買啦~~

 

新千歲機場限定 :

#1 新千歲發 180円

新千歲發

新千歲發

「新千歲發」個名好似新年菜式咁,其實係一款白朱古力夾心批嚟~依款甜品係由名店「六花亭」同新千歲機場聯合出品,講到明「新千歲發」就緊係喺新千歲機場先買到啦!新千歲發外層嘅酥皮脆卜卜,入面冰凍嘅藍莓果醬白朱古力食落有少少似乳酪咁,酸酸甜甜,好清新㗎~如果想帶返香港做手信,可以同店員講想要乾冰帶走,不過大家都話即買即食最好食,更加有人話因為要即刻食先食得出個酥皮嘅鬆脆口感,所以講笑話依個批嘅最佳賞味期限只有 10 分鐘㖭!

 

販賣店舖:スカイショップ小笠原
營業時間:7:00~20:30

——————

#2 迷你小熊冬甩 盒裝7件 950円

siretoco sky sweets 冬甩

#3 招財貓冬甩 390円

siretoco sky sweets 冬甩

#4 朱古力字句冬甩 390円

siretoco sky sweets 冬甩

日本人非常鍾意食冬甩,依間siretoco sky sweets嘅動物造型冬甩出晒名可愛度滿分,無論係即買即食嘅普通size招財貓冬甩、朱古力字句冬甩,定係迷你小熊冬甩都好受歡迎㗎!朱古力字句冬甩上面寫住「ありがとうございます♡」(「一直以來謝謝你♡」)、「お誕生日おめでとう」(「生日快樂」)等等唔同嘅對白,送畀識日文嘅朋友表達心意就啱晒啦!

 

販賣店舖:siretoco sky sweets
營業時間:8:00~20:00

——————

北海道手信代表

#5 白之戀人 盒裝36件 2535円

雖然東京成田機場等等日本大型機場都有賣白之戀人,但係講到北海道手信代表,就一定唔可以唔提白之戀人!白之戀人已經有40幾年歷史,唔係啲咩新發現,但係依款用入口即溶嘅貓舌曲奇,夾住一層白色朱古力嘅餅乾,一直都排係北海道手信排行榜頭幾位,認真犀利!

白之戀人

販賣店舖:各綜合名產店

——————

#6 士多啤梨朱古力 2盒裝 1200円

士多啤梨朱古力

依款士多啤梨朱古力同上面嘅「新千歲發」一樣由名店「六花亭」出品,相信大家都唔會陌生。朱古力有2種口味,一種係白朱古力,另一種係牛奶朱古力,每粒朱古力入面都包咗成大粒士多啤梨乾,好高級!好甜嘅朋友可以選擇白朱古力味,唔鍾意太甜、想食到多啲士多啤梨酸味的話,推薦大家試食牛奶朱古力味~

 

販賣店舖:各綜合名產店

——————

#7 六花亭牛油三文治 10件裝 1300円

六花亭牛油三文治

香港人未必太熟悉六花亭嘅牛油三文治,但係其實喺日本同台灣,依款牛油三文治甚至仲出名過上面介紹嘅士多啤梨朱古力!2塊鬆化嘅曲奇夾住香噴噴嘅白朱古力同提子乾,牛油仲要係用100%北海道鮮奶製作而成,唔怪之可以做到咁香咁滑啦!

 

販賣店舖:各綜合名產店

——————

#8 六花亭牛油蛋糕 5件裝 670円

六花亭牛油蛋糕

六花亭牛油蛋糕係六花亭牛油三文治嘅姊妹產品,兩者嘅包裝非常相似,小心唔好搞錯!鬆軟嘅海綿蛋糕同樣係用100%北海道鮮奶製作而成,入面有層薄薄嘅朱古力夾心,配埋紅茶食就一流啦~

 

販賣店舖:各綜合名產店

——————

#9 ROYCE朱古力冬季限定版 777円

Royce冬季限定版朱古力

ROYCE雖然係生朱古力專門店嘅代表,但意外地佢地嘅標價非常親民,就算係限定版朱古力都係700円左右,好抵買!ROYCE除咗原味同抹茶味朱古力受歡迎之外,佢地每隔一排就會推出各種限定版口味同包裝,好似今次依款雪花飄飄嘅冬季限定版,啱晒用嚟做手信!

 

販賣店舖:各綜合名產店

——————

#10 薯條三兄弟 10袋裝 885円

薯仔三兄弟

#11新千歲機場限定 薯條三兄弟日本地域口味版 8袋 864円

薯條三兄弟地域口味版

薯條三兄弟係卡樂B嘅超人氣商品之一,北海道嘅薯仔連皮炸成一條條薯條,食落脆卜卜、香噴噴,唔會太咸同太油,可以話係薯條零食界之中嘅大佬(笑)新千歲機場仲有限定版嘅日本地域口味版,想試齊東京、北海道、關西、九州等等8款地區限定口味薯條三兄弟就千祈唔好錯過啦~

 

販賣店舖:Calbee+
營業時間:8:00~20:00

——————

新千歲機場航站大廈
地址:北海道千歳市美々新千歲機場國內線航廈 2F