《北海道導遊》EP.2 魚生 燒肉 甜品 札幌美食之旅

札幌美食真係數之不盡!今次介紹依3間餐廳喺當地都係好有口碑嘅名店嚟,大家快啲抄低筆記啦~

 

海鮮処 魚屋の台所 重量級高質魚生飯

「海鮮処 魚屋の台所」嘅本店位於有「札幌的廚房」之稱嘅二条市場,店內幾乎所有海鮮都係來自北海道當地嘅海產㗎~依到除咗受過好多當地媒體嘅訪問之外,喺當地人之間嘅口碑亦都相當之好,小編今次就嚟試食咗兩個招牌海鮮丼上級海膽丼加三文魚籽同上級海鮮丼~

——————————-

上級海膽丼加三文魚籽(上級海膽丼3500円,加三文魚籽500円)

大家可能會好疑惑,上級海膽丼加三文魚籽同海膽三文魚籽丼(3500円)有咩分別呢?答案就係海膽份量上嘅分別!海膽三文魚籽丼嘅飯面有一半海膽,一半三文魚籽,而上級海膽丼加三文魚籽嘅飯面就鋪滿晒海膽,即係佢嘅海膽份量比海膽三文魚籽丼嘅海膽多成倍!!好抵啊~~兩款丼飯嘅海膽都一塊塊好分明,非常鮮甜;三文魚籽咬落去仲會有爆汁效果,好味程度10粒星!

——————————-

上級海鮮丼(3000円)

如果心大心細,樣樣魚生都想食,但係又唔知點邊樣好,依個上級海鮮丼就啱晒你啦~~上級海鮮丼嘅魚生堆到成座山咁,一般有大約15至20款海鮮喺入面,當中包括北海道最出名嘅蟹腳、海膽、三文魚籽、赤蝦、帆立貝等等,樣樣都大大件!依到嘅魚生比一般喺其他地方食到嘅魚生更加鮮味濃郁,口感亦都比較彈牙實肉~提提大家,因為依個飯實在係非常非常咁多料,細食嘅朋友小心食唔晒啊(笑)

——————————-

海鮮処 魚屋の台所 本店
地址:北海道札幌市中央区南2条東2丁目 小西ビル1階
營業時間:7:30~17:00

——————————-

地道燒羊肉居酒屋 成吉思汗だるま

成吉思汗?你冇睇錯啊係成吉思汗!!!!點解日本會有樣料理叫做「成吉思汗」呢?原來依種燒肉本身源自中國東北嘅燒羊肉文化,時至今日,成吉思汗燒羊肉已經成為咗北海道其中一樣最有代表性嘅鄉土料理啦~依間「成吉思汗だるま」除咗提供一般嘅成吉思汗羊肉之外(比較薄身同實肉嘅羊肉),仲有提供爽口彈牙嘅「上肉」同低脂軟熟嘅羊腰肉,先到先得,賣完就冇㗎啦~

——————————-

成吉思汗だるま 本店
地址:北海道札幌市中央区南五条西4 クリスタルビル1F
營業時間:17:00~翌日3:00

——————————-

INITIAL SAPPORO 特色飯後芭菲

香港人成日食芭菲,相信大家對依樣甜品一定唔會陌生。但大家又知唔知「芭菲」點解叫做「芭菲」?原來「芭菲」依個字本身來自法文嘅「parfait」,即係perfect完美咁解~相傳19世紀嘅時候,有法國師傅想用蛋黃同水果製作成一款完美嘅冰凍甜品,依款甜品就係芭菲嘅前身啦!而日本嘅芭菲就係世界主流嘅美式芭菲,即係將雪糕、水果、朱古力同忌薕等等材料放入去高身嘅玻璃杯入面嘅芭菲。咁「飯後芭菲」(〆パフェ)又係咩嚟?顧名思義,就係食完飯、飲完野之後,用來結束美滿一天嘅甜品啦!近來札幌好流行食呢款「飯後芭菲」,今日就介紹一間甜品酒吧「INITIAL SAPPORO」畀大家,等大家入鄉隨俗啦~依間甜品酒吧唔係走一般日系甜品路線,而係走創意特色風,吸引咗好多芭菲迷嚟朝聖㗎!

——————————-

冧酒提子芭菲 1300円

依個冧酒提子芭菲最特別嘅地方,就係佢嘅空心庭園設計啦~師傅用朱古力喺下層嘅芭菲上面整成各樣裝飾,再喺上層嘅曲奇上面放上冧酒提子乾雪糕、馬卡龍、威化曲奇等等,成個芭菲十足件藝術品咁靚!最底層嘅橙味粟米片酸酸味味好醒胃,撈埋酒味香醇嘅冧酒提子乾雪糕同濃郁嘅忌薕芝士一齊食,感覺好清新好fresh~

——————————-

香水檸檬芭菲特飲(有酒精)1100円

芭菲特飲係咩東東?就係上層係芭菲,下層係雞尾酒嘅「飲得嘅芭菲」啦!頂層芭菲有紅茶雪糕、紅酒啫喱同新鮮水果,大家可以將佢拎落黎,放喺個碟上面慢慢食~紅酒啫喱酒味相對較濃,紅茶雪糕就似奶茶味咁好creamy~下層嘅雞尾酒係由香橙、西柚香水檸檬同薄荷汁製成,酒味唔算濃,水果味好出,好易入口~

——————————-

札幌芭菲推進委員會

http://sapporo-parfait.com/ (日文)

札幌嘅海鮮、燒肉、湯咖哩等等美食,相信大家都唔陌生。不過唔知大家知唔知道札幌市民近幾年無論咩季節都好,佢地都會喺一日入面嘅最後一餐,享受由用新鮮牛奶整成嘅雪糕、札幌嘅當造食材整成嘅冰凍甜品芭菲呢?其實以前札幌人夜晚飲飽食醉之後好鍾意食「飯後拉麵」,不過而家好多人都已經由「飯後拉麵派」變成「飯後芭菲派」啦~~為咗令大家了解更多關於札幌嘅飲食文化,一班飯後芭菲嘅愛好者就成立咗「札幌芭菲推進委員會」,通過各種各樣嘅活動推廣飯後芭菲,努力將飯後芭菲推廣成新一輪美食熱潮!

——————————-

INITIAL SAPPORO
地址:北海道札幌市中央区南3条西5-36-1 F.DRESS五番街ビル 2F
營業時間:星期日至星期四 17:00~24:00
星期五六及公眾假期前:17:00~26:00
網頁:http://sapporo-parfait.com/2016/08/shop-initial

———————————————–

更多關於北海道的觀光資訊,可以留意以下網站:

北海道觀光振興機構(繁体字)臉書
https://www.facebook.com/visithokkaido.tw/

景點位置