傑尼斯Johnny’s大解剖 簡介旗下13個人氣組合

有留意開日本樂壇一定聽過Johnny’s「傑尼斯事務所(ジャニーズ事務所,粉絲之間又稱為「J家」)」,但係對於佢旗下嘅組合大家又識幾多呢?
適逢今年年頭事務所宣佈全新組合「King&Prince」即將出道,就等小編我同大家介紹下現存嘅J家組合啦!

前文提要:傑尼斯大解剖 簡介旗下15位獨立藝人

J家可以被稱為男性偶像嘅養成所,喺1962年創立,50幾年間培養出大大小小「傳說中嘅偶像」,風靡全球萬千少女嘅心,留下唔少光輝嘅記錄。同時佢地放開自我喺綜藝嘅搞笑演出都令事務所被譽為偶像界嘅「吉本(日本一間大型藝人事務所,旗下以搞笑藝人為多)」,為觀眾帶嚟唔少歡樂。

大部份人考入咗去之後會成為「Johnnyʻs Jr.(ジャニーズJr.)」一份子去參與培訓、出演綜藝同埋幫前輩伴舞,好彩嘅話仲會有電視劇、舞台劇等演出機會。當社長ジャニー喜多川覺得時機來臨嗰陣會突然之間話「YOU們出道啦!」,於是佢地就可以正式獲得藝能界嘅入門券。

不過唔講唔知,其實J家初期係有女性藝人㗎!但去到1985年Orange Sisters(オレンジ・シスターズ)引退之後就得返男性藝人活動,從此退出女性偶像嘅舞台。到今時今日,就靠以下組合稱霸日本男性偶像行業。

圖/截自Johnnyʻs net http://www.johnnys-net.jp/
*以下人名嘅顏色代表佢哋嘅代表色,成員譯名以Johnnyʻs net中文翻譯為準

——-

少年隊(1982年結成、1985年出道)


左起:錦織一清、東山紀之、植草克秀

現存出道最耐嘅就係呢隊前輩組合,出道歌「面具舞會(仮面舞踏会)」到30年後嘅今日仲被當成神曲咁唱緊。雖然平均年齡都過咗50啦,佢地嘅魅力仍然沒法阻擋,年末倒數演唱會東山出場嗰陣嘅尖叫聲絕對唔輸比後生一代!(利申:小編睇直播嗰陣都有尖叫埋一份)本來少年隊係當時Johnnyʻs Jr.嘅統稱,後來先變成佢哋嘅隊名。佢地以「由日本往世界出發」作為理念出道,係歌唱上可謂一時嘅傳奇。但隨住演出機會減少,90年代初開始三人主要單獨出演唔同節目,近年都好少見佢地合體啦。

TOKIO(1990初步結成、1994年出道)


左起:城島茂(隊長/結他)國分太一(鍵盤)長瀬智也(主唱)松岡昌宏(鼓)山口達也(低音結他)

傳說中嘅農夫,呀唔係,偶像樂隊就係呢班非常重陽剛味嘅叔叔(笑)。由1995年「THE!鐵腕!DASH!!(ザ!鉄腕!DASH!!)」播出以後佢哋就一直挑戰極限到而家,走訪日本各地嘅農業、漁業等等,近年仲開發緊無人島。唔好話偶像,對藝人嚟講佢哋做嘅嘢都幾不可思議。不過佢哋作為真・偶像都係成績顯著,當年出道3個幾月就上到紅白,到上年已經係第24年啦。雖然已經成5年冇出專輯,但係每年都至少會出一隻單曲,成績都相當唔錯。聽講上年就有個勁似城島嘅女歌手「島茂子」以一曲《女の坂道》出道,戶外演出仲吸引咗成2000位觀眾圍觀!佢隊伴奏樂隊「The Soy Lattes(ザ・ソイラテズ)」都勁似TOKIO其他四位成員,嗯,真係好奇怪⋯⋯

V6(1995年結成、出道)


左起:坂本昌行(隊長)長野博森田剛岡田准一三宅健井之原快彥

啱啱迎來第3位已婚成員嘅V6已經係出道超過20年嘅老前輩。6個人以年齡被分為「20th Century(トリセン,坂本、長野、井之原)」同「Coming Century(コミセン,森田、三宅、岡田)」活動,當中Coming Century喺出道嗰陣人氣好高,連CD封面都係以佢地為主,仲嚟過香港開演唱會?!不過而家6個已經喺平等嘅關係中活動。近年佢哋都係偏向多個人發展,好似岡田咁就以拍劇為重,2014年仲憑《永遠的0》成為J家第一位影帝。但佢地都不時會相聚拍攝等等,前排20周年仲一齊去咗合宿作為演唱會DVD嘅特典,盡顯青春嘅一面(雖然都係叔叔啦)。小編好記得森田喺嗰時一系列嘅記錄片中講到同成員一齊活動就好似返咗屋企咁,確實V6真係好似一個小家庭,望住佢哋都覺得warm呀!

KinKi Kids(1992年結成、1997年出道)


左起:堂本剛堂本光一

唔好見到呢兩位得道仙人同王子同姓就以為佢哋有成員以外嘅關係,其實佢哋只係咁啱同年又同姓嘅關西人,因為都係近畿地方出身所以1993年正式以「KinKi Kids」活動,中文就係「近畿小子」。佢哋係J家第一個二人組合,亦都係第一個全員關西出身嘅組合,可以話創咗唔少先例,個感覺都同現有其他J家組合相當唔同。相比起近年非常注重舞台、燈光演出嘅演唱會,KinKi Kids基本上就係講嘢、唱歌、講嘢、唱歌、講嘢,冇咩特別花巧,並以口水多過茶有名,試過傾得太耐比工作人員鬧?。活動方面佢哋以音樂為主,仲有一班合作開嘅音樂家(小編身邊嘅KinKi Kids粉絲仲會認得啲音樂家㗎~!),與其話係偶像,可能話係歌手更適合。

嵐(1999年結成、出道)


左起:相葉雅紀大野智(隊長)櫻井翔松本潤二宮和也

被譽為SMAP接班人嘅嵐可以話係日本國民天團,喺香港都相當有名,相信小編都唔使點介紹啦(笑)佢哋已經連續6年喺日本五大巨蛋開巡迴演唱會,每場公演都有成五萬幾個觀眾㗎,可以想像佢哋有幾高人氣。嵐最為人喜歡嘅就係團內和諧溫馨嘅感覺,發展都相當平均,歌影視三方面都可以搵到佢哋五個嘅身影。如果V6係一家人嘅話,嵐就好似5個好兄弟,一齊並肩作戰落去,每次睇綜藝節目見到佢哋嘅小互動都令人不禁想講:「佢哋關係真係好好~」小編特別推介最能帶出嵐嘅世界觀嘅「團員製造」:大野編嘅舞步、櫻井填嘅rap詞同松本監督策劃嘅演唱會,一定唔會令你失望。

NEWS(2003年結成、2004年正式出道)


左起:小山慶一郎(隊長)手越祐也增田貴久加藤成亮

前名NewS嘅呢個組合可以話係一個傳奇。上圖見到佢哋有4位成員,但最初結成嗰陣其實有9個人,ONE OK ROCK主唱Taka、関ジャニ∞嘅錦戶亮同山下智久都曾經係NEWS嘅一份子。雖然經歷過活動休止、成員退出等困局,但佢哋都冇放棄,終於蛻變到而加嘅NEWS,成功邁入15周年。佢哋最特別嘅地方係四位成員分別有唔同「副業」:新聞主播(小山)、搞笑藝人(手越)、作家(加藤)同造型設計師(增田),但聚埋一齊都冇違和,團員關係亦相當好,每次MC都十分搞鬼。其中手越同增田仲組成以唱歌為重嘅「テゴマス(手越增田)」,水準之高亦令NEWS嘅歌都生色不少。NEWS多變嘅曲風都係特徵之一,由兒歌到rock都carry到㗎,不過最出名都係佢哋嘅勵志歌,頹嗰陣聽完就會精神返~

關傑尼斯8(関ジャニ∞,2002年結成、2004年出道)


左起:澀谷昴(主唱)大倉忠義(鼓)錦戶亮(主唱/結他)丸山隆平(低音結他)安田章大(結他)村上信五(鍵盤)、橫山裕(敲擊樂/小號)

佢哋就係大名鼎鼎嘅關8啦!但留意返佢哋而家得7個人,唔好記錯呀(笑)關8全員都係由關西Jr.(即係關西地帶嘅Johnny’s Jr.)組成,大部份仲喺大阪成長,所以團體風格都係滿滿嘅關西輕鬆搞笑風。好似10周年演唱會「十祭」嗰陣就模仿J家唔同團去表演「Johnny’s組曲」,完成度高又好有趣。不過喺音樂上佢哋都十分講究,係繼TOKIO之後嘅另一隊樂隊,每位成員不時會自己作曲填詞,上年仲參加咗METROPOLITAN ROCK FESTIVAL2017?。順帶一提,J家第一隊搬上大銀幕嘅戰隊「エイトレンジャー」同傳說中嘅女團糖8「キャンジャニ∞」都係關8製造嘅。佢哋嘅可塑性同佢哋個名一樣,都係無限㗎(笑)

KAT-TUN(2001年結成、2006年出道)


左起:中丸雄一龜梨和也上田龍也

KAT-TUN由出道開始就比人話好似一班飛仔聚埋一齊咁,曲風同造型都偏向不良少年,實際上其實係一班好善良嘅藝人嚟嘅,龜梨都曾經喺TBS《櫻井・有吉THE夜会》入面講笑話雖然成日比人鬧,但比人鬧嗰啲人都退曬團啦(笑)事實上佢哋係繼NEWS之後最多成員退出嘅組合,最初佢哋有6個人嘅,但由2010年赤西仁退團之後每3年就有一位成員退出,到2016年得返3個人,就喺10周年演唱會後進入充電期、暫時停止組合活動。期間三人各自都喺唔同劇集、綜藝上面有出色表現,終於今年元旦嗰陣宣佈宣佈充電期結束、四月舉辦演唱會,今季由龜梨主演嘅劇集《FINAL CUT》仲搵咗三人去唱主題曲!!!小編都好期待佢哋返嚟之後會嘅活動呀。

Hey! Say! JUMP(2007年結成、出道)


左起:中島裕翔岡本圭人有岡大貴八乙女光知念侑李伊野尾慧山田涼介藪宏太高木雄也

Hey! Say! JUMP嘅出現可以話係時代改變嘅象徵,因為佢哋9個都係平成年代(1989年或之後)出世,係J家第一批出道嘅平成人口,所以組合名都取「平成」嘅日文諧音去表達。事務所對佢哋期望都好高,話佢哋係「Johnnyʻs Ultra Music Power」,事實佢哋都不負眾望,到而家仲保持緊東京巨蛋史上最年輕嘅表演者(平均15.2歲)同東蛋史上第一次係一日內有兩場公演嘅記錄。2012年亞洲巡迴演唱會「Hey! Say! JUMP ASIA FIRST TOUR 2012」嗰陣仲嚟過香港㗎~另外,佢哋係J家現存最多人嘅組合,並以年齡再分為「Hey! Say! 7」(山田、知念、中島、岡本)同「Hey! Say! BEST」(有岡、高木、伊野尾、八乙女、藪),不過佢哋關係都非常好㗎,仲會交換聖誕禮物?。唔好睇佢哋有咁多人,唱歌跳舞都相當齊整,影視綜藝方面都發展得幾好,閃閃亮亮嘅王子形象下亦有好多搞笑演出。9個人嘅力量可以有幾強大?就由你去見證啦。

Kis-My-Ft2(2005結成、2011年出道)


左起:宮田俊哉千賀健永北山宏光玉森裕太藤谷太輔二階堂高嗣橫尾涉

結成到出道用咗7年時間,喺J家嚟講算係相當長,。藤谷就喺富士電視台《TOKIOカケル》到提及佢哋7個都係差啲就出到道、但各種原因之下入唔到出道嘅組合而被留落嚟嘅人。努力係有回報嘅,終於佢哋喺2011年出道,成為J家其中一個好有個人特色嘅團體。佢哋都好擅長滾軸溜冰,係組合嘅賣點之一。雖然喺影視上唔係好出眾,但綜藝方面非常了得。不過演出上好多時都會有所謂前後排嘅情況,宮田、千賀、二階堂同橫尾通常位於後排,冇另外三個咁受人注目。所以2013年嗰陣中居正廣就提出「舞祭組」嘅企劃比佢哋四個去唱,成為Kis-My-Ft2嘅子團體,走自嘲同搞笑風格,成功引起注意。而家嘅Kis-My-Ft2發展得越嚟越好,當初資源不均嘅情況都有所改善,前年演唱會仲首次有7個人各自嘅solo演出,值得期待佢哋未來嘅成長呀。

Sexy Zone(2011年結成、出道)


左起:馬里烏斯葉中島健人佐藤勝利菊池風磨松島聰

今年日本電視台大型慈善節目「24小時電視『愛心救地球』」嘅主要主持人就係呢班非常年輕嘅J家藝人Sexy Zone。而家佢哋平均淨係得20歲幾,當中千禧年出世嘅馬里烏斯係出道嗰陣都係11歲咋,係J家史上出道嗰陣平均年齡最細嘅組合,望住佢哋小編覺得自己都老啦⋯⋯(泣)五個人平均留喺Johnnyʻs Jr.唔夠2年就出道,係J家最快嘅記錄,真係後生可畏。組合理念同佢哋嘅名一樣,係想表現出男性嘅性感,又為咗表達對國際性嘅重視就加入咗混血兒馬里烏斯,不過成員都話見到個名嗰陣真係極尷尬(笑)但又真係好襯佢哋五個嘅形象,目前曲風都係以呢個方向發展。另外,「Sexy Zone」嘅「xy」記得要係紅色㗎!根據中島喺《TOKIOカケル》嘅解說,呢個係為咗強調「xy」可以變化成任何嘢(冇錯,就係數學嘅代數x同y)。佢哋五個咁後生,可塑性都同個「xy」一樣相當高啊。

A.B.C-Z(2008年結成、2012年出道)


左起:五關晃一戶塚祥太橋本良亮河合郁人塚田僚一

A.B.C-Z由組成到正式出道真係極度崎嶇,佢哋平均喺Johnnyʻs Jr.打滾咗12年,連最遲入社嘅橋本都做咗7年幾Jr.㗎!事實上橋本以外嘅成員喺2001年嗰陣就已經組成咗「A.B.C.」,組合名係「Acrobat Boys Club」嘅略寫,後來橋本加入嗰陣就係名上加上象徵「ZERO」嘅Z,表示佢哋重新出發咁話。佢哋五個都相當擅長雜技,出道前都曾喺唔同場合上表演同伴舞。為咗令觀眾更了解佢哋嘅特點,就成為咗J家史上第一個以DVD出道嘅組合(一直以來J家都係以出CD作為正式出道嘅象徵)。除此之外A.B.C-Z嘅舞蹈都係J家數一數二,五關仲有幫手編舞㗎!不過佢哋喺電視上露面嘅時間相對較少,如果見到佢哋不妨留意下~

ジャニーズWEST(2013年結成、2014年出道)


左起:中間淳太神山智洋藤井流星重岡大毅小瀧望濱田崇裕桐山照史

ジャニーズWEST係繼1967年解散嘅初代「ジャニーズ」後第一隊以事務所個名去命名嘅組合,亦係第二隊全部都係關西Jr.出道嘅組合,但其實出道背後藏住一個感人嘅故事。話說2013年倒數演唱會上宣佈出道嘅只係由小瀧、重岡、中間同桐山組成嘅「ジャニーズWEST4」,但係佢哋唔想拋低另外嘅小伙伴,所以就同社長談判。終於喺幾個月後,佢哋就以7個人平等嘅形式出道啦!雖然組合風格同關8一樣都係走關西輕鬆搞笑風,到目前為止大部份派台曲都係近似嘅洗腦感覺,但一聽舞曲同抒情曲等非主打歌就好似轉咗畫風咁,好聽到嚇咗小編一跳,以為自己聽緊其他團嘅歌。(請各位粉絲放過小編一馬,因為實在同佢哋本身形象差太遠XD)搞笑上面佢哋都好放得開,當人哋每團嘅應援扇都係chok樣嘅時候,佢哋2016年嘅演唱會「ラッキィィィィィィィ7」嗰陣竟然配合主題扮馬騮!雖然淨係出咗道短短3年幾,都無阻佢哋嘅特色同魅力呀~

——-

喺ジャニーズWEST出道之後J家就再冇組合出道,直到今年終於要迎嚟全新嘅6人組合「King&Prince」啦!雖然佢哋其實喺2015年嗰陣結成咗「Mr. King vs Mr.Prince」,隨後再以「Mr.KING」同「Prince」嘅名義活動,但未出道已經人氣爆登。小編都好期待見證佢哋出道,繼續喺娛樂圈發光發亮。

以上介紹都係由小編自己同粉絲嘅意見寫成,如果有咩得罪還請各位粉絲手下留情(土下坐)好多人都話J家係一個大坑,當你鍾意咗第一團之後就會開始一團一團咁鍾意落去,發現佢哋每團每個人可愛嘅地方。希望睇完呢編介紹可以比到大家對J家更深印象啦!

(p.s. 歡迎大家估吓小編係邊團嘅粉絲~)

前文提要:傑尼斯大解剖 簡介旗下15位獨立藝人