[乃木坂46即將襲港] 率先介紹乃木坂46的中心成員ー齋藤飛鳥

齋藤飛鳥

出生日期：1998年8月10日

暱稱：Asuka（あすか）、Ashu（あしゅ）、Ashurin（あしゅりん）

螢光棒應援色：淺藍色×白色

人氣急升嘅飛鳥係日本同緬甸嘅混血兒，亦係一期生中最年輕嘅成員。一開始飛鳥未能入到選拔，一直作為Under Member打拼，到後期成為常規選拔人員，以及喺第15張單曲《赤腳Summer》初次擔任Center，唔少人一直見證住佢嘅成長。開始變成中心人物嗰陣，飛鳥憑僅有18cm嘅小臉引起話題同各方嘅關注。依家嘅佢係時尚雜誌《sweet》嘅常規模特兒，亦係乃木坂46小分隊「乃木團」中嘅鼓手。

圖片：不論係演唱會或節目中都試過打鼓既飛鳥有台型架

飛鳥係一個好有個性嘅女仔。先前有節目拍攝到喺握手會面對「請說一句可愛的話」、「請說我喜歡你」等粉絲要求嘅佢係會滿面笑容地拒絕，明明可以趁機吸納粉絲但係最終都選擇唔會好似其他偶像咁隨波逐流，取悅對方。為咗製造娛樂效果，佢係節目及演唱會上曾經講過「反正你哋（粉絲）都唔會有一齊過聖誕節嘅對象㗎啦」、「就算你搵唔搵到工，你嘅人生都唔會點改變」等言論，傲嬌又帶啲毒舌嘅定位亦係佢與別不同嘅魅力之處。（甚至有唔少粉絲以當面被佢嘲諷為榮？）

圖片：飛鳥一般好少會展現既反差萌

雖然飛鳥平時講嘢好直接，但佢都好照顧後輩，成日同二、三期生玩埋一堆，毫無前輩架子。仲記得喺其中一集嘅《乃木坂工事中》，要二期生揀佢地憧憬嘅前輩告白，跟住飛鳥就顯得好有自信，因為佢覺得佢一定可以從二期生手中攞到禮物，所以主動參選競投，結果被唔同既成員連續甩咗3次，搞到飛鳥喊哂口咁，成為嗰一集嘅亮點。雖然得唔到禮物，但係都可以見到飛鳥同團員之間嘅關係都唔錯㗎。

圖片：舞台版《薙刀社青春日記》宣傳圖

圖片：先前為拍攝《那些年》飛鳥有到台灣實地取景

另外，飛鳥係某個有關學習英文嘅電台節目嘅固定班底，之前喺舞台版嘅《薙刀社青春日記》就係佢做主角。個人寫真集《潮騷》嘅銷售額亦相當出色，黎緊秋季即將上映日版《那些年，我們一起追的女孩》中飛鳥就係擔當沈佳宜既角色，呢次係佢第一次擔正電影女主角，大家都非常期待對呢套戲同佢嘅表現呀。

—————————–

乃木坂46入門介紹: www.likejapan.com/nogizaka46hk1
中心成員 西野七瀨: www.likejapan.com/nogizaka46hk2
中心成員 齋藤飛鳥: www.likejapan.com/nogizaka46hk3
C3AFA來港成員介紹 (上): www.likejapan.com/nogizaka46hk4
C3AFA來港成員介紹 (下): www.likejapan.com/nogizaka46hk5