出道10年人氣樂隊 生物股長宣佈暫停活動!

出道10年人氣樂隊 生物股長宣佈暫停活動!

今年出道10週年,一直受JPOP樂迷愛戴嘅兩男一女樂隊生物股長今日喺官方網站發布「放牧宣言」,向粉絲及大眾表白將會暫時停止活動!不過唔使驚,佢哋指今次絕對唔係解散,仲向粉絲發誓會再同大家見面。

 

佢哋嘅網頁已經癱瘓咗,喺度大概翻譯咗佢哋俾大家嘅公告:
 

 

「生物股長 放牧宣言」

 

10年來,我哋三個人好努力咁渡過呢段時間,
而家我哋想分別試下感受自由嘅生活。

 

想試下做自己鍾意做嘅事,
試下展開啲新嘅開始,
試下慢慢停下來發呆,
試下去一直想去嘅地方踏上旅程。

 

為咗可以更加擴闊我哋嘅未來。
為咗可以令我哋三個嘅故事可以繼續發展得更加長遠、更加開心。

 

以上係生物股長嘅放牧宣言。

 

首先喺度同大家講聲「一直以來,非常感謝。」
然後係「往後也請多多指教。」

 

生物股長喺我哋三個人會返嚟嘅地方。
下次見嘅時候大家笑住見面吧!

係咁,我哋行先啦!

放牧!

 

生物股長 水野良樹・吉岡聖恵・山下穂尊