靜岡縣富士山下 の 體驗食品工場!

上次嘅東京之旅因為三日兩夜嘅camping而黎到朝霧,玩咗滑翔傘又去咗牧場。我地仲去咗呢個食品工場,有得整野食!
 
呢個工場喺富士山下,面積好大,入面有幾個唔同嘅工房,又被大自然包圍,喺呢度嘅教室俾你可以體驗到富士山嘅食物同文化!其實佢有好多嘢食可以整㗎,今次就揀咗整牛油同冬甩,整完結果都好滿意,好味都係多得新鮮嘅食材咋,即刻睇下我點整啦!
 
 
【牛油製作體驗】
▲用專用溶器裝住嘅牛油,將佢shake 10~15分鐘,令牛油從牛奶中分開。
 
▲Shake咗10分鐘就將牛油同牛奶分隔咗啦。呢個步驟之後嘅牛油係可以食用嘅,但牛奶就仲要進入第二階段,如果就咁飲係會好咸同酸㗎。
 
▲即刻將牛油搽落新鮮麵包度先,突然覺得好有營養啊!
 
▲師傅話呢個麵包都係牛奶製造㗎,食落真係好甜好新鮮。
而牛油就好滑,清清甜甜,配麵包食真係唔錯。
 
--------------
製作費:500円
所需時間:約20~30分
(*記得要預約啊!)
--------------
 
▲呢度仲有售牛奶㗎,165円就飲到一樽啦!
 
▲我都買咗黎試,同樣清清地唔會好甜,新鮮牛奶係唔同啲!
 
【冬甩製作體驗】期間限定
▲之後就去咗呢個「いも工房」整冬甩啦。
 
▲冬甩所需嘅材料係薯仔、砂糖、蛋黃同麵粉。首先壓碎啲薯仔,
加入蛋黃同砂糖,再將篩好嘅麵粉加入去。
 
▲然後可以挑選番自己鍾意嘅模型,壓落麵粉度。
 
▲之後就可以放落油度炸啦,炸大約5分鐘就完成,好簡單!
 
▲記得入到去工房要戴帽同手套先可以開始整㗎!
 
▲炸完仲可以點啲砂糖,趁佢仲熱咁食,皮脆又幾好味㗎。咁容易整嘅嘢食學完可以自己試下喺屋企整,得閒整下嘢食都幾開心㗎。
 
因為整冬甩係期間限定,而家已經冇咗啦。但大家可以留意住佢嘅網站,睇下有冇其他嘢食想整,而家都有整紫芋薯條體驗,費用:5,000円,要一星期前預約。
 
▲呢度有好多明星嚟過㗎,整完嘢食就可以買啲手信番去試下啦。
 
 
今次就講到呢度啦,如果大家下次會去東京近郊,範圍又喺富士山或者朝霧都可以黎玩下啦!上次玩嘅滑翔傘都喺距離7分鐘車程咋!
 
其他製作體驗:
 
了解茶葉體驗
内容:從數種茶葉之中挑選最喜歡的茶葉,把它們放進罐子。
費用:600円(税込)
所需時間:約20分
 
曲奇餅製作體驗
内容:選擇自己喜歡的形狀,把它製成好吃的曲奇餅。
費用:600円(税込)
所需時間:30~45分
 
試酒體驗
内容:了解清酒製作過程,比較3種清酒的分別。
費用:500円(税込)
所需時間:約30分
 
*以上都需預先預約。
 
===============
あさぎりフードパーク
地址:静岡県富士宮市根原449-11
[TEL] 0544-29-5101
[營業時間] 9:00~17:00