【蠟筆小新】尋找春日部防衛隊之旅

 
我細細個已經好鍾意小新㗎啦。由之前儲佢嘅漫畫到係亞視睇佢嘅動畫(無錯,個陣時係仲有亞視㗎XD)直到而家,我對佢嘅愛依然無熄滅。今日就同大家黎到小新嘅出生地,琦玉縣嘅春日部去會一會佢啦
 
▼由「春日部駅」西口出發,大約5分鐘左右就可以去到一個叫做「LaLa Garden」嘅商場,而蠟筆小新館就位於3樓。(詳細路線請參考影片)
 
 
▼勁大個小新係門口迎接你。
 
 
▼不過一入到去…你就會發現,其實所有地方一眼已經望得晒。而佢亦都連住一個好大嘅game center,有好多夾公仔機或者夾糖機,不過就唔係小新主題。
 
 
▼場地主要分4個區域,分別係「展品」、「影相」、「遊戲」同埋「精品店」。好似呢度就擺放咗咁多年來嘅小新電影資料。
 
 
▼而中間就擺放咗每個角色嘅印記。好似不理不理左衛門嘅豬鼻,小新嘅屁股同埋小葵嘅手掌等等。不過最勁都係廣志嘅臭腳,仲畫埋線條出黎表示佢嘅「香氣」!超抵死
 
 
▼旁邊就有影相位,好似野原一家同埋最新電影《蠟筆小新:爆睡!夢世界大作戰》主題嘅佈景。
 
 
▼仲有黃金系列,見到小新嘅招牌PatPat都忍唔住輕薄咗佢一下
 
 
▼再過少少就係小遊戲區域。不過需要付費先可以玩。分數唔同,得到嘅獎品都會唔同。遊戲非常簡單,大人小朋友都岩玩。
 
 
▼轉過頭就有部小新主題嘅貼紙相機。而我最欣賞嘅地方係,你可以send ID去佢地Email,咁就可以拎番張貼紙相圖檔㗎啦
 
 
▼商店賣嘅產品種類有文具,零食,擺設等等,而呢個小新背包就係「人氣No.1」嘅產品。題外話:有無人覺得店長有啲似園長呢?
 
 
後記:由於場地其實不大,所以可以介紹嘅野並唔多。除咗小新館,係LaLa Garden入面其實都有啲商舖可以去,不過由新宿到春日部差唔多要一個小時,單單睇蠟筆小新可能你地會覺得唔抵。
 
不過唔駛驚,因為我之前曾經介紹過一間叫「Capcom Cafe」嘅遊戲主題Cafe就位於距離春日部大約40分鐘車程嘅「越谷Lake Town」站。而個度亦都係一個好大型嘅Outlet。所以喜愛動漫同購物嘅朋友不妨將兩個地方連番一齊,咁就可以當做大半日嘅行程啦!
 
 
【‬蠟筆小新Cinema Studio】
地址:埼玉県春日部市南 1-1-1 ララガーデン春日部 3階
電話:048-731-6822
時間:10:00〜20:00