【得償所願‬】Biohazard期間限定「Capcom Cafe」

認識我嘅朋友,基本上都知道我好鍾意打機。不過佢地未必知道我最喜歡嘅遊戲,係生化危機Biohazard。或者係一種情意結,我第一隻接觸嘅遊戲就係Biohazard,由一開始只係好驚咁匿埋睇阿哥玩,到後期我玩得叻過我阿哥。
 
雖然近年好多人都話Biohazard開始走下坡,不過我欣賞嘅,除咗遊戲可玩性之外,仲有當中嘅劇情。最喜愛Ada同Leon似是而非之間嘅愛情,Chirs同Piers之間嘅兄弟情,Jake同Sherry之間嘅曖昧關係…
 
 
講咁多,都只係想表達我對Biohazard嘅熱愛。所以係香港一聽到日本有一連串慶祝佢20週年嘅活動,真係即刻想不顧一切飛過去呀!其中一個就係期間限定主題嘅「Capcom Cafe」啦
 
Capcom Cafe位於「越谷Lake Town」站。由於唔算係一個旅遊熱點,所以大家可能對佢有啲陌生。由新宿過嚟車程大約要一個小時。
 
 
一出閘就可以見到呢條扶手電梯,上去就可以去到Lake Town。
 
 
如果你選擇行地面,只需要前行右轉,只需幾分鐘馬上就可以見到Lake Town,距離非常之近。
 
 
Capcom Cafe位於3樓,首先迎接你嘅係伊達政宗,阿龍,成步堂龍一同Leon等等等等…
 
 
穿過呢個商店區域就可以正式去到Cafe嘅門口啦,大大隻字寫住Biohazard。
 
 
就連旁邊嘅Poster都好有Feel喎。
 
 
其實Capcom Cafe成日都會做唔同類型嘅主題,今次為咗慶祝Biohazard 20週年,就採用咗Biohazard為今期限定。
 
 
全部角色係呢度都變成Q版風格,就連喪屍都即刻變得平易近人(仲爭食三文治添
 
 
仲有好多紙牌,任影唔嬲。想當年我玩嘅時侯,就係成日俾佢追㗎啦
 
 
想拎道具就要開箱!仲記得用刀仔界爆箱嘅情節嘛?
 
 
仲有好多唔同嘅遊戲道具都會係Cafe入面搵到㗎!
 
 
好似呢部經典嘅打字機,有玩開嘅朋友一定會認得!想Save?請坐低打番篇千字文先喇
 
 
作為一個專業嘅警員,一枝性能好嘅手槍係必需。盛惠16,800円。(如果有密林買就殺晒喇
 
 
 係入面搞搞震完一輪,終於捨得坐低點餐。一坐低首先見到嘅就係呢張餐墊啦,真係好想拎埋佢返屋企呀。
 
 
Cafe Menu種類都好齊全。除咗主餐,小食,仲有甜品同埋唔同類型嘅飲品,就連酒精類嘅都有。
 
 
佢仲會不定期推出新Menu,好似呢個「喪屍漢堡扒餐」咁。
 
 
不過其實我嚟之前,已經有心水。所以二話不說,我就點咗呢個「喪屍犬咖哩飯」
 
 
呢個角度可能睇得唔係好清楚,但係轉一轉你就可以見到一個完整嘅喪屍犬頭。仲要大細眼添。
 
 
佢d牙都做得好仔細,全部都係用蛋白砌出嚟㗎,心機之作。旁邊仲附送兩個芝士狗骨頭
 
 
根據過往去動漫Cafe嘅經驗,其實我對佢味道完全無任何期望,但估唔到反而為我帶來驚喜。伴碟嘅蔬菜好新鮮爽脆,薯仔沙律亦都恰如其分。主角咖哩味道適中,唔會太辣或太淡,而且份量多,撈飯食超正。
 
唯一缺點只係糙米飯稍為偏硬同埋涼,除咗有可能因為方便造型之外,某程度都因為我掛住影相而令佢變涼。(這就是Vlogger的悲哀,哈哈
 
飲品方面我就叫咗呢杯普通少少嘅「雪糕梳打」。味道都唔錯㗎!
 
 
重點係每杯野飲都會隨機附送一個杯墊,全套十款。我好好彩抽中呢個全角色杯墊。
 
 
建議大家如果嚐酒,都可以試下點佢嘅針筒類型飲品,夠晒特色!
 
 
一個主餐加一杯野飲盛惠2,009円。以主題Cafe嚟講,價錢算正常,最重要係質素都有一定保證。
 
 
食飽飽梗係要行埋佢嘅商店區域。係未正式坐低之前我已經忍唔住望咗一圈。除咗現有嘅主題之外,過往出現過Capcom旗下嘅主題產品你都有機會係度搵到。
 
當然唔少得賣飛佛之一嘅《戰國Basara》
 
 
而今次Biohazard精品嘅種類都好多。除咗零食,文具,家居用品之外,仲有啲好特別嘅擺設。
 
 
好似呢個獵殺者嘅腦…你會唔會想帶番屋企收藏?
 
 
仲有呢個喪屍綠咖哩,唔知會唔會內含G病毒,食完變喪屍?
 
 
後記:今次嘅Capcom Cafe體驗真係好開心呀!除咗滿足晒我呢個Biohazard迷嘅慾望之外,佢嘅餐飲都完全無令我失望,大滿足!唯一缺點係地點比較偏遠,不過其實佢位於LakeTown呢個大型Outlet入面,如果你喜歡購物嘅話,不妨可以消費完再過嚟呢度享用一個午/晚餐呀!
 
不過注意番Biohazard主題只係做到6月中,想知道嚟緊會轉咩主題就記住留意官網公告啦!
 
另外其實佢同琦玉縣嘅小新館距離只係大約40分鐘車程,有興趣嘅不妨將佢地排埋一齊當一日行程。小新館嘅遊記將會稍後推出,記住繼續留意我嘅Blog啦
 
 
【Capcom Cafe】
地址:埼玉県越谷市レイクタウン4-2-2 イオンレイクタウンkaze 3F
電話:048-967-5163
期間:3月17日至6月19日
時間:9:00 ~ 22:00
 
 
「送禮物時間」
 
今次準備咗呢隻Biohazard Capcom Cafe限定玻璃杯俾大家!各位Biohazard迷係咪好想要哩?想知點拎就睇下面啦!(你地唔要就我要㗎喇
 
 
1. 讚好LikeJapan Facebook
2. 註冊成為LikeJapan網站會員
3.瀏覽此博客文章時,點選左方的「分享博客文章」以獲得分享連結
4. 會員可透過各大社交平台及討論區分享連結網址,LikeJapan會統計每條連結的點擊次數,會員也可於博客頁面左方查閱點擊排行榜。
5. 截止時間內的分享連結點擊次數愈多,獲獎機會愈大。如有會員的分享點擊數目相同,將根據系統紀錄最快達到該點擊次數的參加者得獎。
詳細玩法亦可參考此頁
*如有任何爭議,LikeJapan將保留最終決定權。
 
遊戲截止日期: 
2016年6月19日
 
遊戲截止日期: 
2016年7月1日

回覆

Wowyuyu的圖片
點解仲未見LikeJapan Facebook專頁公佈賽果既?
Poli的圖片
我地好快會以email通知你,記住check email啦